व्यवस्थाविवरन 32

1“हे आसमान, कान लगाव, कि मय बोलू,

अऊर हे धरती, मोरो मुंह की बाते ख सुन।

2मोरी शिक्षाये बरसात को समान गिरेंन,

अऊर मोरी बाते ओस को समान टपकेंन,

जसो कि हरी घास पर बरसात को पानी,

अऊर झाड़ पर पानी की गिरनो।

3मय त परमेश्वर को नाम की घोषना करूं।

तुम अपनो परमेश्वर की महिमा ख मानो।”

4“ऊ चट्टान आय, ओको काम सच्चो हय;

अऊर ओकी पूरो रस्ता न्याय को हय।

ऊ सच्चो ईश्वर आय, ओको म कुटिलता नहाय,

ऊ न्यायी अऊर सीधो हय।

5पर यो पीढ़ी को लोग तेड़ो अऊर तिर्छो हय;

हि बिगड़ गयो, हि ओको बच्चा नोहोय;

हि उन्को कलंक आय।

6हे मूर्ख अऊर अनपढ़ लोगों,

का तुम परमेश्वर को बदला देवय हय?

का ऊ तोरो बाप नोहोय,

जो न तोख मोल लियो हय?

ओन तोख बनायो

अऊर खड़ो भी करयो हय।

7बीती हुयी बात क याद कर,

हरेक पीढ़ी को साल भर कि सोच;

अपनो बाप सी पूछ,

अऊर ऊ तुम्ख बतायेंन;

अपनो बुजूर्ग लोगों सी सवाल कर,

अऊर ऊ तोख बतायेंन।

8जब परमप्रधान न हर एक राष्ट्र ख,

अपनो खुद को भाग म बाट दियो,

अऊर आदमियों क अलग अलग बसायो,

तब ओन देश देश को सब लोगों की सीमा

इस्राएलियों की गिनती को अनुसार

कर दी।

9कहालीकि परमेश्वर को अंश ओकी प्रजा आय;

याकूब ओको चुन्यो हुयो निज भाग हय।”

10“ओन ओख जंगल म,

अऊर सुनसान बड़ो मैदान म

अऊर गरजन वालो जनावर सी भरयो हुयो रेतिली जागा म पायो;

ओन ओको साथ म रह्य ख ओकी रक्षा करी,

अऊर अपनी आंखी की पुतली को समान

ओख सम्भाल ख रख्यो।

11जसो गिधाड़ अपनो घोसला कि चौकसी करय हय,

अपनो बच्चा को ऊपर मंडरावय हय,

वसोच ओन अपनो पंख फैलाय क

ओख अपनो पंखा पर उठाय लियो।

12परमेश्वर अकेलोच ओकी अगुवायी करत रह्यो,

अऊर ओको साथ कोयी दूसरो देवता नहीं होतो।

13ओन ओख धरती को ऊंचो ऊंचो जागा पर सवारी करायी,

अऊर ओको खेत की फसल खिलायी;

प्रभु न चट्टान म सी शहेद निकाल क ओख चुसायो,

अऊर कड़ी चट्टान म सी तेल निकाल क ओख खिलायो।

14गाय को दही,

अऊर शेरी-मेंढी को दूध,

जनावर की चर्बी,

बकरा अऊर बाशान कि जाति को मेंढा,

अऊर गहूं को अच्छो सी अच्छो चुन,

अऊर अंगूर को रस भी पीवत होतो।”

15“पर यशूरून बड़ो होय क लात मारन लग्यो;

अऊर ऊ मोटो होय क ताकतवर भय गयो,

अऊर तोरो पर चर्बी बढ़ गयी,

तब ओन बनान वालो परमेश्वर क छोड़ दियो,

अऊर अपनो उद्धार की चट्टान क तुच्छ मान्यो।

16ओन परायो देवतावों क मान क

ओको म जलन पैदा करी;

अऊर गलत काम कर ख

ओको गुस्सा दिलायो।

17ओन भूत-प्रेत की बलि चढ़ायी,

जो ईश्वर नहीं होतो

अऊर जो ओख नहीं जानत होतो;

जो नयो नयो देवता होतो,

अभी पैदा भयो होतो,

अऊर जेको डर उन्को बुजूर्ग ख

कभी नहीं भयो होतो।

18जो चट्टान सी तय पैदा भयो

ओख तय भूल गयो,

अऊर जो परमेश्वर न तोख पैदा करयो

ओख भी तय भूल गयो।”

