व्यवस्थाविवरन 26

पहली फसल को अर्पन

1“फिर जब तय ऊ देश म जेक तोरो परमेश्वर यहोवा तोरो निजी हिस्सा कर क् तोख देवय हय पहुंच्यो, अऊर ओको हकदार होय क ओको म बस जायेंन, 2तब जो देश तोरो परमेश्वर यहोवा तोख देवय हय, ओकी जमीन की हर एक अलग-अलग तरह की उपज तय अपनो घर लायजो, ओको म सी कुछ टोकनी म ले क वा जागा पर जाजो, जेक तोरो परमेश्वर यहोवा अपनो नाम को निवास कर क् चुन्यो हय। 3अऊर ऊ दिन को याजक को जवर जाय क यो कहजो, मय अज तोरो परमेश्वर यहोवा को आगु घोषित करू हय, कि परमेश्वर न हम लोगों ख जो देश ख देन लायी हमरो पूर्वजों सी कसम खायी होती उन्म मय आय गयो हय।

4“तब याजक तोरो हाथ सी वा टोकनी ख ले क तोरो परमेश्वर यहोवा की वेदी को आगु रख देंन। 5तब तय अपनो परमेश्वर यहोवा सी असो कहजो, मोरो पुर्वज अरामी आदमी होतो जो कम होतो; अऊर ऊ अपनो छोटो सो परिवार संग मिस्र ख गयो होतो, अऊर वहां परदेशी होय क रह्यो, अऊर उत ओको सी एक बड़ी, अऊर सामर्थी, अऊर बहुत आदमियों सी भरी हुयी जाति पैदा भयी। 6अऊर मिस्रियों न हम लोगों सी बुरो बर्ताव करयो, अऊर हम दु:ख दियो, अऊर हम सी कठिन काम करवायो। 7पर हम न अपनो पूर्वजों को परमेश्वर यहोवा ख अपनो पुकारयो, अऊर परमेश्वर न हमरी सुन क हमरो मेहनत अऊर कठिन कामों पर नजर करी। 8अऊर परमेश्वर न अपनो सामर्थ अऊर ताकतवर हाथ सी अति भयानक चिन्ह अऊर चमत्कार दिखाय क हम ख मिस्र देश सी निकाल क लायो। 9अऊर हम्ख यो जागा पर पहुंचाय क यो देश दियो हय जित दूध अऊर शहेद की धारा बहय हय। 10अब हे परमेश्वर, देख, जो जमीन तय न मोख दी हय ओकी पहली फसल मय तोरो जवर लायो हय। तब तय ओख अपनो परमेश्वर यहोवा को आगु रखजो; अऊर दण्डवत् करजो। 11अऊर जितनो अच्छी चीज तोरो परमेश्वर यहोवा तोख दी हय अपनो परिवार, लेवियों अऊर तोरो बीच म रहन वालो परदेशियों को संग तय खुशी मनाजो।”

12“तीसरो साल जो दशमांश देन को साल ठहरयो हय, जब तय अपनी सब तरह को दशमांश ख निकाल लेजो, तब ओख लेवीय, परदेशी, अनाथ अऊर विधवा ख देजो, कि हि तोरो फाटकों को अन्दर खाय क तृप्त होय जावो। 13अऊर तय अपनो परमेश्वर सी कहजो, मय न तोरी सब आज्ञावों को अनुसार पवित्र ठहरायी हुयी चीज ख अपनो घर सी निकाल्यो, अऊर लेवीय, परदेशी, अनाथ, अऊर विधवा ख दे दियो हय, तोरी कोयी आज्ञा ख मय न नहीं त टाल्यो हय, अऊर नहीं भूल्यो हय। 14उन चिजों म सी मय न शोक को समय नहीं खायो, अऊर न उन म सी कोयी चिज अशुद्धता की हुयी चिज घर सी निकाली, अऊर न कुछ शोक करन वालों ख दियो, मय न अपनो परमेश्वर यहोवा की सुनी, मय न तोरी सब आज्ञावों को अनुसार करयो हय। 15तय स्वर्ग सी, जो तोरो पवित्र निवास आय, नजर कर क् अपनी प्रजा इस्राएल ख आशीर्वाद दे, अऊर यो दूध अऊर शहेद की धारावों को देश की जमीन पर आशीर्वाद दे, जेख तय न हमरो पूर्वजों सी कसम खाय क हम्ख दियो हय।”

परमेश्वर की निजी प्रजा

16“अज को दिन तोरो परमेश्वर तोख यो विधियों अऊर नियमों ख मानन कि आज्ञा देवय हय; येकोलायी अपनो पूरो मन अऊर जीव सी इन ख माननो म सावधानी करजो। 17तय न अज अपनो प्रभु ख अपनो परमेश्वर मान क यो वचन दियो हय, कि मय तोरो बतायो हुयो तोरी विधियों, आज्ञावों, अऊर नियमों को पालन करूं, अऊर तोरी सुनूं। 18अऊर परमेश्वर न अज तोख अपनो वचन को अनुसार खास प्रजा अऊर धन-सम्पत्ति मान्यो हय, कि तय ओकी सब आज्ञावों ख मानेंन। 19ऊ तुम्ख सब देशों सी महान बनाय देंन। अऊर ओकी नाम की प्रशंसा, आदर करेंन। अऊर तय उन्को वचन को अनुसार अपनो परमेश्वर यहोवा की पवित्र प्रजा बन्यो रहो जसो ओन वादा करयो होतो।”