व्यवस्थाविवरन 12

एकच आराधना की जागा

1“जो देश तुम्हरो पूर्वजों को परमेश्वर यहोवा न तुम ख अधिकार म लेन ख दियो हय, ओख म जब तक तुम जमीन पर जीन्दो हय तब तक इन विधियां अऊर नियम ख पालन करन म सावधान रहजो। 2जो देश को तुम हक्कदार होयेंन ओको लोग ऊची पहाड़ी यां टेकरा यां झाड़ को नीचे, जितनो जागा म अपनो अपनो देवता की पूजा करय हय, उन सब ख तय नाश कर डालजो; 3उन्की वेदी ख तोड़ देजो, उन को गोटा को खम्बा ख गिराय देजो, उन की अशेरा नाम की मूर्ती क आगी म जलाय देजो, अऊर उन की खोदी मूर्ती ख काट क गिराय देजो, कि ऊ देश म सी उन्को नाम मिट जायेंन। 4फिर जसो हि करय हंय, वसो तुम अपनो परमेश्वर यहोवा लायी मत करजो। 5पर जो जागा तुम्हरो परमेश्वर यहोवा तुम्हरो सब कुल म सी चुन लेयेंन, कि उत अपनो नाम ख बनायो रखेंन, ओकी रहन की जागा पर जातो रहजो; 6अऊर उतच तुम होमबलि, अऊर मेलबलि, अऊर दशमांश, अऊर चढ़ान वाली भेंट, अऊर मन्नत की चीज, अऊर स्वेच्छाबलि, अऊर गाय-बईल अऊर मेंढी-शेरियों को पहिलौठा लि जायो करजो। 7अऊर उतच तुम अपनो परमेश्वर को आगु जेवन करजो, अऊर अपनो अपनो घराना संग उन पूरो कामों पर जिन्म तुम न हाथ लगायो हय, अऊर परमेश्वर सी आशीर्वाद मिल्यो हय त खुशी करजो। 8जसो अजकल हम जसी उपासना करतो आयो, वसो अब मत करजो; हरेक उच काम कर रह्यो हय, जो ओख अच्छो लगय हय। 9जो आराम की जागा तुम्हरो परमेश्वर यहोवा तुम्हरो हिस्सा म देवय हय, उत तुम अभी तक त नहीं पहुंच्यो हय। 10पर जब तुम यरदन को उस पार जाय क ऊ देश म बस जावो, जो तुम्हरो परमेश्वर यहोवा तुम्ख देवय हय, अऊर ऊ तुम्हरो चारयी तरफ को सब दुश्मन सी तुम ख आराम देंन, कि तुम शान्ति सी रह सको। 11अऊर तुम निडर बन्यो रहो, तब जो जागा तुम्हरो परमेश्वर यहोवा अपनो निवास ठहरान लायी चुन ले, ओख म तुम अपनो होमबलि, अऊर मेलबलि, अऊर दशमांश, अऊर उठावन वाली भेंट; अऊर मन्नत की सब अच्छी चीज जो तुम परमेश्वर लायी मन्नत मानो, मतलब जितनी चीज की आज्ञा मय तुम ख बतावय हय उन सब ख उतच ले जाजो। 12अऊर वहां तुम अपनो बेटा बेटी अऊर दास दासी को साथ अपनो परमेश्वर यहोवा को आगु खुशी मनायजो, अऊर जो लेवी तुम्हरो फाटक म रहेंन हि भी खुश रहेंन, कहालीकि ओको तुम्हरो साथ निजी हिस्सा यां अंश नहीं रहेंन। 13अऊर सावधान रहजो कि तय अपनो होमबलि ख हर एक जागा पर जो देखनो म आवय हय, मत चढ़ाजो; 14पर जो जागा तोरो कोयी वंश म परमेश्वर चुन ले उतच अपनो होमबलि ख चढ़ाजो, अऊर जो जो काम कि आज्ञा मय तोख सुनाऊ हय ओख उतच करजो।”

