व्यवस्थाविवरन 21

हत्या को अनसुलझ्यो मामला

1“यदि तोख ऊ देश को मैदान म जो तोरो परमेश्वर यहोवा तोख देवय हय कोयी मरयो हुयो को पड़्यो मिले, अऊर ओख कौन न मारयो हय यो पता नहीं चले, 2त तोरो बुजूर्गों अऊर न्यायी निकल क ऊ शव को चारों तरफ सी एक एक नगर की दूरी नापेंन। 3तब जो नगर ऊ शव को सब सी जवर ठहरेंन, ओख बुजूर्गों एक असो बछड़ा ले, जेकोसी कोयी काम नहीं लियो हय। 4तब ऊ नगर को बुजूर्ग ऊ बछड़ा ख बारहमासी नदी की असी घाटी म ले जायेंन, जो कभी जोती अऊर बोयी नहीं हय, उत बछड़ा की गर्दन तोड़ दे। 5अऊर लेवीय याजक भी जवर आयेंन, कहालीकि तोरो परमेश्वर यहोवा न उन्ख चुन लियो हय, कि हि सेवा करेंन अऊर अपनो नाम सी आशीर्वाद देयेंन, अऊर उन्को कहनो पर हर एक झगड़ा अऊर मारपीट को मुकद्दमा को निर्णय होयेंन। 6फिर जो नगर ऊ लाश को सब सी जवर होना, ओको सब बुजूर्गों ऊ बछड़ा को ऊपर जेको गर्दन घाटी म तोड़्यो गयो हय अपनो अपनो हाथ धोय क कहेंन, 7हि कहेंन यो खून हम्न नहीं करयो, अऊर नहीं यो हमरो आंखी को आगु भयो हय। 8येकोलायी, हे परमेश्वर, अपनी छुड़ायी हुयी इस्राएली प्रजा को पाप माफ कर, निर्दोष आदमियों को खून को दोष अपनो निज लोगों पर मत लगा। असोच खून को दोष सी उन्ख माफ कर दियो जायेंन। 9यो ऊ काम कर क् जो परमेश्वर की नजर म ठीक हय, तय निर्दोष को खून को दोष अपनो बीच म सी दूर करजो।”

युद्ध म पकड़ी गयी बाई को संग बिहाव

10“जब तय अपनो दुश्मनों सी युद्ध करन जावो, अऊर तोरो परमेश्वर यहोवा उन्ख तोरो हाथ म कर देंन, अऊर तय उन्ख बन्दी बनाय लेजो। 11तब यदि तय बन्दियों म कोयी सुन्दर बाई ख देख क ओको पर मोहित हो जाजो, अऊर ओकोसी बिहाव करनो चाहेंन, 12त ओख अपनो घर लाजो, अऊर ऊ मुन्डन होयेंन अऊर नख काटेंन, 13अऊर अपनो कैदी को कपड़ा उतार क तोरो घर म महिना भर रह्य क अपनो माय-बाप लायी शोक मनायेंन; ओको बाद तय ओको जवर जाजो, अऊर ओको पति अऊर वा तोरी पत्नी बनेंन। 14तब यदि वा तोख पसंद नहीं आवय, त जित वा जानो चाहेंन उत ओख जान देजो; ओख कहीं मत बिकजो, अऊर तोरो ओकोसी शारीरिक सम्बन्ध होतो, येकोलायी ओकोसी दासी जसो व्यवहार मत करजो।”

पहिलौठा को अधिकार

15“यदि कोयी आदमी की दोय पत्नियां हय, अऊर ओख एक पसंद अऊर दूसरी नापसंद हय, अऊर दोयी सी ओख बेटा पैदा भयो, बड़ो बेटा नापसंद वाली को हय, 16त जब वा अपनो बेटा म अपनी सम्पत्ति बंटवारा करेंन, तब नापसंद वाली को बेटा जो सच म जीन्दो हय, त ऊ पसंद वाली को बेटा ख बड़ो होन ख अधिकार नहीं मान सकेंन। 17पर ऊ अपनी नापसंद पत्नी को बेटा ख कुल सम्पत्ति, सी दोय गुना हिस्सा दे क ओको बड़ो बेटा हय स्विकार करेंन, कहालीकि उच ओकी पहली सन्तान आय। ओख च बड़ो बेटा होन को अधिकार प्राप्त हय।”

जिद्दी टुरा

18“यदि कोयी को जिद्दी अऊर झगड़ालु टुरा हय, अऊर ऊ अपनो बाप अऊर अपनी माय की बात नहीं सुनय, पर ताड़ना देनो पर भी उन्की नहीं सुनेंन, 19त ओको माय-बाप ओख पकड़ क अपनो नगर सी बाहेर फाटक को जवर बुजूर्गों को जवर ले जायेंन, 20अऊर हि नगर को बुजूर्गों सी कहेंन, हमरो यो बेटा जिद्दी अऊर झगड़ालु हय, यो हमरी नहीं सुनय; यो उड़ाऊ अऊर पियक्कड़ हय। 21तब ऊ नगर को सब आदमी ओख गोटा फेंक क मार डाले, असो तरह तय अपनो बीच म सी असी बुरायी ख दूर करजो, तब पूरो इस्राएली सुन क डर जायेंन।”

दूसरो नियम

22“फिर यदि कोयी आदमी न असो पाप करयो हय, जो न्याय की नजर म मृत्‍यु-दण्‍ड हय, अऊर ओख सजा दी हय, त ओख झाड़ सी लटकाय दे। 23त ऊ शव रात ख झाड़ पर टंग्यो नहीं रहेंन, उच दिन ओख गाड़ देजो; कहालीकि जो लटकायो होतो ऊ परमेश्वर को तरफ सी श्रापित हय। येकोलायी जो हिस्सा तोरो परमेश्वर यहोवा तोख देवय हय तय वा जमीन ख अशुद्ध मत करजो।”