व्यवस्थाविवरन 11

प्रभु की महानता

1“येकोलायी तय अपनो परमेश्वर सी अच्छो सी प्रेम रखजो, अऊर जो कुछ ओन तोख सौंप्यो हय ओको मतलब ओकी विधियां, नियमों, अऊर आज्ञावों को पालन करजो। 2यो तुम या सोच समझ लेवो कहालीकि मय तुम्हरो बाल-बच्चां सी नहीं कहूं, जिन्न नहीं त कुछ देख्यो अऊर नहीं जान्यो हय कि तुम्हरो परमेश्वर यहोवा न का का ताड़ना करी, अऊर महानता, अऊर मजबूत हाथ, अऊर उद्धार लायी फैल्यो हुयो हाथ दिखायो हय, 3अऊर मिस्र को राजा फिरौन ख कसो कसो चिन्ह दिखायो, अऊर ओको देश म कसो चमत्कार को काम करयो; 4अऊर ओन मिस्र की सेना को घोड़ा अऊर रथों सी का करयो, जब ऊ तुम्हरो पीछा करत होतो तब ओन उन ख लाल समुन्दर म डुबाय ख कसो मार डाल्यो, कि अज तक उन्को पता नहाय; 5तुम्ख इत पहुंचन तक ओन जंगल म कसो व्यवहार करयो; 6अऊर ओन रूबेनी एलीआब को बेटा दातान अऊर अबीराम सी का का करयो, मतलब धरती न अपनो मुंह खोल क उन्को घरानों, अऊर डेरों, अनुचरों सहित सब इस्राएलियों को देखतो देखतो कसो निगल लियो; 7तुम न परमेश्वर को इन सब बड़ो बड़ो काम ख तुम न अपनी आंखी सी देख्यो हय।”

प्रतिज्ञा अऊर चेतावनी

8“योच वजह जितनी आज्ञावों ख मय अज तोख सुनावय हय उन ख पालन करजो, येकोलायी कि तुम सामर्थी होय क ऊ देश म जेको हक्क म लेन लायी तुम जाय रह्यो हय, हक्क म ले लेवो। 9अऊर ऊ देश म बहुत दिन तक रह सकेंन, जेख तुम्ख अऊर तुम्हरो वंश ख देन कि कसम परमेश्वर न तुम्हरो बापदादों सी खायी होती, ओको म दूध अऊर शहेद की धारा बहय हय। 10देख, जो देश को हक्क म लेन ख तय जाय रह्यो हय ऊ मिस्र देश को जसो नहाय, जित सी निकल क आयो हय, जहां तुम बीजायी बोवत होतो अऊर हरी भाजी को खेत म अपनो पाय सी नाली बनाय क सिंचायी करत होतो; 11पर जो देश म हक्क म लेन ख तय जाय रह्यो हय ऊ पहाड़ी अऊर घाटियों को देश आय, अऊर बादर की बरसात सिंचय हय; 12ऊ असो देश आय जेको पर तोरो परमेश्वर यहोवा की कृपा हय; अऊर साल को सुरूवात सी ले क आखरी तक तोरो परमेश्वर यहोवा की आंखी ओको पर लगी रह्य हय।”