15“पर तय अपनो सब फाटक को अन्दर अपनो मर्जी सी अपनो परमेश्वर यहोवा की दी हुयी आशीर्वाद को अनुसार जनावर मार क खाय सकेंन, शुद्ध अऊर अशुद्ध मनुष्य खाय सकेंन, जसो कि चिकारे अऊर हरिन को मांस। 16पर ओको खून मत खाजो; ओख पानी को समान जमीन पर बहाय देजो। 17फिर अपनो अनाज, नयो अंगूरीरस, अऊर ताजो जैतून को तेल को दशमांश , अऊर अपनो गाय-बईल, मेंढी-शेरियों को पहिलौठा, अऊर अपनी मन्नत की कोयी चीज, अऊर अपनो स्वेच्छाबलि, अऊर उठावन वाली भेंट अपनो सब फाटक को अन्दर मत खाजो; 18उन ख अपनो परमेश्वर को आगु सी उच जागा पर जेख ऊ चुनय अपनो बेटा बेटियों अऊर दास दासियों को , अऊर जो लेवी तोरो फाटक को अन्दर रहेंन उन को संग खाजो, अऊर तय अपनो परमेश्वर यहोवा को आगु अपनो सब काम पर जेन हाथ लगायो हय खुशी मनायजो। 19अऊर सावधान रहजो कि जब तक तय जमीन पर रहजो तब तक लेवियों ख मत छोड़जो।”

20“जब तोरो परमेश्वर अपनो वचन को अनुसार तोरो देश बढ़ायेंन, अऊर तोरो मन मांस खान चाहे, अऊर तय सोचन लगे, कि मय मांस खाऊं, तब जो मांस तोरो मन चाहेंन उच खाय सकजो। 21जो जागा तोरो परमेश्वर यहोवा अपनो नाम लायी चुन ले अऊर ऊ तोरो सी बहुत दूर हय, त जो गाय-बईल, शेरी-मेंढी परमेश्वर न तोख दी हय, ओको म सी जो कुछ तोरो मन चाहेंन, ओख मोरी आज्ञा को अनुसार मार क अपनो फाटक को अन्दर खाय सकजो। 22जसो चिकारे अऊर हरिन को मांस खावय हय वसोच उन ख भी खाय सकजो, शुद्ध अऊर अशुद्ध दोयी तरह को आदमी उन्को मांस खाय सकेंन। 23पर उन्को खून कभी मत खाजो; कहालीकि खून म जीव हय, अऊर मांस को संग जीव ख मत खाजो। 24खून मत खाजो; ओख पानी को जसो जमीन पर बहाय देजो। 25तय ओख मत खाजो; येकोलायी कि ऊ काम करन सी जो परमेश्वर की नजर म जो ठीक हय ऊ तोरो अऊर तोरो बाद तोरो वंश को भलो होय। 26पर जब तय कोयी चिज पवित्र करे, यां मन्नत माने, त असी चिजें ले क वा जागा ख जाजो जेख परमेश्वर चुन लेयेंन, 27अऊर उत अपनो होमबलि को मांस अऊर खून दोयी ख अपनो परमेश्वर यहोवा की वेदी पर चढ़ाजो, अऊर मेलबलियों को खून ओकी वेदी पर बहाय क ओको मांस खाजो। 28इन बातों ख जेकी आज्ञा मय तोख सुनाऊ हय ध्यान लगाय क सुन, कि जब तय ऊ काम करजो जो तोरो परमेश्वर यहोवा की नजर म भलो अऊर ठीक हय, तब तोरो अऊर तोरो बाद तोरो कुल को भी हमेशा भलो होतो रहे।”

मूर्ती पूजा को खिलाफ चेतावनी

29“जब तोरो परमेश्वर ऊ देश ख जेको हक्क लेन ख तय जाय रह्यो हय, उन्ख तोरो आगु सी नाश करेंन, अऊर तय उन्को देश म बस जाजो, 30तब सावधान रहजो, कहीं असो मत होय कि उन को सत्यानाश होन को बाद तय भी ओको समान फस जाजो, मतलब यो कह्य क ओको देवतावों को सम्बन्ध म पूछताछ मत करजो, कि ऊ राज्यों को लोग अपनो देवता की उपासना कसो करत होतो? मय भी वसी आराधना करूं। 31तय अपनो परमेश्वर यहोवा सी असो व्यवहार मत करजो; कहालीकि जितनो तरह को काम सी परमेश्वर गुस्सा करय हय, उन सब ख ओन अपनो देवता लायी करयो हय, यो तक कि अपनो बेटा बेटियों ख भी ऊ अपनो देवता लायी आगी म अर्पन कर दियो हय।”

32“जितनी बातों कि मय तुम ख आज्ञा देऊ हय, उन्को पालन करतो रहजो; अऊर ओको म कुछ मत बढ़ाजो अऊर नहीं ओको म कुछ घटाजो।”