Lodhi Bible
व्यवस्थाविवरन 9
लोगों को आज्ञा नहीं माननो
“हे इस्राएल सुन, अज तय यरदन नदी को पार येकोलायी जान वालो हय, कि असो देशों ख जो तोरो सी बड़ो अऊर ताकतवर हय, अऊर असो बड़ो नगरों ख जेकी शहरपनाह की दीवाल बहुत बड़ी-बड़ी हंय, अपनो हक्क म करन वालो हय। उन्म अनाकवंशी जो ऊंचो अऊर ताकतवर दानव को जसो आय, जिन्को हाल तय जानय हय, अऊर ओको बारे म तय न यो सुन्यो हय, कि अनाकवंशियों को आगु कौन खड़ो रह सकय हय? येकोलायी अज तय यो जान ले कि जो तोरो आगु भस्म करन वाली आगी को समान पार जान वालो हय। ऊ तोरो परमेश्वर यहोवा हय; अऊर ऊ उन्को सत्यानाश करेंन, अऊर ऊ उन्को तोरो आगु दबाय देंन; अऊर परमेश्वर न जो प्रतिज्ञा करी ओको अनुसार तय उन्को तुरतच नाश कर डालेंन।”
“जब तोरो परमेश्वर उन्ख तोरो आगु सी निकाल देयेंन तब यो मत सोचजो कि परमेश्वर तोरो न्याय को वजह तोख यो देश को अधिकारी होन लायी लायो हय, पर उन देश की दुष्टता को वजह परमेश्वर उन्ख तोरो आगु सी निकालय हय। तय जो उन्को देश को अधिकारी होन लायी जाय रह्यो हय, येको मतलब तोरो धर्म यां मन कि सिधायी नहीं आय; तोरो परमेश्वर जो उन राष्ट्रों ख तोरो आगु सी निकालय हय, जेको मतलब उन्की दुष्टता आय, अऊर यो कि जो वचन ओन अब्राहम, इसहाक, अऊर याकूब, तोरो पूर्वजों की कसम खाय क दी होती, ओख ऊ पूरो करनो चाहवय हय।”
“येकोलायी जान ले कि तोरो परमेश्वर, जो तोख ऊ अच्छो देश देवय हय कि तय ओको हक्कदार हो, ऊ तोरो न्यायीपन को कारण नहीं देवय हय; कहालीकि तय त एक तेड़ो लोग हय। या बात ख याद रख अऊर कभी भी मत भूलजो, कि सुनसान जागा सी तय न कसो रीति सी अपनो परमेश्वर ख गुस्सा दिलायो होतो; अऊर जो दिन सी तय मिस्र देश सी निकाल्यो अऊर यो जागा तक पहुंच्यो तब तक तुम न परमेश्वर को विरुद्ध विरोध करतो रह्यो हय। फिर होरेब पहाड़ी को जवर भी तुम न परमेश्वर ख गुस्सा दिलायो, अऊर ऊ गुस्सा म होय क तुम्ख नाश करनो चाहत होतो। जब मय ऊ वाचा ख जो परमेश्वर न तुम्हरो लायी गोटा की फरसी लेन लायी पहाड़ी पर चढ़ गयो, तब उत चालीस रात-दिन पहाड़ी पर रह्यो; अऊर नहीं खाना खायो अऊर नहीं पानी पियो। अऊर परमेश्वर न मोख अपनोच हाथ सी लिखी हुयी गोटा की दोयी फरसी ख सौंप दियो, अऊर उच वचन जेख परमेश्वर न पहाड़ी को ऊपर आगी को बीच म सी जो दिन तुम पहाड़ी को जवर जमा भयो होतो तुम सी कह्यो हि सब ओको पर लिख्यो होतो। अऊर चालीस दिन अऊर चालीस रात बीत जानो पर परमेश्वर न गोटा की दोय वाचा की फरसी मोख दे दी। अऊर परमेश्वर न मोरो सी कह्यो, उठ, यहां सी जल्दी सी नीचे जा; कहालीकि तोरो लोग जिन्ख तय मिस्र सी निकाल क लायो हय हि बिगड़ गयो हय; जो रस्ता पर चलन की आज्ञा मय न उन्ख दी होती, ओख ओन तुरतच छोड़ दियो हय; अऊर ओन अपनो लायी एक मूर्ती बनाय ली हय।”
