व्यवस्थाविवरन 29

मोआब देश म परमेश्वर की वाचा

1इस्राएलियों सी जो वाचा बान्धन की आज्ञा परमेश्वर न मूसा ख मोआब देश म दी ओको योच वचन आय, अऊर जो वाचा ओन ओको सी होरेब पहाड़ी पर बान्धी होती या ओको सी अलग हय। 2तब मूसा न सब इस्राएलियों ख बुलाय क कह्यो, “जो कुछ परमेश्वर न मिस्र देश म तुम्हरो रह्यतो फिरौन अऊर ओको सब काम करन वालो, अऊर पुरो देश को साथ का करयो हय ऊ तुम न देख्यो हय, 3ऊ बड़ी बड़ी परीक्षावों, अऊर चिन्ह, अऊर बड़ो बड़ो चमत्कार तोरी आंखी को आगु भयो हय; 4पर परमेश्वर न अज तक तुम ख न त समझावन की मन, अऊर न देखन को लायी आंखी दी हय, अऊर नहीं सुनन को लायी कान दियो हय। 5परमेश्वर न तुम ख चालीस साल तक यो जंगल म साथ लेक फिरयो; अऊर नहीं तुम्हरो आंग पर कपड़ा झरझरो भयो, अऊर नहीं तोरो जूता तोरो पाय म घस गयो; 6तुम न रोटी नहीं खाय पायो, अऊर न अंगूरीरस अऊर न दारू नहीं पी सक्यो। यो येकोलायी भयो कि तय या बात ख जान्जो कि मय प्रभू तोरोच परमेश्वर आय। 7अऊर जब तुम या जागा पर आयो, तब हेशबोन को राजा सीहोन अऊर बाशान को राजा ओग, यो दोयी युद्ध करन लायी हमरो आगु निकल ख आयो, अऊर हम न ओख जीत क उन्को देश ले लियो। 8अऊर रूबेनियों ,गादियों, अऊर मनश्शे को अरधो वंश को लोगों को निजी हिस्सा कर क् दे दियो। 9येकोलायी या वाचा की बात को पालन करो, ताकि तय जो भी करजो ओको म तय सफल होयजो।”

10“अज तुम्हरो बुजूर्ग लोग मतलब तुम्हरो अगुवा, मुखिया, अधिकारी, अऊर इस्राएल को सब लोग, तोरो परमेश्वर येको आगु खड़ो हय 11का तुम्हरो बाल बच्चा अऊर पत्नियां, का लकड़ी काटन वालो, का पानी भरन वालो, का तोरो डेरा म रहन वालो परदेशी , तुम सब अपनो परमेश्वर यहोवा को आगु येकोलायी खड़ो हय, 12कि जो वाचा तोरो परमेश्वर यहोवा अज तोरो सी बान्धय हय, अऊर जो कसम ऊ अज तोख खिलावय हय, ओको म तय मिल जाजो। 13येकोलायी कि ऊ वचन को अनुसार जो ओन तोख दियो हय, अऊर वा कसम को अनुसार जो ओन अब्राहम, इसहाक, अऊर याकूब, तोरो पूर्वजों सी खायी होती, ऊ अज तोख अपनी प्रजा ठहरायेंन, अऊर तोरो परमेश्वर ठहरेंन। 14तब मय या वाचा अऊर कसम मय तोरोच सी बान्धू हय, 15पर उन्ख भी, जो अज हमरो साथ इत हमरो परमेश्वर यहोवा को आगु खड़ो हय, अऊर जो अज यहां हमरो साथ खड़ो नहाय, साझा करय हय। 16तुम जानय हय की जब हम मिस्र देश म कसो रहत होतो, अऊर हम जो राज्यों म सी होय क जात होतो, ओको म सी हम कसो आयो। 17तब तुम न उन्की कसी घिनौनो चीज, अऊर लकड़ी, गोटा, चांदी, सोना की कसी मूर्ती देखी। 18येकोलायी असो न होय कि तुम लोगों म असो कोयी आदमी, यां बाई, यां कुल, यां वंश को लोग हय जेको मन अज हमरो परमेश्वर यहोवा सी फिर जायेंन, अऊर हि जाय क उन राज्यों को देवतावों की आराधना करेंन; फिर असो न होय कि तुम्हरो बीच असी कोयी जड़ हय, जेकोसी जहेर यां कड़वो बीज उग्यो हय। 19अऊर असो आदमी यो कसम को वचन सुन क अपनो ख आशीष को लायक मानेंन, अऊर यो सोचेंन कि मय अपनो मन को हट पर चलू, अऊर कुशल होय ख प्यास क मिटाय डालूं, तबच मोरो कुशल होयेंन। 20परमेश्वर ओको पाप ख माफ नहीं करय, पर परमेश्वर को गुस्सा अऊर जलन को धुवा ओख छाय लेन, अऊर जितनो कसम को श्राप या किताब म लिख्यो हय हि सब ओको पर आय जायेंन, अऊर परमेश्वर ओको नाम धरती पर सी मिटाय देंन। 21अऊर व्यवस्था की या किताब म जो वाचा की बात हय ओको सब श्राप को अनुसार परमेश्वर ओख इस्राएल को सब वंश म सी विनाश को लायी अलग करेंन। 22अऊर आन वाली वंशों म तुम्हरो वंश को लोग जो तुम्हरो बाद पैदा होयेंन, अऊर परदेशी आदमी भी जो दूर देश सी आयेंन, हि ऊ देश की परेशानी अऊर ओख म, परमेश्वर को फैलायो हुयी बीमारी देखेंन। 23अऊर यो भी देख क कि येकी सब जमीन गन्धक अऊर नमक सी भर गयी हय, अऊर यहां तक जल गयी कि ओको म न कुछ बोय भी नहीं सकय, अऊर न कुछ जम सकय, अऊर न चारा उगेंन, पर सदोम अऊर अमोरा, अदमा अऊर सबोयीम को समान भय गयी हय जेख परमेश्वर न अपनो गुस्सा अऊर जलन म उलट पुलट कर दियो होतो। 24अऊर सब राष्ट्रों को लोग पूछेंन, परमेश्वर न यो देश सी असो कहाली करयो? अऊर यो बड़ो गुस्सा को भड़क न को कारन का आय। 25तब लोग यो जवाब देयेंन, उन्को पूर्वजों को परमेश्वर यहोवा न जो वाचा उन्को साथ मिस्र देश सी निकालन को समय बान्धी होती ओख ओन तोड़्यो हय, 26अऊर दुसरो देवतावों की उपासना करी हय जिन्ख हि पहले नहीं जानत होतो, अऊर परमेश्वर न उन्ख नहीं दियो होतो। 27येकोलायी परमेश्वर को गुस्सा यो देश पर भड़क्यो हय, कि किताब म लिख्यो हुयो सब श्राप येको पर आय पड़े।” 28अऊर परमेश्वर को गुस्सा, अऊर जलजलाहट, अऊर बड़ो गुस्सा कर क् उन्ख उन्को देश म सी उखाड़ क दूसरो देश म फेंक दियो, जसो कि अज प्रगट हय।

29“गुप्त बाते सिर्फ हमरो प्रभु परमेश्वरच जानय हय, पर जो बात बतायी गयी हय, ओख हम अऊर हमरो बालबच्चा हमेशा जानेंन, येकोलायी की यो विधान की सब बात पूरी होय जायेंन।”