व्यवस्थाविवरन 33

मूसा को द्वारा इस्राएल को कुलों ख आशीर्वाद देनो

1जो आशीष परमेश्वर को जन मूसा न अपनी मृत्यु सी पहले इस्राएलियों को कह्यो होतो ऊ यो आय।

2ओन कह्यो,

“यहोवा सीनै पहाड़ सी आयो,

अऊर सेईर सी

उन्को लायी निकल क आयो;

ओन पारान पहाड़ी सी अपनो तेज दिखायो,

अऊर लाखों पवित्र को बीच म सी आयो,

ओन दायो हाथ सी

उन्को लायी आगी जसी

व्यवस्था निकली।

3ऊ अपनो लोगों सी प्रेम करय हय;

ओको सब पवित्र लोग तोरो हाथ म हय,

ऊ तोरो पाय को जवर बैठ्यो रह्य हय,

तोरो वचन को

एक एक फायदा उठावय हय।

4मूसा न हम्ख व्यवस्था दी,

अऊर ऊ याकूब की सभा को निजी भाग आय।

5जब प्रजा को मुखिया आदमी,

अऊर इस्राएल को कुल एक साथ जमा भयो,

तब ऊ यशूरून म राजा ठहरयो।”

6“रूबेन नहीं मरेंन,

पर जीन्दो रहेंन,

तब भी ओको यहां को

मनुष्य थोड़ोच होना।”

7अऊर यहूदा पर या आशीष हुयी

जो मूसा न कहीं,

“हे परमेश्वर,

तय यहूदा की सुन,

अऊर ओख ओको लोगों को जवर पहुंचाव।

ऊ अपनो लायी

खुदच अपनो हाथ सी लड़्यो,

अऊर तयच ओको दुश्मनों को खिलाफ

ओको मदतगार बन।”

8फिर लेवी को बारे म ओन कह्यो,

“तुम्मीम अऊर ऊरीम

तोरो भक्त को जवर हय,

जेक तय न मस्सा म परख लियो,

अऊर जेको साथ

मरीबा नाम को सोता पर

तोरो विवाद भयो;

9ओन त अपनो माय बाप को बारे म कह्यो,

‘मय ओख नहीं जानु हय,’

अऊर न त ओन अपनो भाऊवों ख

अपनो मान्यो,

अऊर न अपनो बच्चा ख पहिचान्यो।

कहालीकि ओन तोरी बात मानी,

अऊर ऊ तोरी

वाचा को पालन करय हय।

10हि याकूब ख तोरो नियम,

अऊर इस्राएल ख तोरी व्यवस्था सिखायेंन;

अऊर तोरो आगु धूप

अऊर तोरी वेदी पर

सर्वांग जनावर ख होमबलि करेंन।

11हे परमेश्वर,

ओकी सम्पत्ति पर आशीष दे,

अऊर ओको हाथों की सेवा ख अपनायो;

ओको दुश्मनों अऊर बैरियों की कमर पर असो मार

कि हि फिर नहीं उठ सकय।”

12फिर ओन बिन्यामीन को बारे म कह्यो,

“यहोवा को ऊ प्रिय जन आय,

यो ओको जवर निडर होय क रहेंन;

अऊर ऊ दिन भर छाया करेंन,

अऊर हि ओको कन्धा को बीच म

रह्यो करय हय।”

13फिर यूसुफ को बारे म ओन कह्यो,

येको देश परमेश्वर सी आशीष पायेंन,

मतलब स्वर्ग को अनमोल चीज अऊर ओस,

अऊर ऊ गहिरो पानी

जो खल्लो हय।

14अऊर सूरज कि तपन सी

पकायो हुयो अनमोल फल,

अऊर जो अनमोल चीज

मौसम म उगय हय।

15अऊर पुरानी पहाड़ी कि अच्छी चीज,

अऊर सनातन पहाड़ी की

अनमोल उपज,

16अऊर धरती

अऊर जो अनमोल चीज ओको म भरी हय,

अऊर ओकी खुशी

झाड़ियों म रहत रह्य।

हि सब को बारे म

यूसुफ को मुंड पर,

मतलब ओकोच मुंड को चन्दा पर,

जो अपनो भाऊवों सी सब सी अलग होतो

आशीष च आशीष फलेंन।

17ऊ बलवान हय,

मानो गाय को पहिलौठा आय,

अऊर ओको सींग

जंगली बईल को जसो हय;