“फिर यहोवा न मोरो सी कह्यो, मय न उन लोगों ख देख लियो, हि तेड़ो लोग हय; येकोलायी अब तय मोख मत रोक, कि मय ओख मार डालूं, अऊर धरती को ऊपर सी ओको नाम मिटाय डालूं, अऊर मय ओको सी बढ़ क एक बड़ी अऊर सामर्थी राष्ट्र तोरो सी पैदा करूं। तब मय वापस नीचे उतर आयो, अऊर पहाड़ी आगी सी जलत होती; अऊर मोरो दोयी हाथ म वाचा की दो फरसी होती। अऊर मय न देख्यो कि तुम न अपनो परमेश्वर को खिलाफ बड़ो पाप करयो हय; अऊर अपनो लायी एक बछड़ा की मूर्ती बनायी हय, अऊर जो रस्ता सी चलन की आज्ञा परमेश्वर न तुम्ख दी होती। ओख छोड़ दियो हय। तब मय न उन दोयी फरसी क अपनो दोयी हाथ सी ले क फेंक दियो, अऊर तुम्हरी आंखी को आगु ओख तोड़ डाल्यो। तब तुम्हरो ऊ पाप जो परमेश्वर को नजर म बुरी हय करी अऊर ओख गुस्सा दिलायी, मय परमेश्वर को आगु मुंह को बल गिर गयो अऊर पहिलो को जसो, चालीस दिन अऊर चालीस रात तक नहीं त खाना खायो अऊर नहीं पानी पियो। मय त परमेश्वर को गुस्सा अऊर जलजलाहट सी डर रह्यो होतो, कहालीकि ऊ तुम सी इतनो गुस्सा भयो कि ऊ तुम्ख मार डालन पर होतो। पर परमेश्वर न उस बार भी मोरी सुन ली। अऊर परमेश्वर हारून सी इतनो गुस्सा भयो कि ओको भी सत्यानाश करनो चाह्यो; पर उच समय मय न हारून लायी प्रार्थना करी। अऊर मय न ऊ बछड़ा जो क बनाय क तुम पापी भय गयो होतो, आगी म डाल क जलाय दियो; अऊर फिर ओख पीस पीस क चूर चूर कर डाल्यो कि वहां धूल को जसो बारीक भय गयो; अऊर ओकी लाखड़ ख वा नदी म फेंक दियो जो पहाड़ी सी निकल क नीचे बहत होती।”
“फिर तबेरा, अऊर मस्सा, अऊर किब्रोत-हत्तावा म भी तुम न परमेश्वर ख गुस्सा दिलायो होतो। फिर जब परमेश्वर न तुम ख कादेश-बर्ने सी यो कह्य क भेज्यो, जाय क ऊ देश ख अपनो हक्क म ले लेवो, जो मय न तुम्ख दियो हय। तब भी तुम न अपनो परमेश्वर को खिलाफ विरोध करयो अऊर नहीं त ओको विश्वास करयो, अऊर नहीं ओकी बात मानी। जो दिन सी मय तुम्ख जानू हय ऊ दिन सी तुम परमेश्वर को खिलाफ विद्रोह करतो रह्यो हय।”
“मय परमेश्वर को आगु चालीस दिन अऊर चालीस रात तक मुंह को बल पड़्यो रह्यो, कहालीकि परमेश्वर न कह्य दियो होतो, कि ऊ तुम्हरो सत्यानाश करेंन। अऊर मय न परमेश्वर सी यो प्रार्थना करी, हे प्रभु परमेश्वर, तय अपनो लोगों ख, जेख अपनो सामर्थ सी मिस्र देश सी छुड़ायो होतो, ओख नाश मत कर।” अपनो दास अब्राहम, इसहाक, अऊर याकूब ख याद कर; अऊर इन लोगों की कठोरता, अऊर दुष्टता, अऊर पाप पर ध्यान मत दे, असो मत हो कि जो मिस्र देश सी तय हम्ख निकाल लायो हय, उत को लोग कहन लगे, कि परमेश्वर न उन्ख ऊ देश म जेख देन को वचन दियो होतो उत नहीं पहुंचाय सक्यो, अऊर उन्को सी दुस्मनी भी रखत होतो, योच वजह ओन सुनसान जागा म मार डाल्यो होतो। हि तोरो लोग आय, जेख तय अपनो बड़ी शक्ति अऊर ताकतवर हाथ सी मिस्र देश सी निकाल लायो हय।
Lodhi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.