व्यवस्थाविवरन 31

यहोशू मूसा को उत्तराधिकारी

1मूसा न जाय क या बात सब इस्राएलियों ख सुनायी। 2अऊर ओन ओकोसी यो भी कह्यो, “अज मय एक सौ बीस साल को हय; अऊर अब मय चल फिर नहीं सकू; कहालीकि यहोवा न मोरो सी कह्यो हय, कि तय या यरदन नदी ख पार नहीं कर सकय। 3तोरो प्रभु परमेश्वर खुद तोरो आगु आगु ओनपार जायेंन; ऊ उन सब राष्ट्रों ख तोरो आगु सी नाश कर देयेंन, अऊर तय उन्को देश को हकदार होयजो; अऊर परमेश्वर को वचन को अनुसार यहोशू तोरो आगु आगु ओनपार जायेंन। 4अऊर जसो परमेश्वर न एमोरियों को राजा सीहोन अऊर ओग अऊर उन्को देश ख नाश करयो हय, वसोच ऊ वा सब राष्ट्रों सी भी करेंन। 5अऊर जब परमेश्वर उन्ख तुम सी हरवाय देयेंन, तब तुम उन पूरी आज्ञावों को अनुसार ओकोसी करजो जो मय न तुम्ख आज्ञा दियो हय। 6तय हिम्मत बान्ध अऊर शक्तिशाली हो, ओकोसी मत डर अऊर न भयभीत मत हो, कहालीकि तोरो साथ चलन वालों तोरो परमेश्वर यहोवा आय, ऊ तोख धोका नहीं देंन अऊर कभी नहीं छोड़ेंन।” 7तब मूसा न यहोशू ख बुलाय क सब इस्राएलियों को आगु कह्यो, “कि तय हिम्मत रख अऊर शक्तिशाली होय जा; कहालीकि इन लोगों को साथ ऊ देश म जेख यहोवा न उन्को पूर्वजों सी कसम खाय क देन ख कह्यो होतो तय जाजो; अऊर तय इन क ओको हकदार कर देयेंन। 8अऊर तोरो आगु आगु चलन वालो परमेश्वर आय; ऊ तोरो साथ रहेंन, अऊर ऊ तोख नहीं छोड़ेंन अऊर न तोख धोका देयेंन, येकोलायी मत डर अऊर तोरो मन कमजोर नहीं होयेंन। 9फिर मूसा न योच नियम लिख क लेवीय याजकों ख, जो यहोवा की वाचा की सन्दूक उठान वालो होतो, अऊर इस्राएल को पूरो बूढ्ढा लोगों क दे दी।”

हर सातवों साल नियम ख पढ़्यो जानो

10तब मूसा न ओख आज्ञा दी, “सात सात साल को बीत जानो पर, मतलब छुटकारा को साल म झोपड़ी को त्यौहार पर, 11जब पूरो इस्राएली तोरो परमेश्वर यहोवा को वा जागा पर जेख ओन चुन लियो आय क जमा होयेंन, तब यो नियम सब इस्राएलियों ख पढ़ क सुनायजो। 12का आदमी, का बाई, का बच्चा, तुम्हरो नगरों को अन्दर को परदेशी, सब लोगों ख जमा करजो कि हि सुन क सीखेंन, अऊर तुम्हरो परमेश्वर यहोवा को डर मान क, यो नियम को पूरो वचनों ख पालन करन म सावधानी करजो, 13अऊर उन्को बच्चा जिन्न या बाते नहीं सुनी हि भी सुन क सीखेंन, कि तुम्हरो परमेश्वर यहोवा को डर ऊ समय तक मानतो रहे, जब तक तुम ऊ देश म जीन्दो रहो जेको हकदार होन ख तुम यरदन को पार जाय रह्यो हय।”

