व्यवस्थाविवरन 27

गोटा पर लिख्यो हुयो नियम

1फिर इस्राएल को बुजूर्गों को संग मूसा न लोगों ख यो आज्ञा दी, “जितनी आज्ञाये मय अज तुम्ख देऊं, उन सब ख पालन करजो। 2अऊर जब तुम यरदन नदी पार कर ऊ देश म पहुंच्यो, जो तोरो परमेश्वर यहोवा तोख देवय हय, तब बड़ो-बड़ो गोटा खड़ो कर लेजो, अऊर उन पर चूना पोतजो; 3अऊर पार होन को बाद ऊ गोटा पर यो आज्ञा को पूरो वचन लिख लेजो, येकोलायी कि जो देश तोरो पूर्वजों को परमेश्वर अपनो वचन को अनुसार तोख देवय हय, अऊर जेको म दूध अऊर शहेद की धाराये बहय हय, ऊ देश म तय जाजो। 4फिर जो गोटा को विषय म मय न आज्ञा दी हय, ओख तुम यरदन को पार जाय क एबाल पहाड़ी पर खड़ो करजो, अऊर उन पर चूना पोतजो। 5अऊर उत अपनो परमेश्वर यहोवा लायी गोटा की एक वेदी बनाजो, ओको पर कोयी अवजार मत चलाजो। 6अपनो परमेश्वर यहोवा लायी गोटा सी एक वेदी बनायजो ओख पर परमेश्वर लायी होमबलि चढ़ायजो; 7अऊर उतच मेलबलि भी चढ़ाय क खाना खाजो, अऊर सब जन अपनो परमेश्वर यहोवा को आगु खुशी मनायजो। 8अऊर ऊ गोटा पर यो व्यवस्था को सब वचनों ख साफ-सुतरो रीति सी लिख लेजो।” 9फिर मूसा अऊर लेवियों याजकों न सब इस्राएलियों सी यो भी कह्यो, “हे इस्राएल, चुप रह क सुन; अज तय अपनो परमेश्वर यहोवा की प्रजा बन गयो हय। 10येकोलायी अपनो परमेश्वर यहोवा की बात मानजो, अऊर ओकी जो जो आज्ञा अऊर विधि मय अज तोख देऊ हय ओको पालन करजो।”

श्राप को वचन

11फिर ऊ दिन मूसा न प्रजा को लोगों ख या आज्ञा दी, 12“जब तुम यरदन पार जावो तब शिमोन, लेवी, यहूदा, इस्साकार, यूसुफ, अऊर बिन्यामीन, हि गिरिज्जीम पहाड़ी पर खड़ो होय क आशीर्वाद सुनायें।” 13अऊर रूबेन, गाद, आशेर, जबूलून, दान, अऊर नप्ताली, एबाल पहाड़ी पर खड़ो होय ख श्राप सुनायें। 14तब लेवी लोग सब इस्राएली आदमियों सी पुकार क कह्यो :

15श्रापित हय ऊ आदमी जो कोयी मूर्ती कारीगर सी खुदवाय क यां साचा म ढाल क गोटा, लकड़ी यां धातु सी बनाय क कहीं स्थापित करय, त असो कारीगर परमेश्वर को नजर म बुरो हय। तब सब लोग कहेंन, आमीन!

16अपनो माय-बाप को अपमान करन वालो श्रापित हय। तब सब लोग कहेंन, आमीन!

17जो कोयी दूसरो की जमीन को निशान हटान वालो श्रापित हय। तब सब लोग कहेंन, आमीन!

18जो अन्धा ख रस्ता सी भटकाय देवय ऊ श्रापित हय। तब सब लोग कहेंन, आमीन!

19जो परदेशी, अनाथ, यां विधवा को न्याय बिगाड़य ऊ श्रापित हय। तब सब लोग कहेंन, आमीन!

20जो अपनी सौतेली माय सी कुकर्म करन वालो ऊ श्रापित हय, कहालीकि ऊ अपनो बाप की ओढ़ना उघाड़य हय। तब सब लोग कहेंन, आमीन!

21जो कोयी भी जनावर सी कुकर्म करन वालो ऊ श्रापित हय। तब सब लोग कहेंन, आमीन!

22जो अपनी बहिन, चाहे सगी यां सौतेली, सी कुकर्म करे। तब सब लोग कहेंन, आमीन!

23जो अपनी सासु को संग कुकर्म करे ऊ श्रापित हय। तब सब लोग कहेंन, आमीन!

24जो कोयी ख लूक क मारन वालो ऊ श्रापित हय। तब सब लोग कहेंन, आमीन!

25जो निर्दोष आदमी ख मार डालन लायी पैसा लेवय ऊ श्रापित हय। तब सब लोग कहेंन, आमीन!

26जो या व्यवस्था को वचनों ख मान क पूरो नहीं करय ऊ श्रापित हय। तब सब लोग कहेंन, आमीन!