व्यवस्थाविवरन 22

1“तय अपनो भाऊ को गाय-बईल या शेरी-मेंढी ख भटकी हुयी देख क अनदेखा मत करजो, ओख जरूर पहुंचाय देजो। 2पर तोरो भाऊ जवर नहीं रह्य हय, यां तय ओख नहीं पहिचानय, त ऊ जनावर ख अपनो घर म लायजो, अऊर जब तक तोरो भाऊ ओख नहीं ढूंढ ले, तब तक ऊ तोरो जवर रहेंन; अऊर जब ऊ ढूंढेंन तब ओख दे देजो। 3अऊर ओको गधा यां कपड़ा यां ओकी कोयी भी चीज जो ओको सी गुम गयी हय अऊर तोख मिल्यो हय, त ओको बारे म भी अनदेखी मत करजो।”

4“तय अपनो भाऊ को गधा यां बईल ख रस्ता पर गिरयो देख क अनदेखा मत करजो, ओको उठान म मदत करजो।”

5“कोयी बाई आदमी को जसो अऊर आदमी बाई को जसो पहिरावा मत पहिनो, कहालीकि असो काम करन वालो सब आदमी परमेश्वर की नजर म घृणित हय।”

6“यदि झाड़ यां जमीन पर तोख कोयी चिड़ियां को गोदा मिलेंन, जेको म चिड़िया को बच्चा यां अण्डा यां चिड़िया बच्चा यां अण्डा पर बैठी हय, त बच्चा सहित माय ख मत पकड़जो; 7बच्चा ख अपनो लायी ले त लेजो, पर माय ख छोड़ देजो; येकोलायी की तोरो भला हो, अऊर तोरी उमर को दिन बहुत होयेंन।”

8“जब तय नयो घर बनायजो तब ओकी छत को लायी मुंडोली बनायजो, असो मत होय की कोयी छत पर सी गिर जायेंन, अऊर तय अपनो घरानों पर खून को दोष लगायजो।”

9“अपनी अंगूर को बगीचा म दो तरह को बीच मत बोयजो, असो मत होय कि ओकी पूरी उपज, मतलब तोरो बोयो हुयो बीज अऊर अंगूर को बगीचा कि उपज दोयी अपवित्र ठहरेंन। 10बईल अऊर गधा दोयी ख संग म नांगर ख मत जोतजो। 11ऊन अऊर सूत सी बन्यो हुयो कपड़ा मत पहिनजो।”

12“अपनो शाल को चारयी कोना पर झालर लगायजो।”

नैतिकता को नियम

13“यदि कोयी आदमी कोयी बाई सी बिहाव करे, अऊर बाद म वा ओख पसंद नहीं आवय। 14अऊर ऊ बाई पर झूठो आरोप लगावय, अऊर यो कह्य क ओको पर कुकर्म को दोष लगाये, कि या बाई सी मय न बिहाव करयो, अऊर जब ओकोसी संगति करी की तब ओको म कुमारीपन को लक्षन नहीं दिख्यो। 15त वा बाई को माय-बाप ओको कुमारीपन को चिन्ह ख ले क नगर को बुजूर्ग लोगों को जवर चौक म लायेंन। 16अऊर ओको बाप बुजूर्ग लोगों सी कहेंन, मय न अपनी बेटी को बिहाव यो आदमी सी कर दी हय, अऊर ऊ ओख अब नहीं चाहवय हय; 17अऊर ऊ त यो कह्य क झूठी बदनाम करय हय, कि मय न तोरी बेटी म कुमारीपन को चिन्ह नहीं देख्यो। पर मोरी बेटी को कुमारीपन को चिन्ह को सबूत यो आय। तब ओको माय-बाप नगर को बुजूर्गों को आगु ऊ बिहाव को चादर फैलाये। 18तब नगर को बुजूर्ग ऊ आदमी ख ताड़ना दे। 19अऊर ओख पर सौ चांदी को सिक्का को दण्ड लगायेंन, अऊर ऊ रकम टुरी को बाप ख देयेंन, येकोलायी की ओन इस्राएली टुरी की बदनामी करी हय; अऊर वा ओकी पत्नि बनी रहेंन, अऊर ऊ जीवन भर वा बाई ख छोड़-चिट्ठी नहीं देयेंन। 20पर वा बाई को कुमारीपन को चिन्ह सही म नहाय, अऊर ऊ आदमी की बात सच ठहरय, 21त ऊ वा टुरी ख ओको बाप घर ख ले जायेंन, अऊर ऊ नगर को आदमी ओख गोटा सी मारेंन; ओन त अपनो बाप को घर म गन्दो काम करी हय; त तय असी बुरायी ख अपनो बीच म सी दूर करजो।”

22“कोयी आदमी दूसरो की पत्नि को संग म पकड़्यो गयो, त ऊ आदमी अऊर बाई दोयी मार डाल्यो जायेंन। असो तरह इस्राएल म सी बुरायी ख दूर करजो।”

23“अगर कोयी कुंवारी बाई की बिहाव कि बात चल रही हय, अऊर कोयी दूसरो आदमी नगर म ओख सी शारीरिक सम्बन्ध म मिल्यो, 24त तुम उन दोयी ख ऊ नगर को बाहेर ले जाय क गोटा सी मार डालजो; वा बाई ख येकोलायी कि वा नगर म रह्यतो हुयो भी मदत लायी नहीं चिल्लायी, अऊर ऊ आदमी ख येकोलायी कि ओन अपनो पड़ोसी बाई ख भ्रष्ट करयो हय; यो तरह सी तय अपनो बीच म सी असी बुरायी दूर करजो।”

25“पर यदि कोयी आदमी मैदान म असी बाई सी जेकी सगाई होय चुकी हय अऊर ऊ ओख पकड़ क ओको संग जबरदस्ती शारीरिक सम्बन्ध बनावय हय, त केवल उच आदमी ख मार डाल्यो जाये। 26अऊर वा बाई को संग कुछ मत करजो; वा बाई को पाप मृत्‍यु-दण्‍ड को लायक नहाय, कहालीकि जसो कोयी अपनो पड़ोसी पर चढ़ क ओख मार डालय, वसोच या बात भी आय; 27कि ऊ आदमी न वा बाई ख मैदान म देख्यो, अऊर वा मदत लायी चिल्लायी त सही, पर ओख कोयी बचान वालों नहीं मिल्यो।”

28“यदि कोयी आदमी असी कोयी कुवारी बाई जेकी मंगनी नहीं भयी हय, अऊर वा ओख पकड़ क ओको सी जबरन शारीरिक सम्बन्ध बनावय हय, अऊर दोयी पकड़्यो जावय हय, 29त बाई सी शारीरिक सम्बन्ध रखन वालो आदमी ओको बाप ख चान्दी को पचास सिक्का देंन, अऊर वा बाई ऊ आदमी की पत्नि भी होयेंन, कहालीकि ओन शारीरिक सम्बन्ध रखन को पाप करयो हय। ऊ जीवनभर ओख छोड़ नहीं सकय।”

30“कोयी अपनी सौतेली माय ख अपनी पत्नी नहीं बनायेंन, ऊ अपनो बाप को ओढ़नो न उघाड़े।