व्यवस्थाविवरन 14

शोक मनावन की प्रथा

1“तुम अपनो परमेश्वर यहोवा को टुरा आय; येकोलायी मरयो हुयो को वजह नहीं त अपनो शरीर ख घायल मत करो अऊर नहीं भौंहों को बाल मुंडावो। 2कहालीकि तय अपनो परमेश्वर लायी एक पवित्र समाज आय, अऊर परमेश्वर न तोख धरती सी अपनी निजी सम्पत्ति होन लायी चुन लियो हय।”

शुद्ध अऊर अशुद्ध जनावर

(लैव्यव्यवस्था ११:१-४७)

3“तय कोयी घृणित चीज मत खाजो। 4असो जनावर जो तुम खाय सकय हय ऊ यो आय, मतलब गाय- बईल, शेरी-मेंढी, 5हरिन, चिकारा, बारासिंगा, जंगली बकरा, सांभर, नीलगाय, जंगली मेंढी। 6जनावर म सी जितनो चिरयो यां फट्यो खुरी वालो अऊर कवरी करन वालो उन्को मांस तुम खाय सकय हय। 7पर कवरी करन वालो यां फट्यो खुरी वालो जनावर ख, मतलब ऊंट, ससा अऊर शापान। हि कवरी त करय हय, पर उन्की खुरी फटी नहीं होवय। येकोलायी हि तुम्हरो लायी अशुद्ध हय। 8फिर डुक्कर, जो फट्यो खुरी को हय पर कवरी नहीं करय, येकोलायी ऊ तुम्हरो लायी अशुद्ध हय। तुम उन्को मांस मत खाजो, अऊर ओको लोथ ख हाथ भी मत लगायजो।”

9“फिर जितनो पानी को जीव हय उन्म सी तुम इन्क खाय सकय हय, जिन्को खिपला अऊर पंख होवय हय। 10पर जितनो बिना पंख अऊर खिपला को होवय हय ओख तुम मत खावो; कहालीकि ऊ तुम्हरो लायी अशुद्ध हय।”

11“सब शुद्ध पक्षियों को मांस खाय सकय हय। 12पर इन को मांस मत खाजो, मतलब चील, गिधाड़, कुरर; 13गरूड़, चील अऊर सब तरह को गिधाड़, 14अऊर सब तरह को कौवा, 15शुतुरमुर्ग, रात शिकरा, पान-कोम्बड़ी, अऊर सब तरह को गरूड़; 16छोटो अऊर बड़ो दोयी जाति को घुबड़, अऊर पिंजल्ला, 17गिधाड़, पानकोंबड़ी, हाड़फोड़, 18सारस, सब तरह को बगला, टिटवी, अऊर चमगादड़। 19अऊर जितनो रेंगन वालो जन्तु हय हि सब तुम्हरो लायी अशुद्ध हय; ओख मत खाजो। 20पर सब शुद्ध पंख वालो को मांस तुम खाय सकय हय।”

21“जो अपनो आप मर जाये ओख तुम मत खावो; ओख अपनो फाटक को अन्दर कोयी परदेशी ख खान दे सकय हय, यां कोयी परायो को हाथ बिक सकय हय; पर तय त अपनो परमेश्वर लायी पवित्र समाज आय। शेरी को बच्चा ख ओकी माय को दूध म नहीं पकावों।”

दशमांश को नियम

22“बीज की पूरी फसल म सी हर साल खेत म होन वाली उपज को दशमांश अलग कर क् रखजो। 23अऊर जो जागा ख तोरो परमेश्वर यहोवा अपनो नाम को निवास लायी चुन ले उत अपनो अनाज, नयो अंगूरीरस, अऊर ताजो तेल को दशमांश, अऊर अपनो गाय-बईल अऊर मेंढी-शेरियों को पहिलौठा अपनो परमेश्वर यहोवा को आगु खायो करजो; जेकोसी तुम ओको डर हमेशा पालन करनो सीखो। 24पर यदि ऊ जागा जेको तोरो परमेश्वर अपनो निवास लायी चुन ले अऊर ऊ बहुत दूर हय, अऊर उत की यात्रा तोरो लायी इतनी लम्बी हय कि तय अपनो परमेश्वर की आशीर्वाद सी मिली हुयी चीज उत नहीं लिजा सकजो, 25त ओख बेच क, रुपया ख बान्ध, हाथ म ले क वा जागा पर जाजो जो तोरो परमेश्वर यहोवा चुन लेयेंन। 26अऊर उत गाय-बईल यां शेरी-मेंढी, यां अंगूरीरस, यां दारू, यां कोयी तरह की चीज कहाली नहीं होय, जो तोरो जीव चाहेंन, अपनो घरानो सहित अपनो परमेश्वर यहोवा को आगु खाय क खुशी मनायजो। 27अऊर अपनो फाटको को अन्दर लेवियों ख मत छोड़जो, कहालीकि तोरो संग ओको कोयी हिस्सा यां अंश नहीं होयेंन।”

28“हर तीन साल को बितन पर तीसरो साल की फसल को पूरो दशमांश निकाल क अपनो फाटक को अन्दर जमा कर ख रखजो। 29तब लेवियों जेको तोरो संग कोयी निजी हिस्सा यां अंश नहीं होयेंन ऊ, अऊर जो परदेशी, अऊर अनाथ, अऊर विधवाये तोरो फाटक को अन्दर हो, हि भी आय क भरपेट खाये, जेकोसी तोरो परमेश्वर यहोवा तोरो सब कामों म तोख आशीर्वाद दे।”