19“इन बातों ख देख क

परमेश्वर न उन्ख ठुकराय दियो,

कहालीकि ओको बेटा बेटियों न

ओख गुस्सा दिलायो होतो।

20तब ओन कह्यो,

मय उन्को सी अपनो मुंह छुपाय लेऊ,

अऊर देखू कि ओको अन्त कसो रहेंन,

कहालीकि यो राष्ट्र को लोग बहुत तेड़ो हय

अऊर धोका देन वालो बेटा आय।

21ओन असी चीज मान क

जो परमेश्वर नोहोय,

मोरो म जलन पैदा करी,

अऊर अपनी बेकार चिजों को बारे म गुस्सा दिलायो,

येकोलायी मय भी ओख बारे म

जो मोरी प्रजा नहाय,

ओख म जलन पैदा करूं;

अऊर एक मूर्ख जाति सी

उन्ख गुस्सा दिलाऊं।

22कहालीकि मोरो गुस्सा की आगी भड़क गयी हय,

जो अधोलोक तक जलत जायेंन,

अऊर धरती अपनी फसल सहीत भस्म होय जायेंन,

अऊर पहाड़ी की नींव म भी

आगी लगाय देयेंन।”

23मय उन्को पर विपत्ति पर विपत्ति भेजू;

अऊर उन्को पर मय सब तीरों ख छोडूं।

24हि अकाल सी कमजोर होय जायेंन,

अऊर आगी सी

अऊर कठिन महामारी सी रोग लग जायेंन;

अऊर मय उन्को पर जनावर को दात लगाऊं,

अऊर जमीन पर रेंगन वालो सांप को जहेर भेजू।

25बाहेर हि तलवार सी मरेंन,

अऊर घरों को अन्दर डर सी घबरायो रहेंन।

का जवान टुरा अऊर जवान टुरियां,

का दूध पीतो हुयो बच्चा

अऊर का पक्को बाल वालो

सब असोच तरीका सी बरबाद होयेंन।

26मय न कह्यो होतो,

कि मय उन्को दूर दूर देश तक

तितर-बितर कर देऊं,

अऊर आदमियों म सी

ओकी याद तक मिटाय डालू।

27पर मोख दुश्मन की छेड़-छाड़ को डर होतो,

असो नहीं होय की विद्रोही ख यो भ्रम हो,

अऊर हि यो कहेंन,

“हम अपनीच ताकत सी प्रबल भयो हय,

अऊर या सब परमेश्वर सी नहीं भयी।”

28“या राष्ट्र नासमझ त हय,

अऊर इन्को म समझ भी नहाय।

29अच्छो होतो कि हि बुद्धिमान होतो,

कि येख समझ लेतो,

अऊर अपनो अन्त को बिचार करतो!

30फिर उन्की चट्टानच उन्ख नहीं बेच देती,

अऊर परमेश्वर न उन्ख दूसरो को हाथ म नहीं कर देतो;

त यो कसो होय सकय

कि उन्को हजार सैनिक को पीछा एक आदमी करतो,

अऊर कसो दो आदमी

दस हजार सैनिक ख भगाय देतो?

31कहालीकि जसी हमरी चट्टान हय

वसो ओकी चट्टान नहाय,

फिर हमरो दुश्मनच

हमरो न्यायी कहाली नहीं हो।

32कहालीकि उन्की अंगूर की बेला

सदोम की अंगूर सी निकली,

अऊर अमोरा को अंगूर को बगीचा म की हय,

ओको अंगूर जहेर वालो हय,

अऊर उन्को गुच्छा कड़वो हय,

33उन्को अंगूरीरस

सांप को जसो जहेर हय,

अऊर कालो नांग को जसो

घातक जहेर हय।”

34“का या बात मोरो मन म रखी हय,

अऊर मोरो भण्डारों म शिलबन्द नहाय?

