व्यवस्थाविवरन 15

सातवों साल छुटकारा को साल

(लैव्यव्यवस्था २५:१-७)

1“हर सात साल बीतन पर तुम अपनो कर्जदार को करजा सी छुटकारा देत रहजो, 2मतलब जो कोयी करजा देन वालों न अपनो पड़ोसी ख करजा दियो होना, ऊ ओख छोड़ दे; अऊर अपनो पड़ोसी यां भाऊ सी जबरदस्ती नहीं भरवायें, कहालीकि परमेश्वर को नाम सी यो छुटकारा को प्रचार भयो हय, 3परदेशी आदमी सी तय अपनो करजा वसुल कर सकय हय, पर जो कुछ तोरो भाऊ को जवर हय तय ओको बिना भरवायो छोड़ देजो। 4तोरो बीच कोयी गरीब नहीं रहेंन, कहालीकि जो देश ख तोरो परमेश्वर तोख देवय हय, कि तय ओको अधिकारी हो, ओको म ऊ तोख बहुत आशीर्वाद देंन। 5यो तबच होयेंन जब तय अपनो प्रभु परमेश्वर यहोवा की आज्ञा ध्यान सी सुनजो, अऊर पूरी आज्ञावों को अनुसार, जेको आदेश अज मय तोख देऊ हय, ओख मानन लायी तैयार रहजो। 6तब तोरो परमेश्वर यहोवा अपनो वचन को अनुसार तोख आशीर्वाद देंन, अऊर तय बहुत देश ख उधार देयेंन, पर तोख उधार नहीं लेनो पड़ेंन; अऊर तय बहुत देश पर राज्य करजो, पर हि तोरो पर राज्य नहीं कर सकेंन।”

7“जो देश तोरो परमेश्वर तोख देवय हय ओको कोयी फाटक को अन्दर यदि तोरो भाऊवों म सी कोयी गरीब हय, त ओको लायी अपनो दिल कठोर मत करजो, अऊर नहीं अपनो मुट्ठी बन्द रखजो। 8जो चीज की ओख होना, ओकी जितनी जरूरत होना उतनो अपनो हाथ खुलो कर क् उधार देजो। 9तय सावधान रहजो कि तोरो मन म असी मतलबी चिन्ता नहीं आये, कि सातवों साल जो छुटकारा को साल आय, ऊ जवर हय, अऊर अपनी नजर तय अपनो ऊ गरीब भाऊ को तरफ गुस्सा सी ओख कुछ नहीं दे, तब ऊ तोरो खिलाफ परमेश्वर की दोहायी दे, त यो तोरो लायी पाप ठहरेंन। 10तय ओख उधार देजो, अऊर देतो समय तोरो मन ख बुरो नहीं लगनो चाहिये; कहालीकि यो बात को वजह तोरो परमेश्वर तोरो सब काम म जेको म तय अपनो हाथ लगायेंन तोख आशीर्वाद देयेंन। 11तोरो देश म गरीब त मिलेंनच; येकोलायी मय तोख आज्ञा देऊ हय, कि तय अपनो देश म अपनो भाऊ-बहिन, दु:खी अऊर गरीब लायी अपनी मुट्ठी खोल क दान देजो।”

12“यदि तोरो कोयी भाऊ, मतलब कोयी इब्रानी आदमी यां बाई, दास जान क बिके, अऊर ऊ छय साल तोरी सेवा कर चुक्यो, त सातवों साल ओख अपनो जवर सी छुटकारा दे देजो। 13अऊर जब तय ओख छुटकारा दे दे, तब ओख अपनो जवर सी खाली हाथ मत जान देजो। 14बल्कि अपनी मेंढी-शेरियों, अऊर खरियान अऊर अंगूरीरस को कुण्ड म सी ओख बहुतायत सी देजो; तोरो परमेश्वर यहोवा न तोख जसी आशीर्वाद दियो हय ओकोच अनुसार ओख देजो। 15अऊर यो बात ख याद रखजो कि तय भी मिस्र म गुलाम होतो, अऊर तोरो परमेश्वर यहोवा न तोख छुड़ाय लियो; योच वजह मय तोख या आज्ञा देऊ हय। 16अऊर यदि ऊ तोरो सी अऊर तोरो घरानों सी प्रेम रखय, अऊर तोरो संग खुशी सी रह्य हय, अऊर यो वजह तोरो सी कहेंन, मय तोरो जवर सी नहीं जाऊं, 17त सुतारी लगाय क ओको कान दरवाजा पर लगाय क छेद लेजो, तब ऊ हमेशा तोरो दास बन्यो रहेंन। अऊर अपनी दासी सी भी असोच करजो। 18जब तय ओख अपनो जवर सी छुटकारा दे क जान देजो, तब तोख कठिन नहीं जान पड़े; कहालीकि ओन छय साल म दो मजूरी को बराबर तोरी सेवा करी हय। अऊर तोरो परमेश्वर तोरो पूरो काम म तोख आशीर्वाद देयेंन।”

पहिलौठा पशुवों को अर्पन

19“तोरो पूरो जनावर को जितनो पहिलौठा नर बछड़ा हय उन सब ख अपनो परमेश्वर लायी पवित्र रखजो; अपनी गायों को पहिलौठा ख जोतजो मत, अऊर नहीं अपनी शेरी-मेंढी को पहिलौठा को बाल मत काटजो। 20ऊ स्थान पर जो परमेश्वर चुन लेन तय उत परमेश्वर यहोवा को आगु अर्पन करयो हुयो को मांस अपनो अपनो घरानों को संग हर साल खाजो। 21पर ओको म कोयी तरह को दोष हय, मतलब ऊ लंगड़ा यां अन्धा होना, ओको म कोयी तरह को दोष होना, त ओख अपनो परमेश्वर यहोवा लायी बलि मत करजो। 22ओख अपनो फाटको को अन्दर खाजो; शुद्ध अऊर अशुद्ध दोयी तरह को आदमी जसो चिकारे अऊर हरिन को मांस खावय हय वसोच ओको भी मांस खाय सको। 23पर ओको खून मत खाजो; ओख पानी को समान जमीन पर कुड़ाय देजो।”