व्यवस्थाविवरन 20

युद्ध पर जान को नियम

1“जब तय अपनो दुश्मनों सी लड़ायी करन ख जाजो, अऊर घोड़ा, रथ, अऊर अपनो सी जादा सेना ख देखजो, तब ओको सी डरजो मत; तोरो परमेश्वर यहोवा जेन तोख मिस्र सी निकाल्यो हय ऊ तोरो संग हय। 2अऊर जब तुम लड़ायी करन ख दुश्मनों को जवर जावो, तब याजक सेना को जवर आय क कहेंन, 3हे इस्राएलियों सुनो, अज तुम अपनो दुश्मनों सी लड़ायी करन लायी जवर आयो हय; तुम्हरो मन कमजोर नहीं होय, अऊर नहीं घबरावों अऊर नहीं ओको आगु भय नहीं खावो; 4कहालीकि तुम्हरो परमेश्वर यहोवा तुम्हरो दुश्मनों सी लड़ायी लड़न अऊर तुम्ख बचान लायी तुम्हरो संग संग चलय हय। 5फिर अधिकारी न सिपाहियों सी यो बोल्यो, तुम म सी कौन हय जेन नयो घर बनायो हय अऊर ओको समर्पन नहीं करयो हय? त ऊ अपनो घर वापस चली जाये, असो मत होय की ऊ युद्ध म मर जाये अऊर दूसरो आदमी ओको समर्पन करेंन। 6अऊर कौन हय जेन अंगूर को बगीचा लगायो हय, पर ओको फल नहीं खायो हय? त ऊ भी अपनो घर ख वापस चली जाये, असो मत होय की ऊ युद्ध म मर जाये अऊर दूसरो आदमी ओको फल खायेंन। 7फिर असो कौन हय जेन कोयी बाई सी बिहाव कि बात चलायी हय, पर बिहाव नहीं करयो हय? त ऊ भी अपनो घर वापस चली जाये, असो मत होय की ऊ युद्ध म मर जायेंन अऊर दूसरो आदमी ओको सी बिहाव कर लेन। 8येको अलावा लेवी अधिकारी सिपाहियों सी यो भी कह्य कि असो कौन-कौन हय जो डरपोक अऊर कच्चो मन को हय, त ऊ भी अपनो घर वापस चली जाये, असो मत होय की ओख देख क ओको भाऊवों को भी हिम्मत टूट जायेंन। 9अऊर जब अधिकारियों न सिपाहियों सी बात कर ली, तब उन पर अगुवायी करन लायी सेनापतियों ख नियुक्त करेंन।”

10“जब तय नगर म युद्ध करन ओको जवर जाजो, तब सब सी पहले ओकोसी शान्ति को समाचार देजो। 11अऊर यदि ऊ शान्ति प्रस्ताव मान लेन अऊर तोरो लायी अपनो फाटक खोल दे, तब उन्को सब निवासी तोरो अधीन होय क तोरो दास बन जायेंन अऊर तुम्हरो लायी सेवा मजूरी करेंन। 12पर यदि ऊ तोरो शान्ति प्रस्ताव ठुकराय देवय हय, पर तोरो सी लड़ायी करनो चाहेंन, तब तय ऊ नगर ख घेर लेजो। 13अऊर जब तोरो परमेश्वर यहोवा ओख तोरो हाथ म सौप देंन तब उन्को सब आदमी ख तलवार सी मार डालजो। 14पर बाईयां, बाल-बच्चा, अऊर जनावर जितनी लूट ऊ नगर म हो ओख अपनो लायी रख लेजो; अऊर तोरो दुश्मनों की लूट जो तोरो परमेश्वर यहोवा तोख देयेंन ओख काम म लाजो। 15तय असो च ऊ नगर सी करजो जो तोरो सी बहुत दूर हय, अऊर जो यहां को देशों को नगर नहाय। 16पर जो नगर इन लोगों को आय, जेको अधिकारी तोरो परमेश्वर यहोवा तोख ठहरान वालों हय, उन्म सी कोयी भी जीव जीन्दो मत रखजो। 17हित्तियों, एमोरियों, कनानियों, परिज्जियों, हिव्वियों अऊर यबूसियों ख, पूरो तरीका सी नाश कर देजो, जसो जसो की तोरो परमेश्वर यहोवा न तोख आज्ञा दी हय। 18असो मत होय कि जितनो बुरो काम हि अपनो देवतावों की सेवा म करतो आयो हय, वसोच तुम्ख भी सिखायेंन, अऊर तुम अपनो परमेश्वर यहोवा को खिलाफ पाप करन लगो।”

19“जब तय लड़ायी लड़तो हुयो नगर ख जीतन लायी ओख बहुत दिन तक घेरयो रहे, तब फर वालो झाड़ पर टंग्या मत चलाजो, कहालीकि ओको फर तोरो लायी खान को काम आयेंन, येकोलायी ओख काटजो मत। का मैदान को झाड़ भी दुश्मन आय कि तय उन्ख भी घेरयो रखजो? 20पर जो झाड़ को विषय म तय यो जान ले कि इन्को फर खान को नहाय, त उन्ख काट डालजो, अऊर ऊ नगर को खिलाफ ऊ समय तक घेर क रखजो जब तक ऊ तोरो वश म नहीं आवय।”