व्यवस्थाविवरन 13

1“यदि तोरो बीच कोयी भविष्यवक्ता यां सपनो देखन वालो आय क तोख कोयी चिन्ह यां चमत्कार दिखाये, 2अऊर जो चिन्ह, चमत्कार ख प्रमाण ठहराय क ऊ तोरो सी कहेंन, आव हम दूसरो देवतावों को पीछू चलबो, जेख तय नहीं जानय, ओकी उपासना करबों, 3तब तुम ऊ भविष्यवक्ता, यां सपनो देखन वालो को बात पर ध्यान मत देजो; कहालीकि तुम्हरो परमेश्वर यहोवा तुम्हरी परीक्षा लेयेंन, कि हि मोरो सी अपनो पूरो मन अऊर पूरो जीव को साथ प्रेम करय हय यां नहीं? 4तुम अपनो परमेश्वर यहोवा को पीछू चलो, अऊर ओको भय मानजो, अऊर ओकी आज्ञावों पर चलजों, अऊर ओको वचन ख मानजो, अऊर ओकी सेवा करजो, अऊर ओको संग जुड़्यो रहजो। 5अऊर असो भविष्यवक्ता यां सपनो दिखान वालो, तुम्हरो ऊ परमेश्वर यहोवा सी फिराय क, जेन तुम ख मिस्र देश को गुलामी सी निकाल्यो हय, तोरो उच परमेश्वर यहोवा को रस्ता सी बहकान की बात कहन वालो ठहरेंन, त यो वजह ऊ मार डाल्यो जाये। यो रीति सी तय अपनो बीच म सी असी बुरायी ख दूर कर देजो।”

6“यदि तोरो सगो भाऊ, यां टुरा, यां टुरी, यां तोरी पत्नी, यां जीव सी बढ़ क तोरो कोयी संगी तोख यो कह्य क उकसावन लग्यो, कि आवो हम दूसरो देवतावों की उपासना यां पूजा करबो, जेख नहीं त तय अऊर नहीं तोरो पूर्वज जानत होतो, 7चाहे हि तुम्हरो जवर रहन वालो आजु-बाजू को लोगों को चाहे धरती को एक कोना सी ले क दूसरो कोना तक दूर-दूर को रहन वालों देवता हो, 8त तय ओकी मत मानजो अऊर नहीं ओकी बात सुनजो, अऊर नहीं ओको पर तरस खाजो, अऊर नहीं लूकायो रखजो; 9ओख जरूर मार डालजो; ओख मारन म पहले तोरो हाथ उठे, तोरो बाद सब लोगो को हाथ उठे। 10ओख गोटा सी मार डालजो, कि ऊ मर जाये, कहालीकि ओन तोख ऊ परमेश्वर यहोवा सी जो तोख गुलामी को घर सी मतलब मिस्र देश सी निकाल्यो हय, बहकावन की कोशिश करी हय। 11अऊर सब इस्राएली सुन क डर जायेंन, अऊर असो बुरो काम फिर तोरो बीच नहीं करेंन।”

12“अऊर तोरो कोयी नगर को बारे म, जो तोरो परमेश्वर तोख रहन लायी देवय हय, असी बात तोरो सुनन म आये, 13तुम म सी कितनो बुरो आदमी न तोरोच बीच म सी निकल क अपनो नगर को निवासी ख यो कह्य क बहकाय दियो, कि आवो हम दूसरो देवतावों की जेकोसी अब तक अनजान होतो उपासना करबों, 14त पूछताछ करजो, अऊर पता लगाजो, अऊर बात सच हय, अऊर कुछ भी शक नहीं रहेंन कि तोरो बीच असो घिनौनो काम करयो जावय हय, 15त ऊ शहर को निवासी ख तलवार सी मार डालजो, अऊर उन्को ऊ सब जनावर ख भी तलवार सी सत्यानाश करजो। 16अऊर शहर की पूरी लूट की चिजो ख चौक को बीच जमा कर क् अपनो परमेश्वर यहोवा लायी सब ख जलाजो; अऊर ऊ उत हमेशा लायी खण्डर हो जायेंन ऊ फिर सी नहीं बसायो जाये। 17अऊर सत्यानाश की कोयी चीज अपनो लायी मत रखजो; जेकोसी परमेश्वर अपनो भड़क्यो हुयो गुस्सा सी शान्त होय क जसो ओन तोरो पूर्वजों सी कसम खायी होती वसोच तोरो सी दया कर क्, तोख गिनती म बढ़ायेंन। 18पर यो तब होयेंन जब तय अपनो परमेश्वर यहोवा कि पूरी आज्ञा मय अज तोख सुनाऊ हय उन सब ख मानजो अऊर जो तोरो परमेश्वर यहोवा कि नजर म ठीक हय उच करजो।”