व्यवस्थाविवरन 19

खूनी को लायी शरन नगर

(गिनती ३५:९-२८; यहोशू २०:१-९)

1“जब तोरो परमेश्वर उन राष्ट्रों ख नाश करेंन जिन्को देश ऊ तोख देवय हय, अऊर तय उन्को देश को हक्कदार होय क उन्को नगर अऊर घरों म रहन लगे, 2तब अपनो देश को बीच जेको अधिकारी तोरो परमेश्वर यहोवा तोख बनावय हय, तीन नगर अपनो लायी अलग कर देजो। 3अऊर तय अपनो लायी रस्ता तैयार करजो, अऊर अपनो देश ख जो तोरो परमेश्वर तोख सौप देन तीन भाग करजो, ताकि हर एक खूनी उत भग क शरन ले सकय। 4अऊर जो खूनी उत भग क अपनो जीव ख बचायेंन, ऊ असो रहेंन; मतलब ऊ कोयी ख बिना दुस्मनी को ओख बिना जान्यो बूझे ओख मार डाल्यो होना। 5जसो कोयी, कोयी को संग लकड़ी काटन ख जंगल म जाये, अऊर झाड़ काटन लायी टंग्या हाथ सी उठायेंन, अऊर तब टंग्या डन्डा सी निकल क ऊ भाऊ ख असी लगे की ऊ मर जाये त ऊ उन नगरों म सी कोयी एक नगर म भग क शरन ले सकय, अऊर अपनो जीव बचाय सकय हय। 6असो मत होय कि रस्ता की लम्बायी को वजह खून को बदला लेन वालो अपनो गुस्सा की जलन म ओको पिछा कर क् ओख पकड़े, अऊर मार डाले, फिर भी ऊ मृत्यु दण्ड को लायक नहाय, कहालीकि ओकोसी दुस्मनी नहीं रखत होतो। 7येकोलायी मय तोख या आज्ञा देऊ हय, कि अपनो लायी तीन नगर अलग अलग कर क् रखजो।”

8“यदि तोरो परमेश्वर यहोवा वा कसम को अनुसार जो ओन तोरो पूर्वजों सी खायी होती तोरी सीमा ख बढ़ाय क ऊ पूरो देश तोख दे, जेख देन को वादा ओन तोरो पूर्वजों सी करयो होतो। 9यदि तय इन सब आज्ञावों ख मानन म जेक मय अज तोख सुनावय हय चौकसी करजो, अऊर अपनो परमेश्वर यहोवा सी प्रेम रखजो अऊर हमेशा ओको रस्ता पर चलजो त हि तीन नगरों सी जादा अऊर भी तीन नगर अलग कर देजो। 10येकोलायी कि तोरो ऊ देश म जो तोरो परमेश्वर यहोवा तोरो निज भाग कर क् देवय हय, कोयी निर्दोष को खून नहीं बहायो जाये, अऊर ओको दोष तोरो पर नहीं लगेंन।”

11“पर यदि कोयी अपनो पड़ोसी सी दुस्मनी रखय, अऊर असो मारय कि ऊ मर जावय हय, अऊर फिर ऊ उन नगरों म सी भग क कोयी नगर म शरन ले ले; 12त ओको नगर को बुजूर्गों कोयी ख भेज क ओख वहां सी मांग क खून को बदला लेन वालों को हाथ म सौप देंन, कि ऊ मार डाल्यो जायें। 13ओको पर तरस मत खाजो, पर निर्दोष को खून को दोष इस्राएल सी दूर करजो, जेकोसी तुम्हरो भला होयेंन।”

प्राचिन सीमायें

14“जो देश तोरो परमेश्वर यहोवा तोख देवय हय, ओको जो हिस्सा तोख मिलेंन, ओको म सी कोयी की सीमा-रेखा जो पूर्वजों न ठहरायो हय, ओख मत हटायजो।”

गवाहों सी सम्बन्धित नियम

15“कोयी आदमी को खिलाफ कोयी तरह को अपराध यां पाप को विषय म हय, चाहे ओन कसो भी तरह को पाप करयो हय, केवल एकच आदमी की गवाही नहीं मानी जायेंन, पर दो या तीन आदमी की गवाही को बोलनो पर गवाही पक्की मानी जायेंन। 16यदि कोयी आदमी जलन सी कोयी को खिलाफ झूठी गवाही देयेंन कि ओन परमेश्वर सी विद्रोह करयो हय। 17त हि दोयी आदमी, जिन्को बीच असो मुकद्दमा भयो हय, परमेश्वर को आगु, ऊ समय को याजकों अऊर न्यायियों को आगु खड़ो करयो जायेंन। 18तब न्यायी सावधानी सी पूछताछ करेंन, अऊर गवाह झूठो साबित होयेंन, कि ओन अपनो भाऊवों को खिलाफ झूठी गवाही दी हय। 19त अपनो भाऊ को जसी हानि करावन की युक्ति ओन करी होना वसोच तुम भी ओकी करो, या रीति सी अपनो बीच म सी असी बुरायी ख दूर करो। 20तब दूसरो लोग सुन क डरेंन, अऊर फिर सी तोरो बीच असो बुरो काम नहीं करेंन। 21अऊर तय बिल्कुल तरस मत खाजो; जीव को बदला जीव, आंखी को बदला आंखी, दात को बदला दात, हाथ को बदला हाथ, पाय को बदला पाय की सजा देजो।”