व्यवस्थाविवरन 25

1“यदि दोय आदमियों को बीच कोयी झगड़ा हय, त न्याय करावन लायी न्यायियों को जवर जायेंन, हि उन्को न्याय करेंन, निर्दोष ख निर्दोष अऊर दोषी ख दोषी ठहरायेंन। 2अऊर दोषी मार खान को लायक हय, त न्यायी ओख गिराय क अपनो आगु जसो ओको दोष अनुसार जमीन पर गिराय क कोड़ा सी मारेंन। 3चालीस कोड़ा सी ऊपर कोयी ख भी नहीं मार सकय हय, येकोसी जादा मारनो सी ओको जीव तोरो नजर म मुल्यवान नहाय असो ओको मतलब ठहरेंन।”

4“चुरना करतो समय बईल को मुंह मुस्का मत बान्धो।”

मरयो हुयो भाऊ को प्रति जवाबदारी

5“जब भाऊवों एक म रह्य हय, अऊर उन म सी एक भाऊ बिना सन्तान को मर जाय, त ओकी विधवा पत्नी को बिहाव परिवार को बाहेर को आदमी सी नहीं करयो जायेंन। पर ओको मरयो पति को भाऊ को अधिकार को अनुसार ओको सी बिहाव करेंन।” 6अऊर जो पहिलो बेटा वा बाई सी पैदा होयेंन, ओको सीच मरयो हुयो भाऊ को नाम चलेंन, जेकोसी ओको नाम इस्राएल म सी नहीं मिटेंन। 7यदि मरयो हुयो भाऊ ख वा विधवा बाई स्वीकार नहाय, त वा बाई नगर को चौक पर बुजूर्ग लोगों को जवर जाय क कहेंन, मोरो पति को भाऊ न अपनो भाऊ को नाम इस्राएल म बनायो रखनो सी मना कर दियो हय, अऊर मोरो देऊर मोरो सी पति-धर्म को पालन करनो नहीं चाहवय। 8तब ऊ नगर को बुजूर्ग लोग ओको देऊर ख बुलाय क ओख समजायेंन, अऊर यदि ऊ अपनी बात पर अड़्यो रहेंन, अऊर कहेंन, मोख येकोसी बिहाव करनो नहीं भावय, 9त ओकी भाऊ की पत्नि, भाभी बुजूर्ग लोगों को जवर जाय क ओको पाय सी चप्पल उतारेंन अऊर ओको मुंह पर थूकेंन। अऊर कहेंन, “असो च व्यवहार ऊ आदमी को संग करयो जायेंन जो अपनो मरयो भाऊ को घर नहीं बसायेंन।” 10“तब इस्राएल म ऊ आदमी को यो नाम लियो जायेंन, चप्पल उतारयो गयो आदमी को घराना।”

दूसरो नियम

11“यदि दोय आदमी आपस म मारपीट म सी एक की पत्नी अपनो पति ख छुड़ान लायी जाय, अऊर अपनो पति को मदत लायी दूसरो को नाजुक गुप्तांक भाग ख ताकत सी दबाय दे। 12त वा बाई को हाथ काट डालजो; ओको पर तरस मत करजो।”

13“अपनी झोला म दोय तरह को, कम जादा वालो बट मत रखजो। 14अपनो घर म दो तरह को नाप, एक बड़ो त दूसरो छोटो मत रखजो। 15तोरो बट अऊर नाप पूरो ठीक अऊर सही होना चाहिये, येकोलायी कि जो देश तोरो परमेश्वर यहोवा तोख देवय हय उन्म तोरी उमर बहुत हो। 16कहालीकि असो काम म बेईमानी करय हय, हि सब तोरो परमेश्वर यहोवा की नजर म बुरो हय।”

अमालेकियों ख सर्वनाश करन की आज्ञा

17“याद रख कि जब तय मिस्र सी आय रह्यो होतो तब अमालेकियों न तोरो सी रस्ता म का करयो। 18मतलब उन्ख परमेश्वर को डर नहीं होतो; योच कारण ओन जब तय रस्ता म थक्यो होतो, तब तोरो पर लड़ाई कर क् जितनो कमजोर होन को वजह सब सी पीछू होतो उन सब ख मारयो। 19येकोलायी जब तोरो परमेश्वर ऊ देश म जो तोरो भाग कर क् तोरो अधिकार म कर देवय हय, तोख चारयी तरफ को सब दुश्मन सी आराम देंन, तब अमालेकियों को नाम धरती पर सी मिटाय डालजो, अऊर तुम या बात ख मत भूलजो।”