व्यवस्थाविवरन 28

आशीष वचन

(लैव्यव्यवस्था २६:३-१३; व्यवस्थाविवरन ७:१२-२४)

1“यदि तय अपनो परमेश्वर की पूरी आज्ञाये, जो मय अज तोख सुनाऊ हय, ध्यान सी मन लगाय क ओकी सुनजो, त ऊ तोख धरती को पूरो देश म महान करेंन। 2फिर अपनो परमेश्वर यहोवा की सुनन को वजह यो पूरो आशीर्वाद तोख मिलेंन। 3धन्य हय तय नगर म, अऊर खेत म। 4धन्य हो तोरी सन्तान , अऊर तोरी जमीन की फसल, अऊर गाय-बईल अऊर शेरी-मेंढी अऊर बच्चां। 5तोरी टोकनी अऊर तोरी आटा गूथन को परात पर आशीर्वाद हो। 6धन्य हय अन्दर आतो समय, धन्य हय अऊर बाहेर जातो समय तोरो पर आशीर्वाद हो।”

7“परमेश्वर असो करेंन कि तोरो दुश्मन जो तोरो पर चढ़ायी करेंन त तोरो सी हार जायेंन; ऊ एक रस्ता सी तोरो पर चढ़ायी करेंन, पर तोरो आगु सी सात रस्ता सी होय क भग जायेंन। 8तोरो कोठरियों पर अऊर जितनो काम म तय हाथ लगायजो ऊ सब पर परमेश्वर तोख आशीर्वाद देंन अऊर जो देश तोरो परमेश्वर यहोवा तोख देवय हय उन्म भी आशीर्वाद देंन। 9यदि तय अपनो परमेश्वर यहोवा की आज्ञावों को पालन करतो हुयो ओको रस्ता पर चलजो, त ऊ अपनी वाचा को अनुसार तोख अपनी प्रजा कर क् मजबूत करेंन। 10अऊर धरती को सब लोग यो देख क, कि तय परमेश्वर को कहलायो हय, तोरो सी डर जायेंन। 11अऊर जो देश को बारे म परमेश्वर न तोरो पूर्वजों सी कसम खाय क तोख देन ख कह्यो होतो, उन्म ऊ तोरी सन्तान ख, अऊर तोरी खेत को फसल अऊर जनावरों की बढ़ती कर क् तोरी भलायी करेंन। 12परमेश्वर तोरो लायी अपनो आशमानरूपी उत्तम भण्डार ख खोल क तोरी जमीन पर पानी बरसायेंन; अऊर तोरो काम-धन्दा पर आशीर्वाद देयेंन। तय बहुत देश ख करजा देयेंन, पर कोयी सी तोख करजा नहीं लेनो पड़ेंन। 13अऊर परमेश्वर तोख पूछी नहीं, पर मुंडच ठहरायेंन, अऊर तय खल्लो नहीं , पर ऊपरच रहेंन, यदि परमेश्वर यहोवा कि आज्ञा जो मय तोख अज सुनाऊ हय ओख मानन म मन लगाय क सावधानी करे; 14अऊर जिन वचन की मय तोख आज्ञा देऊ हय, ओको सी कोयी दायो यां बायो मुड़ क दूसरो देवतावों को पीछू मत जाजो, अऊर नहीं ओकी उपासना करजो।”

आज्ञा उल्लंघन को दुष्परिनाम

(लैव्यव्यवस्था २६:१४-४६)

15“पर यदि तय अपनो परमेश्वर यहोवा की बात नहीं सुनजो, अऊर ओकी पूरी आज्ञावों अऊर विधियों को पालन नहीं करजो, त यो श्राप तोरो पर आय जायेंन। 16मतलब श्रापित होजो तय नगर म, श्रापित होजो तय खेत म। 17श्रापित हो तोरी टोकनी अऊर तोरो चुन को परात। 18श्रापित हो तोरी सन्तान, अऊर जमीन की फसल, अऊर गाय अऊर शेरी-मेंढी को बच्चां। 19श्रापित हय तय अन्दर आतो समय, अऊर श्रापित हय तय बाहेर जातो समय।”