ओको सी ऊ देश देश को लोगों ख,

बल्की धरती की छोर तक को

सब लोगों ख भगाय देंन,

ऊ एप्रैम को लाखों,

अऊर मनश्शे को

हजारों हय।

18फिर जबूलून को बारे म ओन कह्यो,

ओ जबूलून,

तय बाहेर निकलतो समय,

अऊर ओ इस्साकार,

तय अपनो डेरा म

खुशी करे।

19ऊ देश देश को लोगों ख पहाड़ी पर बुलायेंन;

ऊ उत धर्मयज्ञ करेंन;

कहालीकि हि समुन्दर को धन, अऊर रेतु म

लुक्यो हुयो अनमोल चिजे सी

फायदा उठायेंन।

20फिर गाद को विषय म ओन कह्यो,

“धन्य ऊ हय जो गाद ख बढ़ावय हय!

गाद त सिंहनी को जसी रह्य हय,

अऊर कन्धा ख, अऊर मुंड ख

तक फाड़ डालय हय।

21अऊर ओन अपनो लायी

देश को अच्छो भाग चुन्यो हय,

कहालीकि वहां अमीरों को लायक भाग रख्यो

होतो।

तब ओन प्रजा को मुखिया आदमी को

साथ आय क परमेश्वर को

काम ख न्यायी ठहरायो, अऊर इस्राएल को संग

होय क ओन नियम को

पालन करयो।”

22फिर दान को बारे म ओन कह्यो,

“दान त बाशान सी कूदन वालो सिंह को

बच्चा आय।”

23फिर नप्ताली को बारे म ओन कह्यो,

“ओ नप्ताली, तय जो यहोवा की खुशी

सी भर गयो,

अऊर ओकी आशीष सी भरपूर हय,

तय पश्चिम अऊर दक्षिन को देश को

हकदार होय जा।”

24फिर आशेर को बारे म ओन कह्यो,

“आशेर टुरा को बारे म आशीष पायेंन;

ऊ अपनो भाऊवों म प्रेम रहेंन, अऊर

अपनो पाय ख तेल म डुबायेंन।

25तोरो फाटक की टिचकनी लोहा अऊर पीतल को होयेंन,

अऊर जसो तोरो दिन वसोच तोरी

शक्ति हो।”

26“ओ यशूरून, ईश्वर को जसो अऊर

कोयी नहाय,

ऊ तोरी मदत को लायी आसमान पर,

अऊर अपनो तेज दिखावत

आकाशमण्डल पर सवार होय क चलय हय।

27अनादि परमेश्वर तोरो गृहधाम आय,

अऊर खल्लो सनातन भुजाये हय।

अऊर तोरो आगु सी तोरो दुश्मनों ख निकाल देवय,

अऊर बोलय हय, उन्ख सत्यानाश कर देऊ।

28अऊर इस्राएल बिना डरयो रह्य हय,

खाना अऊर नयो अंगूर को देश म,

याकूब को सोता अकेलोच रह्य हय;

अऊर ओको ऊपर आसमान सी ओस

गिरय हय।

29ओ इस्राएल , तय कितनो धन्य हय।

हे परमेश्वर सी उद्धार पायी हुयी प्रजा,

तोरो लायक कौन हय,

ऊ त तोरी मदत को लायी ढाल हय,

अऊर तोरी विजय को लायी तलवार आय,

तोरो दुश्मन तोख मानेंन,

अऊर तय उन्को उंचो जागा ख कुचल देजों।”