व्यवस्थाविवरन 23

परमेश्वर की सभा म सिरन की मनायी

1“जेको अण्ड-कोष कुचल्यो गयो हय यां लिंग काट्यो गयो हय, ऊ परमेश्वर की सभा म नहीं आनो पाये।” 2“कोयी भी जो कुकर्म सी पैदा भयो ऊ परमेश्वर की सभा म नहीं आनो पाये; पर दस पीढ़ी तक ओको वंश को कोयी परमेश्वर की सभा म नहीं आनो पायेंन।” 3कोयी अम्मोनी यां मोआबी परमेश्वर की सभा म नहीं आनो पायेंन; उन्की दसवी पीढ़ी तक कोयी परमेश्वर की सभा म कभी नहीं आनो पायेंन;

4योच वजह सी जब तुम मिस्र सी निकल क आवत होतो तब उन न तुम्हरो सी खाना पानी ले क रस्ता म तुम्हरो सी भेंट नहीं करी, अऊर यो भी कि उन न अरम्नहरैम देश क् पतोर नगर वालो बोर को बेटा बिलाम ख तोख श्राप देन लायी दक्षिना दियो। 5पर तोरो परमेश्वर यहोवा न बिलाम की नहीं सुनी; पर तोरो परमेश्वर न तोरो लायी ओको श्राप ख आशीर्वाद म बदल दी, येकोलायी कि तोरो परमेश्वर यहोवा तोरो सी प्रेम करत होतो। 6तय जीवन भर ओको कुशल अऊर भलायी कभी नहीं चाहजो। 7“कोयी एदोमी सी घृना मत करजो, कहालीकि ऊ तोरो भाऊ आय; कोयी मिस्री सी भी घृना मत करजो, कहालीकि तय ओको देश म परदेशी बन क रहत होतो। 8उन्को बच्चा, जो तीसरी पीढ़ी म पैदा होयेंन, हि परमेश्वर की सभा म आनो पायेंन।”

9“जब तय दुश्मनों सी लड़न ख डेरा डालजो, तब सब तरह की बुरायी सी अपनो ख दूर रखजो। 10यदि तोरो बीच कोयी आदमी जो सपनो दोष सी अशुद्धता को वजह अशुद्ध भयो हय, त ऊ डेरा सी बाहेर जायेंन, अऊर छावनी को अन्दर नहीं आये; 11पर शाम को पहले नहायेंन, अऊर जब सूरज डुबेंन तब छावनी म आय सकेंन।

12“तय डेरा को बाहेर पीशाब की जागा बनाजो, अऊर पीशाब लायी उतच जायो करजो; 13अऊर तोरो जवर को हथियारों म पावड़ा भी रखजो। जब तय मल करन डेरा को बाहेर जाजो तब फावड़ा सी माटी खोदजो अऊर अपनो मल ख झाक देजो। 14कहालीकि तोरो परमेश्वर तोख बचावन अऊर तोरो दुश्मनों ख तोरो सी हरावन लायी तोरो डेरा को बीच म घुमतो रहेंन, येकोलायी तोरो डेरा पवित्र रहनो चाहिये, असो नहीं हो कि ऊ तोरो बीच म कोयी अशुद्ध चीज देख क तोरो सी फिर जायेंन।”

दूसरो नियम

15“जो दास अपनो स्वामी को जवर सी भग क तोरी शरन म आयेंन, ओख उन्को स्वामी को जवर लौटान लायी विवश मत करजो। 16ऊ तोरो संग, तोरो बीच म रहेंन। जो जागा तोरो नगर म ऊ चुनेंन, वा जागा ओख पसंद आयेंन, ऊ उतच रूकेंन। तय ओको पर अत्याचार मत करजो।”

17“इस्राएली बेटियों म सी अऊर कोयी देवदासी नहीं होय, अऊर नहीं इस्राएलियों म सी कोयी आदमी असो गलत काम करन वालो होना। 18तय वेश्यापन की कमायी यां कुत्ता की कमायी कोयी मन्नत ख पूरी करन लायी अपनो परमेश्वर यहोवा को घर म लायजो; कहालीकि तोरो परमेश्वर यहोवा को जवर हि दोयी कमायी घृणित हय।”

19“अपनो कोयी इस्राएली भाऊ ख, चाहे रुपया यां खान की चीज यां कोयी गिरवी रखन की चीज, पर ब्याज मत लेजो। 20तय परदेशी ख ब्याज पर पैसा त देजो, पर अपनो कोयी भाऊ सी असो मत करजो, ताकी जो देश को हक्कदार होन ख तय जाय रह्यो हय, वहां जो जो काम म अपनो हाथ लगाजो ऊ सब काम म तोरो परमेश्वर तोख आशीर्वाद देंन।”

21“जब तय अपनो परमेश्वर लायी मन्नत मानजो, त ओख पूरी करनो म देर मत करजो; कहालीकि तोरो परमेश्वर तोरो सी लेखा लेन, अऊर देर करन सी तय पापी ठहरजो। 22पर यदि तय मन्नत मानतो च नहीं, त तोरो कोयी पाप नहाय। 23जो कुछ तोरो मुंह सी निकलेंन ओख पूरो करनो म सावधानी करजो; तय अपनो इच्छा सी अपनो परमेश्वर यहोवा लायी मन्नत मानी हय, त ओख जरूर पूरी करजो।”

24“जब तय कोयी को बगीचा म जाजो, तब पेट भर खा सकय, पर अपनी टोकनी म कुछ मत रखजो। 25अऊर जब तय कोयी दूसरो को खेत म जाजो, तब तय हाथ सी लोम्बा तोड़ सकय हय, पर तय दूसरो को खेत सी लिजान लायी हसिया सी मत काटजो।”