व्यवस्थाविवरन 34

मूसा की मृत्यु

1तब मूसा मोआब को अराबा कि नबो पहाड़ी पर जो पिसगा की एक ऊंची जाग पर हय चढ़ गयो, जो यरीहो को आगु हय, अऊर यहोवा न ओख सब देश दिखायो; गिलाद सी दान तक को पूरो प्रदेश, 2अऊर नप्ताली को पूरो देश, अऊर एप्रैम अऊर मनश्शे को देश, अऊर पश्चिम को समुन्दर तक को यहूदा को पूरो देश, 3अऊर दक्षिन देश, अऊर सोअर तक को यरीहो नाम को खजूर को झाड़ वालो नगर की घाटी, यो सब दिखायो। 4तब यहोवा न ओको सी कह्यो, “जो देश को बारे म मय न अब्राहम, इसहाक, अऊर याकूब सी कसम खाय क कह्यो होतो, कि मय येख तोरो कुल ख देऊं ऊ योच आय। मय न येख तोख सच म दिखाय दियो हय, पर तय ओनपार नहीं जाय सकजो” 5तब यहोवा को कहनो को अनुसार ओको दास मूसा वहांच मोआब को देश म मर गयो, 6अऊर ओन ओख मोआब को देश म बेतपोर को आगु एक घाटी म माटी दी; अऊर अज को दिन तक कोयी नहीं जानय कि ओकी कब्र कहां हय। 7मूसा अपनी मौत को समय एक सौ बीस साल को होतो, पर न त ओकी आंखी धुंधलो पड़ी, अऊर न ओकी ताकत कम भयी। 8अऊर इस्राएली मोआब को अराबा म मूसा को लायी तीस दिन तक रोतो रह्यो; तब मूसा लायी रोवन अऊर दु:ख करन को दिन पूरो भयो। 9अऊर नून को बेटा यहोशू की बुद्धि की आत्मा सी परिपूर्ण होतो, कहालीकि मूसा न अपनो हाथ ओको पर रख्यो होतो; अऊर इस्राएली वा आज्ञा को अनुसार जो यहोवा न मूसा ख दी होती मानत होतो। 10अऊर मूसा को जसो इस्राएल म असो कोयी भविष्यवक्ता नहीं होतो, जेकोसी यहोवा आमने-सामने बात करत होतो। 11अऊर ओख यहोवा न फिरौन अऊर ओको सब काम करन वालों को आगु अऊर ओको पूरो देश म, सब चिन्ह अऊर चमत्कार करन ख भेज्यो होतो। 12अऊर ओन पूरो इस्राएलियों की नजर म मजबूत हाथ अऊर बड़ो डर को काम कर क् दिखायो।