Lodhi Bible
व्यवस्थाविवरन 10
गोटा की नयी फरसीयां
(निर्गमन ३४:१-१०)
“ऊ समय परमेश्वर न मोरो सी कह्यो, पहली फरसी को जसो गोटा कि दो अऊर फरसी बनाय ले, अऊर उन्को ले क मोरो जवर पहाड़ी को ऊपर आय जा, अऊर लकड़ी की एक सन्दूक भी बनाय ले। अऊर मय उन पट्टियों को ऊपर उच वचन लिखू, जो पहली पट्टियां पर होतो, ओख तय न तोड़ डाल्यो, अऊर तय उन ख वा सन्दूक म रखजो। तब मय न बबूल की लकड़ी की एक सन्दूक बनायो, अऊर पहली फरसी को जसो गोटा की दो अऊर पट्टियां बनाय क पहाड़ी पर चढ़ गयो। अऊर जो दस वचन परमेश्वर न जमा भयो लोगों को आगु पहाड़ी पर आगी को बीच म सी तुम सी कह्यो होतो, उच पहलो को समान उन पाटियों पर लिख्यो, अऊर ओन मोख दे दियो। तब मय पहाड़ी सी नीचे उतरयो, अऊर फरसी ख अपनो बनायो हुयो सन्दूक म रख दियो; अऊर परमेश्वर की आज्ञा को अनुसार ऊ वहांच रखी हय।”
तब यात्रा करतो हुयो याकान वंशियों को कुंवा सी मोसेरा तक आयो। उत हारून मर गयो, अऊर उतच ओख गाड़्यो गयो। अऊर ओको बेटा एलीआजार ओको जागा याजक को काम करन लग्यो। उत सी हि सब इस्राएल लोग गुदगोदा को तरफ गयो, अऊर गुदगोदा सी योतबाता गयो, यो देश म पानी की नदियां हय। ऊ समय परमेश्वर न लेवी वंश ख येकोलायी अलग करयो कि परमेश्वर की वाचा को सन्दूक ख उठान की जवाबदारी ओको पर सौंप्यो, कि परमेश्वर को आगु खड़ो रह्य क ओकी सेवा करेंन, अऊर ओको नाम सी आशीर्वाद देतो रहेंन, जसो कि अज तक होत आय रह्यो हय। यो वजह लेवियों ख अपनो भाऊवों को संग कोयी निज हिस्सा-बाटा नहीं मिल्यो, परमेश्वर च उन्को निज हिस्सा आय। जसो की तोरो परमेश्वर यहोवा न उन्को सी कह्यो होतो।
“मय त पहलो को जसो वा पहाड़ी पर चालीस दिन चालीस रात रुक्यो रह्यो, अऊर उस बार भी परमेश्वर न मोरी सुन्यो, अऊर तोख मारन की इच्छा छोड़ दी। तब परमेश्वर न मोरो सी कह्यो, उठ, अऊर तय इन लोगों ख समझा, जो देश ख देन की मय न ओको पूर्वजों सी कसम खायो होतो कि हि जाय क ओख अपनो हक्क म कर ले।
परमेश्वर की मांग
“अब, हे इस्राएल, तोरो परमेश्वर यहोवा तोरो सी चाहवय हय, कि तय अपनो परमेश्वर को भय मान क ओको रस्ता पर चलजो, ओको सी प्रेम रखजो, अऊर अपनो पूरो मन अऊर अपनो पूरो जीव सी ओकी सेवा करजो, अऊर परमेश्वर की आज्ञा अऊर विधि मय अज तोख सुनावय हय ओख पालन करजो, जेकोसी तोरो भलो होयेंन? सुन, स्वर्ग अऊर सब सी उंचो स्वर्ग, अऊर धरती अऊर ओको म जो भी हय, ऊ सब तोरो परमेश्वर यहोवा कोच आय। तब भी परमेश्वर न ओको पूर्वजों सी दया अऊर प्रेम रख्यो, अऊर ओको बाद तुम लोगों ख जो ओकी सन्तान हय सब देश को लोगों को बीच म सी चुन्यो हय, जसो कि अज को दिन भी हय। येकोलायी अपनो दिल ख खतना करो, अऊर जादा जिद्दी मत बन्यो रहो। कहालीकि तुम्हरो परमेश्वर यहोवा उच ईश्वरों को परमेश्वर अऊर प्रभुवों को प्रभु आय, ऊ महान, ताकतवर अऊर भय वालों परमेश्वर आय, जो कोयी को पक्ष नहीं करय अऊर घूस नहीं लेवय हय। ऊ अनाथों अऊर विधवा को न्याय करय, अऊर परदेशियों सी असो प्रेम करय कि उन ख खाना अऊर कपड़ा देवय हय। येकोलायी तुम भी परदेशियों सी प्रेम रखजो; कहालीकि तुम भी मिस्र देश म परदेशी होतो। अपनो परमेश्वर को भय मानजो; ओकी सेवा करजो अऊर ओको सी सम्बन्ध रखजो, अऊर ओको च नाम की कसम देजो। उच तुम्हरी स्तुति को लायक हय; अऊर उच तोरो परमेश्वर आय, जो न तोरो साथ बड़ो महान अऊर भयानक काम करयो हय जो ख तय न अपनी आंखी सी देख्यो हय। तोरो पूर्वज जब मिस्र म गयो तब सिर्फ सत्तर आदमी होतो; पर अब तोरो परमेश्वर न तोरी गिनती अनगिनत कर दियो हय।
Lodhi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.