व्यवस्थाविवरन 30

आशीष अऊर फिर सी बनावन की शर्ते

1“फिर जब आशीष अऊर श्राप की या सब बात जो मय न तोख सुनायी हय तोरो पर होयेंन, अऊर तय उन सब राष्ट्रों को बीच म रह्य क, जहां तोरो परमेश्वर यहोवा तोख निकाल क तितर-बितर कर देयेंन, या बात ख याद रखजो। 2अऊर अपनो बालबच्चा समेत अपनो सारो मन अऊर पूरो जीव सी अपनो परमेश्वर यहोवा को तरफ फिर क ओको जवर लौट आव, अऊर इन सब आज्ञावों को अनुसार जो मय तोख अज सुनावय हय ओकी बाते माने; 3तब तोरो परमेश्वर यहोवा तोख दूसरो देश सी छुड़ाय ख ले आयेंन, अऊर तोरो पर दया कर क् उन सब देश को लोगों म जिन्को बीच म ऊ तोख तितर-बितर कर देंन फिर तोख जमा करेंन। 4फिर भी धरती को छोर तक तोरो तितर-बितर कर क् पहुंचायो जायेंन, तब भी तोरो परमेश्वर यहोवा तोख वहां सी लाय ख जमा करेंन। 5अऊर तोरो परमेश्वर यहोवा तोख उच देश म पहुंचायेंन जेको तोरो पूर्वजों अधिकारी भयो होतो, अऊर तय फिर ओको हकदार होयजो; ऊ तोरी भलायी करेंन, अऊर तोख तोरो बापदादों सी भी गिनती म जादा बढ़ायेंन। 6अऊर तोरो परमेश्वर तोरो अऊर तोरो वंश को मन को खतना करेंन, कि तय अपनो परमेश्वर यहोवा सी अपनो सारो मन अऊर जीव को साथ प्रेम करजो, जेकोसी तय जीन्दो रह्यजो। 7अऊर तोरो परमेश्वर यहोवा यो सब श्राप ख तोरो दुश्मनों पर डालेंन, जेन तोख सतायो होतो। 8फिर तय मुड़जो अऊर परमेश्वर की सुनजो, अऊर या सब आज्ञावों ख मानजो जो मय तोख अज सुनावय हय। 9अऊर प्रभू परमेश्वर तोरो पुरो काम म, अऊर तोरी सन्तान, अऊर तोरो जनावर को बच्चा, अऊर तोरी खेती की उपज म तोरी बढ़ोतरी करेंन; कहालीकि परमेश्वर फिर तोरो ऊपर भलायी को लायी वसोच खुशी मनायेंन, जसो ओन तोरो पूर्वजों को ऊपर करयो होतो। 10कहालीकि तय अपनो परमेश्वर यहोवा की सुन क ओकी आज्ञावों अऊर विधियों ख जो या व्यवस्था की किताब म लिख्यो हय मानजो, अऊर अपनो परमेश्वर यहोवा की तरफ अपनो सारो मन अऊर जीव सी मन फिरायजो।”

11“देख, या आज्ञा मय अज तोख सुनाऊ हय, ऊ नहीं तोरो लायी कठिन हय, अऊर नहीं तोरी पहुंच सी दूर हय। 12अऊर न त यो आसमान म हय कि तय कहजो, कौन हमरो लायी आसमान पर चढ़ ख ओख हमरो जवर लायेंन, अऊर हम्ख सुनायेंन कि हम ओख मानबो। 13अऊर नहीं या आज्ञा समुन्दर को ओनपार हय कि तय बोल सकजो, कौन हमरो लायी समुन्दर को ओनपार जायेंन, अऊर उत सी हमरो जवर लायेंन कि हम ओख सुन सकबो अऊर ओको अनुसार चल सकबो? 14पर यो वचन तोरो बहुत जवर हय, पर तोरो मुंह अऊर मन म हय, ताकि तय येको पर चलजो।”

15“देख, अज मय न तोख जीवन अऊर मृत्यु, भलायी अऊर बुरायी दिखायी हय। 16कहालीकि मय अज तोख आज्ञा देऊ हय, कि अपनो परमेश्वर यहोवा सी प्रेम करजो, अऊर ओको रस्ता पर चलजो, अऊर ओकी आज्ञावों, विधियों, अऊर नियमों ख पालन करजो, जेकोसी तय जीन्दो रहे, अऊर बढ़तो रहजो, अऊर तोरो परमेश्वर यहोवा ऊ देश म जेको हकदार होन ख तय जाय रह्यो हय, तोख आशीष देंन। 17पर जब तोरो मन भटक जायेंन, अऊर तय नहीं सुने, अऊर भटक क दूसरो देवतावों की दण्डवत करजो अऊर उन्की उपासना करन लगे, 18त मय तुम्ख अज या चेतावनी देऊ हय कि तुम निश्चय मर जावों, अऊर जो देश को हक म करन लायी तय यरदन को पार जाय रह्यो हय, ऊ देश म तय बहुत दिन तक नहीं रह सकय। 19मय अज आसमान अऊर धरती दोयी ख तुम्हरो आगु या बात की गवाही बनावय हय, कि मय न जीवन अऊर मरन, आशीष अऊर श्राप ख तुम्हरो आगु रख्यो हय, येकोलायी कि तय अपनो जीवन ख अपनाय ले, की तय अऊर तोरो वंश दोयी जीन्दो रहेंन। 20येकोलायी अपनो परमेश्वर यहोवा सी प्रेम कर, अऊर ओकी बात मानो, अऊर ओको सी लिपट्यो रह; कहालीकि योच तोरो जीवन को उद्देश आय, अऊर असो करन सी जो देश ख परमेश्वर न अब्राहम, इसहाक अऊर याकूब, तोरो पूर्वजों ख देन की कसम खायी होती ऊ देश म तय बस्यो रहजो।”