व्यवस्थाविवरन 24

तलाक अऊर फिर सी बिहाव

1“यदि कोयी आदमी कोयी बाई सी बिहाव कर लेन, अऊर ओको बाद ओको म कुछ लज्जा की गुप्त बात दिखय हय, अऊर ओकोसी खुश नहाय, त ऊ छोड़-चिट्ठी दे क अपनो घर सी निकाल दे। 2अऊर जब ऊ ओको घर सी निकल जायेंन, तब दूसरो आदमी की पत्नी होय सकय हय। 3पर यदि वा दूसरो आदमी ख भी पसंद नहाय, तब ऊ ओख छोड़-चिट्ठी दे क ओख अपनो घर सी निकाल दे, यां ऊ आदमी जेन अपनी पत्नी बनाय लियो होना मर जाये। 4त ओको पहलो पति, जेन ओख अपनो घर सी निकाल दियो होतो, फिर सी ओख अपनी पत्नि नहीं बनाय सकय। ओको अशुद्ध होन सी ऊ ओख नहीं स्विकारेंन, कहालीकि यो परमेश्वर को आगु घृणित काम हय। असो तरह तय ऊ देश ख जेक तोरो परमेश्वर यहोवा तोरो भाग कर क् तोख देवय हय पाप को भागीदार मत बनायजो।”

दूसरो नियम

5“जो आदमी को नयो-नयो बिहाव भयो हय, ऊ सेना को संग मत जाये अऊर कोयी जवाबदारी ओको पर मत डालो; ऊ साल भर रह क अपनी पत्नी ख खुश रखेंन।”

6करजा देन वालो करजा लेन वालो सी गिरवी म “चक्की ख यां ओको ऊपर को पाट ख गिरवी नहीं रखे; कहालीकि असो करनो मानो ओकी जान ख गिरवी रखनो हय।”

7“यदि इस्राएली समाज म सी कोयी अपनो भाऊवों ख गुलाम बनान यां बिकन को बिचार सी अपहरन करतो हुयो पकड़्यो जाय, त असो चोर ख मार डाल्यो जाये; असी बुरायी ख अपनो बीच म सी दूर करजो।”

8“कोढ़ रोग लग जानो पर सावधान रहजो, अऊर जो कुछ लेवीय याजक तुम्ख सिखायेंन ओकोच अनुसार काम करजो। जसो मय न लेवीय याजक ख आज्ञा दी होती वसोच करजो। 9याद रख कि तोरो परमेश्वर यहोवा न, जब तुम्ख मिस्र म सी निकल क आय रह्यो होतो, तब रस्ता म मिर्याम सी का करयो।”

10“जब तय अपनो कोयी भाऊ ख कुछ उधार दे, तब गिरवी लायी कोयी चीज लावन ओको घर म मत जाजो। 11तय बाहेर खड़ो रहजो, अऊर जेख तय उधार देजों उच गिरवी की चीज तोरो जवर बाहेर ले आयेंन। 12अऊर यदि ऊ आदमी गरीब होना, त ओको गिरवी म रखी चिजें अपनो जवर रख क मत सोयजो; 13जब शाम होन लगेंन तब हर शाम ख ओकी चादर लौटात जाजो, जेकोसी ऊ रात म चादर ओढ़ क सोय सकेंन अऊर तोख आशीर्वाद देंन; अऊर यो तोरो परमेश्वर यहोवा की नजर म न्याय प्रिय मान्यो जायेंन।”

14“कोयी मजूर जो गरीब अऊर कंगाल हय, चाहे ऊ तोरो भाऊवों म सी आय यां तोरो शहर को रहन वालों परदेशी आय, ओको पर अत्याचार मत करजो; 15यो जान क, कि ऊ गरीब हय अऊर ओको मन मजूरी म लग्यो रह्य हय, त मजूरी करन कोच दिन शाम सी पहले तय ओकी मजूरी दे देजो; असो न होय कि ऊ तोरो वजह परमेश्वर सी दु:ख को रोना बताये, अऊर तय पापी ठहरजो।”

16“बेटा को वजह बाप ख मरन की सजा नहीं देजो, अऊर नहीं बाप को वजह बेटा ख; जेन पाप करयो हय उच अपनो पाप को वजह मार डाल्यो जाये।”

17“कोयी परदेशी यां अनाथ को न्याय मत बिगाड़जो, अऊर करजा को बदला म कोयी विधवा को कपड़ा ख गिरवी मत रखजो।” 18अऊर याद रखजो कि तय मिस्र म गुलाम होतो, अऊर तोरो परमेश्वर यहोवा न तोख वहां सी छुड़ायो हय, येकोलायी यो काम करन लायी अज मय तोख या आज्ञा देऊ हय।

19“जब तय अपनो फसल काटजो, अऊर एक बोझा खेत म भूल सी रह्य जायेंन, त ओख लेन लायी फिर मत जाजो; ऊ परदेशी, अनाथ, अऊर विधवा लायी रहन देजो; येकोलायी कि परमेश्वर यहोवा तोरो सब काम म तोख आशीर्वाद देंन। 20जब तय अपनो झाड़ सी फल ख झाड़जो, तब डगाली म कुछ फर रह जाये त ओख दूसरी बार मत झाड़जो; ऊ परदेशी, अनाथ, अऊर विधवा लायी छोड़ देजो। 21जब तय अपनी अंगूर की बाड़ी सी फर तोड़जो, तब दूसरी बार ओको दाना-दाना तक मत तोड़जो; ऊ परदेशी, अनाथ, अऊर विधवा लायी छोड़ देजो। 22अऊर याद रखजो कि तय मिस्र देश म गुलाम होतो; येकोलायी मय तोख यो आज्ञा देऊ हय।”