20“फिर जो जो काम म तय हाथ लगाजो, ओको म परमेश्वर तब तक तोख श्राप देंन, अऊर उलझन म डालय हय, अऊर डाट देतो रहेंन, जब तक तय नाश नहीं होय जाय, योच वजह कि तय परमेश्वर ख छोड़ क बुरो काम करन लग्यो। 21अऊर परमेश्वर असो करेंन कि मरी तोरो म फैल क ऊ समय तक लगी रहेंन, जब तक जो जमीन को अधिकारी होन लायी तय जाय रह्यो हय ओको पर सी तोरो अन्त नहीं होय जायेंन। 22परमेश्वर तोख क्षयरोग, बुखार, जलन, तलवार, लू, हवा को झोका सी मारेंन; अऊर हि ऊ समय तक तोरो पिछा करेंन, जब तक तोरो सत्यानाश नहीं होय जायेंन। 23अऊर तोरो मुंडी को ऊपर आसमान पीतल को, अऊर तोरो पाय को खल्लो जमीन लोहा की जसो कड़क बन जायेंन। 24परमेश्वर तोरो देश म पानी को बदला रेतु अऊर धूल बरसायेंन; ऊ आसमान सी तोरो पर असो बरसेंन कि तोरो सत्यानाश होय जायेंन।”

25“परमेश्वर तोख दुश्मनों सी हरायेंन; अऊर तय एक रस्ता सी उन्को सामना नहीं कर पाजो, पर सात रस्ता सी होय क उन्को आगु सी भग जायेंन; अऊर तोरो संग जो होय रह्य हय यो देख क धरती पर सब राज्यों म दर-दर भटकजो। 26अऊर तोरी लाश आसमान को पक्षियों , अऊर धरती को जंगली जनावर खायेंन; अऊर उन्ख कोयी खेदन वालो नहीं रहेंन। 27परमेश्वर तोख मिस्र को फोड़ा, मुर्याद, दाद, अऊर खुजली सी असो परेशान करेंन , कि तय चंगो नहीं होय सकजो। 28तोख पागल अऊर अन्धा कर देंन, अऊर तोरो मन ख बहुत घबराय देंन। 29अऊर अन्धा को जसो तुम भी दिन म टटोलतो रहो, अऊर तोरो काम-काज सफल नहीं होयेंन; अऊर तय हमेशा अन्धारो म रहेंन अऊर लुटतो रहेंन, अऊर तोरो कोयी मदत करन वालो नहीं रहेंन। 30तय बाई सी बिहाव की बात चलायजो, पर दूसरो ओख भ्रष्ट करेंन, घर तय बनायेंन, पर ओको म तय रहनो नहीं पायेंन; बगीचा तय लगायेंन, पर ओको फल तय नहीं खाय सकेंन। 31तोरो बईल तोरी आंखी को आगु मरयो जायेंन, पर तय ओको मांस नहीं खाय सकेंन; तोरो गधा तोरो आगु सी लूट लेन, अऊर तोख वापस नहीं मिलेंन; तोरी शेरी-मेंढी तोरो दुश्मनों को हाथ लग जायेंन अऊर तोरी कोयी मदत नहीं करेंन। 32तोरो बेटा-बेटियां दूसरो देश को लोगों को हाथ म लग जायेंन, अऊर उन्को देखन लायी तोरी आंखी थक जायेंन; अऊर तोरो कुछ बस नहीं चलेंन। 33तोरी जमीन की फसल अऊर तोरी पूरी कमायी एक अनजान देश को लोग हड़प लेयेंन, अऊर तय केवल बर्बाद अऊर कुचल्यो जायेंन। 34जो नाश तोख देखन म आयेंन ओकोसी तोरो दिमाक पगलाय जायेंन। 35परमेश्वर तोरो घुटना अऊर टांगो म, बल्कि नख सी ले क मुंड को बाल तक फोड़ा निकल क तोख परेशान करेंन।”