13“अऊर यदि तय मोरी आज्ञावों ख जो अज मय तोख सुनाऊ हय ध्यान सी सुन क, अपनो पूरो मन अऊर जीव को संग, अपनो परमेश्वर यहोवा सी प्रेम रखजो अऊर ओकी सेवा करत रहजो। 14तब मय तुम्हरो देश म समय पर बरसात करूं तब तुम अपनो अनाज, नयो अंगूरीरस , तेल जमा कर सकेंन। 15अऊर मय तुम्हरो जनावर लायी मैदान म घास उगाऊं, अऊर तुम भरपेट खाना सी सन्तुष्ट रहेंन। 16येकोलायी अपनो बारे म सावधान रहजो, असो नहीं होय कि तुम्हरो मन धोका खाये, अऊर तुम बहक क दूसरो देवतावों की पूजा करन लगो अऊर उन्ख झुक क दण्डवत करन लगो, 17अऊर परमेश्वर को गुस्सा तुम पर भड़के अऊर ऊ आसमान को झरोका बन्द कर दे, जेकोसी बरसात नहीं होय अऊर जमीन अपनी उपज नहीं दे, अऊर तुम ऊ अच्छो देश म सी जो परमेश्वर तुम्ख देवय हय तुम जल्दी नाश होय जावो। 18येकोलायी तुम मोरो यो वचन अपनो अपनो मन अऊर जीव म धारन करजो अऊर चिन्ह को रूप म अपनो हाथ पर बांधजो अऊर ऊ तुम्हरी आंखी को बीच म चिन्ह को काम करेंन। 19अऊर तुम घर म बैठते, रस्ता पर चलतो, सोतो-उठतो ओकी बातचीत कर क् अपनो बच्चां ख सिखायो करजो। 20अऊर ओख अपनो अपनो घर को चौखट को पर अऊर अपनो फाटक को ऊपर लिखजो; 21येकोलायी कि जो देश को बारे म परमेश्वर न तोरो बापदादों सी कसम खाय क कह्यो होतो, कि मय ऊ तुम्ख देऊं, ओको म तुम अऊर तुम्हरो बच्चां की उमर लम्बी हो, अऊर जब तक धरती को ऊपर को आसमान बन्यो रहेंन तब तक ऊ भी बन्यो रहेंन। 22येकोलायी यदि तुम हि सब आज्ञावों को पालन करजो मय तोख सुनावय हय पूरी सावधानी कर ख अपनो परमेश्वर यहोवा सी प्रेम रखजो, अऊर ओको सब रस्ता पर चलजो, अऊर ओकोसी जुड़्यो रहजो, 23तब परमेश्वर उन सब देश ख तुम्हरो आगु सी निकाल डालेंन, अऊर तुम अपनो सी बड़ी अऊर सामर्थी देश को हक्कदार होय जावों। 24जो जो जागा पर तुम्हरो पाय को निशान पड़ेंन हि सब तुम्हरो होय जायेंन, मतलब जंगल सी लबानोन तक, अऊर फरात नदी सी ले क पश्चिम दिशा को समुन्दर तक तुम्हरी सीमा रहेंन। 25तुम्हरो आगु कोयी भी खड़ो नहीं रह सकेंन, कहालीकि जितनी जमीन पर तुम्हरो पाय पड़ेंन ऊ सब पर रहन वालों को मन म तुम्हरो परमेश्वर अपनो वचन को अनुसार तुम्हरो कारण उन्म म डर अऊर घबराहट पैदा कर देंन।”

26“सुन, मय अज को दिन तुम्हरो आगु आशीर्वाद अऊर श्राप दोयी रखू हय। 27मतलब यदि तुम अपनो परमेश्वर यहोवा की आज्ञावों ख जो मय तोख अज सुनाऊ हय मानजो, त तुम पर आशीर्वाद होयेंन। 28अऊर यदि तुम अपनो परमेश्वर की आज्ञावों ख नहीं मानो, अऊर जो रस्ता पर चलन की आज्ञा मय अज सुनावय हय ओख छोड़ क दूसरो देवता को पीछू हो जेख तुम नहीं जानय त तुम पर श्राप पड़ेंन। 29अऊर जब तुम्हरो परमेश्वर यहोवा तुम्ख ऊ देश म लिजायेंन जेको हक्क म लेन ख तय जाय रह्यो हय, तब गिरिज्जीम पहाड़ी पर सी आशीर्वाद अऊर एबाल पहाड़ी पर सी श्राप को वचन सुनाजो। 30का यो पहाड़ी यरदन नदी को उस पार, सूर्य डुबन को तरफ, अराबा को लोग कनानियों को देश म गिलगाल को आगु, मोरे को बांझ झाड़ को जवर हय? 31तब तुम यरदन नदी ख पार करो, कि जो देश तुम्हरो परमेश्वर न तुम ख दियो हय ओको हक्कदार होय जाओ; अऊर तुम ओको हक्कदार बन क ओको म रहन लग जावो; 32येकोलायी जितनी विधियां अऊर नियम मय अज तुम ख सुनावय हय उन ख पालन करन म सावधान रह्यजो।”