मूसा ख परमेश्वर की आखरी सुचना

14फिर यहोवा न मूसा सी कह्यो, “तोरो मरन को दिन जवर आयो हय; तय यहोशू ख बुलाव, अऊर तुम दोयी मिलाप वालो तम्बू म आय क मौजूद रह्यजो कि मय ओख नियुक्त करू।” तब मूसा अऊर यहोशू जाय क मिलापवालो तम्बू म जमा भयो। 15तब यहोवा न ऊ तम्बू म बादर को खम्बा म आय क दर्शन दियो; अऊर बादर को खम्बा तम्बू को द्वार पर रुक गयो। 16तब परमेश्वर न मूसा सी कह्यो, “तय त मर क बापदादावों सी मिलन वालो हय; अऊर हि लोग उठ क ऊ देश को परायो देवतावों को पीछू, जेको बीच म जाय क रहेंन, व्यभिचारी होय जायेंन, अऊर मोख छोड़ क वा वाचा ख जो मय न बान्धी हय तोड़ देंन। 17ऊ समय मोरो गुस्सा इन्को पर भड़केंन, अऊर मय भी इन्ख छोड़ क इन्को सी अपनो मुंह छुपाय लेऊ, अऊर यो आहार होय जायेंन; अऊर बहुत सी विपत्तियां अऊर तकलिफ उन्को पर आय पड़ेंन, यहां तक कि हि ऊ समय कहेंन, कि यो संकट हमरो पर यो वजह त नहीं आय पड़्यो, कहालीकि हमरो परमेश्वर हमरो बीच म नहाय? 18ऊ समय मय सब बुरायी को कारण जो ऊ दूसरो देवतावों की तरफ मुड़ क करेंन, ऊन को कारण सी मय सही म उन्को सी अपनो मुंह छुपाय लेंऊ। 19येकोलायी अब तय यो गाना लिख लेवो, अऊर तय इस्राएलियों क सिखाय क उन्ख मुंह पाठ कराय देजो, येकोलायी कि यो गीत उन्को खिलाफ मोरी गवाही ठहरेंन। 20जब मय उन्ख ऊ देश म पहुंचाऊं जेख देन की मय न इन्को पूर्वजों सी कसम खायी होती, अऊर जेको म दूध अऊर शहेद की धारा बहय हय, अऊर खात-खात इन्को पेट भर जायेंन, अऊर उन पर चर्बी चढ़ जायेंन; तब हि दूसरो देवतावों को तरफ मुड़ क ओकी उपासना करन लगेंन, अऊर मोरो ख ठुकराय क हि मोरी वाचा ख तोड़ देयेंन। 21पर अभी भी मय न इन्को ऊ देश म जेको विषय म मय न कसम खायी हय, पहुंच्यो नहीं, मोख मालूम हय कि हि का का सोच रह्यो हय, येकोलायी जब बहुत सारो संकट अऊर दु:ख इन्को पर आय पड़ेंन, तब यो गाना ओको पर गवाही देंन, कहालीकि इन्को वंश येख कभी नहीं भूलेंन।” 22तब मूसा न उच दिन ऊ गीत लिख क इस्राएलियों क सिखायो। 23अऊर यहोवा न नून को बेटा यहोशू क या आज्ञा दी, “साहस रख अऊर शक्तिशाली बन, कहालीकि इस्राएलियों क ऊ देश म जेक मय न देन की कसम खायी हय तय पहुंचायेंन; मय खुद तोरो साथ रहूं।” 24जब मूसा या व्यवस्था को वचन को सुरूवात सी आखरी तक किताब म लिख लियो। 25तब ओन परमेश्वर को वाचा को सन्दूक उठान वालो लेवियों ख आज्ञा दी, 26“व्यवस्था की या किताब क ले क अपनो परमेश्वर यहोवा की वाचा को सन्दूक को जवर रख दे, कि वा तुम्हरो खिलाफ गवाही देंन। 27कहालीकि तुम झगड़ा करन अऊर टेढ़ी मान वालों लोग आय जो मोख मालूम हय; देख, मोरो जीन्दो अऊर साथ रह्यतो हुयो भी तुम परमेश्वर सी झगड़ा करतो आयो हय; फिर मोरो मरन को बाद भी कहाली नहीं करजो। 28तुम अपनो वंश को सब बुजूर्ग लोगों अऊर अधिकारी ख मोरो जवर जमा करजो कि मय उन्ख यो वचन सुनाय क उन्को खिलाफ आसमान अऊर धरती दोयी क गवाह बनाऊं। 29कहालीकि मोख पता हय कि मोरी मौत को बाद तुम बिल्कुल बिगड़ जावों, अऊर जो रस्ता पर चलन की आज्ञा मय न तुम्ख सुनायी हय ओख भी तय छोड़ देजो; अऊर आखरी को दिन म जब तुम ऊ काम कर क जो परमेश्वर की नजर म गलत हय, अपनी बनायी हुयी चिजों की पूजा कर ख ओख तुम न गुस्सा दियो, तब तुम्हरो पर संकट आय पड़ेंन।”

मूसा को गीत

30तब मूसा न इस्राएल की पूरी सभा ख यो गीत को वचन सुरूवात सी आखरी तक सुनायो।