35पलटा लेनो अऊर बदला लेनो

मोरोच काम आय,

यो उन्को पाय फिसलन को समय

प्रगट होयेंन,

कहालीकि उन्की विपत्ति को दिन जवर हय,

अऊर जो दु:ख उन पर पड़न वालो हंय,

ऊ जल्दी आय रह्यो हय।

36कहालीकि जब परमेश्वर देखेंन

कि मोरी प्रजा की ताकत जाय रही हय,

अऊर का बान्धुवा अऊर का स्वाधीन,

उन म सी कोयी बच्यो नहीं रहेंन,

तब परमेश्वर अपनो लोगों को न्याय करेंन,

अऊर अपनो दासों पर दया करेंन।

37तब ऊ कहेंन,

उन्को देवता कहां हय,

मतलब वा चट्टान कहां हय,

जेको पर उन्को भरोसा होतो,

38जो उन्को बलिदानों की चर्बी खावय,

अऊर जो न तुम्हरी पेयबलि को रस पीत होतो?

तब हिच उठ क

अऊर तुम्हरी मदत करेंन,

अऊर तुम्हरी

रक्षा करेंन।”

39“येकोलायी अब तुम देख लेवो

कि मय उच आय,

अऊर मोरो साथ कोयी देवता नहाय;

मयच मार डालतो,

अऊर मयच जीन्दो करू हय,

मयच घायल करू हय,

अऊर मयच चंगो करू हय,

अऊर मोरो हाथ सी

कोयी नहीं छुड़ाय सकय हय।

40कहालीकि मय अपनो हाथ

स्वर्ग की तरफ उठाय क कहूं हय,

कहालीकि मय हमेशा को लायी

जीन्दो हय,

41येकोलायी यदि मय

अपनी तलवार की धार ख तेज करूं,

अऊर न्याय ख अपनो हाथ म लेऊं,

त अपनो दुश्मनों सी बदला लेऊं,

अऊर अपनो विद्रोहियों सी

बदला लेऊं,

42मय अपनो तीरों को

खून सी मतवालो करूं,

अऊर मोरी तलवार मांस खायेंन,

ऊ खून मरयो हुयो,

अऊर बन्दियों को

अऊर दुश्मनों को

लम्बो बाल वालो मुखियावों को होयेंन।”

43“हे राज्य-राज्य को लोग,

प्रभु को लोगों को साथ खुशी मनावो;

कहालीकि ऊ अपनो दासों को

खून को बदला लेयेंन,

अऊर अपनो विद्रोहियों को

बदला लेयेंन,

अऊर अपनो देश अऊर अपनी प्रजा को

पाप ख झाक देयेंन।”

44यो गीत को सब वचन मूसा न नून को टुरा होशे को संग आय क लोगों क सुनायो।

मूसा को आखरी निर्देश

45जब मूसा यो सब वचन सब इस्राएलियों सी कह्यो, 46तब ओन ओको सी कह्यो, “जितनी बात मय अज तुम सी चिताय क कहू हय उन सब पर अपनो मन लगावो, अऊर उन्ख अपनो दिल म बैठाय लेवो, अऊर अपनो बच्चा क सिखाजो, जेकोसी हि या व्यवस्था को सब वचन को अनुसार काम कर सकेंन। 47कहालीकि यो तुम्हरो लायी व्यर्थ को काम नोहोय, पर तुम्हरो जीवन आय, अऊर असो करन सी ऊ देश म तुम्हरी उमर को दिन बहुत रहेंन, जेको अधिकारी होन क तुम यरदन पार जाय रह्यो हय।”

48फिर उच दिन परमेश्वर न मूसा सी कह्यो, 49“वा अबारीम पहाड़ी कि नबो नाम की ऊंचो पर, जो मोआब देश म यरीहो को आगु हय, चढ़ क कनान देश, जेक मय इस्राएलियों की निजी जमीन कर देऊ हय, ओख देख ले। 50तब जसो तोरो भाऊ हारून होर पहाड़ी पर मर क अपनो लोगों म मिल गयो, वसो च तय भी पहाड़ी पर चढ़ क मर जाजो, अऊर अपनो लोगों म मिल जाजो। 51येको वजह यो आय कि सीन जंगल म, कादेश को मरीबा नाम को तलाव पर, तुम दोयी न मोरो अपराध करयो कहालीकि तुम न इस्राएलियों को बीच म मोख पवित्र ठहरायो। 52येकोलायी ऊ देश जो मय इस्राएलियों ख देऊ हय, तय अपनो आगु देख लेजो, पर वहां जाय नहीं पाजो।”