36“परमेश्वर तोख अऊर तोरो राजा ख असो देश म ले जायेंन जेख तय अऊर तोरो पूर्वजों नहीं जानय। असो एक अनजान देश म पहुचायेंन; अऊर उन्को बीच म रह क तय लकड़ी अऊर गोटा को देवता की उपासना करेंन। 37अऊर उन देशों म जिन्को बीच म परमेश्वर तोख पहुचायेंन, उत को लोगों को बीच तय कहावत अऊर मजाक को कारन बन जायेंन। 38तय खेत म बीज त बहुत बोयजो, पर फसल थोड़ी च काटेंन, कहालीकि टिड्डियां ओख खाय जायेंन। 39तय बगीचा लगाय क ओको म काम त करजो, पर ओको फर रस पी नहीं सकजो, पर फर नहीं तोड़ सकजो; कहालीकि कीड़ा उन्ख खाय जायेंन। 40तोरो पूरो देश म जैतून को झाड़ त लगायेंन, पर उन्को तेल तय अपनो शरीर म नहीं लगाय सकजो; कहालीकि हि झड़ जायेंन। 41तोरो बेटा-बेटियां त पैदा होयेंन, पर तोरो नहीं रहेंन; कहालीकि हि बन्धुवायी म चली जायेंन। 42तोरो सब झाड़ अऊर तोरी जमीन की फसल टिड्डियां खाय जायेंन। 43जो परदेशी तोरो बीच म रहेंन ऊ तोरो सी बढ़तो जायेंन; अऊर तय घटतो जायेंन।”

44“ऊ तोख उधार देयेंन, पर तय ओख उधार नहीं दे सकजो; ऊ त मुंड अऊर तय पूछ ठहरजो। 45तय अपनो परमेश्वर की आज्ञावों अऊर विधियां ख नहीं मानेंन, त यो सब श्राप तोरो पीछू पड़्यो रहेंन, जब तक आखिर म तय नाश नहीं होय जायेंन। 46अऊर हि तोरो पर अऊर तोरो वंश पर हमेशा लायी बन्यो चिन्ह अऊर चमत्कार ठहरेंन।”

47“तोरो जवर सब चिजे बहुतायत होन पर भी खुशी अऊर उत्साह को संग अपनो परमेश्वर यहोवा की सेवा नहीं करेंन, 48योच वजह तोख भूखो, प्यासो, नंगा, अऊर सब चिजों सी दूर रह्य क अपनो दुश्मनों कि सेवा करनो पड़ेंन जेख परमेश्वर तोरो खिलाफ भेजेंन; अऊर जब तक तय नाश नहीं होय जाये तब तक ऊ तोरी गर्दन पर लोहा की जुवाड़ी डाल क रखेंन। 49परमेश्वर तोरो खिलाफ दूर सी, धरती को छोर सी एक राष्ट्र ख तोरो पर चढ़ायेंन जेकी भाषा तय नहीं समझजों। जो उड़न वालो उकाब को जसो तेज सी ले आयेंन। 50ऊ देश को व्यवहार कठोर रहेंन, हि नहीं त बूढ्ढा को मुंह देख क आदर करेंन, अऊर नहीं बच्चां पर दया करेंन; 51अऊर हि तोरो जनावर को बच्चा अऊर जमीन की फसल ख नाश कर देयेंन; अऊर हि तोरो लायी खाना, अंगूरीरस, ताजो तेल, बछड़ा, अऊर मेम्ना ख भी नहीं छोड़ेंन, यहां तक कि तय नाश होय जाजों। 52अऊर तोरो परमेश्वर यहोवा न जो जो देश तोख दियो हय, उन पर हि घेर रखेंन; अऊर जो मजबूत शहरपनाह पर तोख भरोसा होतो ओख तोड़ डालेंन। 53तब पूरो तरफ सी घेरेंन तोरो दुश्मन तोख यातना देयेंन, कि भूख सी तय अपनो निज पैदा भयो बेटा-बेटियों ख खायेंन जेक तोरो परमेश्वर यहोवा न दियो होतो। 54अऊर तोरो म जो आदमी कोमल अऊर संवेदनशिल हय ऊ भी अपनो भाऊ, अऊर अपनो प्रिय बच्यो बच्चा ख कठोर नजर सी देखेंन। 55अऊर ऊ ओको म सी कोयी ख अपनो बच्चा को मांस म सी जो ऊ खायेंन ओको म सी दूसरो ख कुछ नहीं देंन, कहालीकि घिर जान अऊर संकट म ओको जवर कुछ नहीं रहेंन। 56अऊर तोरो म जो बाई यहां तक कोमल अऊर संवेदनशिल हय कि जमीन पर पाय धरन सी भी डरय हय, वा भी अपनो प्रिय पति, अऊर बेटा, अऊर बेटी पर भी कठोर नजर डालेंन। 57अपनो जन्यो हुयो बच्चां ख कठोर नजर सी देखेंन, कहालीकि घिर जान को समय तोरो दुश्मन तोख तोरो फाटक को अन्दर घेर क रखेंन, भूख की यातना को मारे अपनो बच्चां ख छिप क खायेंन।”

58“यदि तय या व्यवस्था को पूरो वचन को पालन करन म, जो या किताब म लिख्यो हय, सावधानी कर क् ऊ आदरनिय अऊर डर लायक नाम को, जो यहोवा तोरो परमेश्वर को हय भय नहीं माने, 59त परमेश्वर तोख अऊर तोरो वंश पर अनोखी महामारी भेजेंन, अऊर असाध्य रोग सी बीमार करेंन। 60अऊर ऊ मिस्र को उन सब रोग ख फिर सी तोरो पर लाय देंन, जेकोसी तय डरत होतो।” 61अऊर जितनो रोग हर तरह की, महामारी, जेको उल्लेख या व्यवस्था की किताब म नहीं भयो हय, परमेश्वर तोरो पर डालेंन, जब तक तय नाश नहीं होय जायेंन। 62अऊर तय जो अपनो परमेश्वर की नहीं मानजो, येकोलायी आसमान को तारा को जसो बहुत होन पर भी तोरो म थोड़ोच आदमी रह जायेंन। 63अऊर जसो परमेश्वर ख तुम्हरी भलायी अऊर बढ़ती करन म खुशी मिलत होती, वसोच अब ओख तुम्हरो नाश करनो म खुशी मिलय हय। जो जमीन पर तय अधिकारी होन जाय रह्यो हय, ओख पर सी तय उखाड़ दियो जायेंन। 64अऊर परमेश्वर तोख धरती की या छोर सी वा छोर तक तितर बितर कर देंन, अऊर उत रह क तय अपनो अऊर अपनो पूर्वजों लायी अनजान लकड़ी अऊर गोटा को देवतावों की उपासना करजो। 65अऊर ऊ देश म तोख कभी चैन नहीं मिलेंन, अऊर नहीं तोरो पाय ख ठिकाना मिलेंन; कहालीकि उत परमेश्वर असो करेंन कि तोरो दिल ख घबरायेंन, अऊर तोरी आंखी धुन्धली पड़ जायेंन, अऊर तोरो मन व्याकुल रहेंन। 66अऊर तय जीवन भर शक को घेरा म रहेंन; अऊर दिन-रात घबरातो रहेंन, अऊर तोरो जीवन को कुछ भरोसा नहीं रहेंन। 67तोरो मन म जो डर बन्यो रहेंन, अऊर तोरी आंखी ख जो कुछ दिखतो रहेंन, ओको वजह तय सुबेरे बोलेंन, “शाम कब होयेंन!” अऊर शाम ख बोलेंन, “सुबेरे कब होयेंन!” 68“अऊर परमेश्वर तोख जहाज पर चढ़ाय क मिस्र म ऊ रस्ता सी लौटाय देंन, जेको बारे म मय न तोरो सी कह्यो होतो, कि ऊ फिर तोरो देखनो म नहीं आयेंन; अऊर वहां तुम अपनो दुश्मनों को हाथ गुलाम होन लायी बिकन ख तैयार त रहेंन, पर तुम्हरो कोयी लोन वालो नहीं मिलेंन।”