व्यवस्थाविवरन 8

उत्तम देश

1“पूरी आज्ञा मय तोख अज सुनाऊ हय उन सब को पालन करजो, येकोलायी कि तुम जीन्दो रहो अऊर बढ़तो रहो, अऊर जो देश को विषय म परमेश्वर न तुम्हरो पूर्वजों सी कसम खायी होती, ओको म जाय क अपनो हक्कदार होय जावो। 2अऊर याद रखजो कि तोरो परमेश्वर यहोवा उन चालीस साल म तोख पूरो सुनसान जागा म सी येकोलायी लायो हय, कि ऊ तोख नम्र बनायेंन, अऊर तोरी परीक्षा कर क् यो जानेंन कि तोरो मन म का हय, अऊर का तय ओकी आज्ञावों को पालन करेंन यां नहीं। 3ओन तोख नम्र बनायो, अऊर भूख को अनुभव भी दियो, फिर ऊ मन्ना, जेख तय अऊर तोरो बापदादा नहीं जानत होतो, ऊ तोख खिलायो; येकोलायी कि ऊ तोख सिखायो कि आदमी रोटी सीच नहीं जीन्दो रह्य ,पर जो वचन परमेश्वर को मुंह सी निकलय हय ओकोसी जीन्दो रह्य हय। 4यो चालीस साल म तोरो कपड़ा पुरानो नहीं भयो, अऊर नहीं तोरो पाय नहीं सुज्यो। 5फिर अपनो मन म यो सोच, की जसो कोयी अपनो बेटा ख ताड़ना देवय हय वसोच तोरो परमेश्वर यहोवा तोख अनुशासित करय हय। 6येकोलायी अपनो परमेश्वर की आज्ञावों को पालन करतो हुयो ओको रस्ता पर चलजो, अऊर ओको डर रखजो। 7कहालीकि तोरो परमेश्वर यहोवा तोख एक अच्छो देश म ले क जाय रह्यो हय, जित नदियां, झरना अऊर पहाड़ी सी निकल्यो हुयो गहरो स्रोता को देश आय। 8फिर ऊ गहूं, जौ, अंगूर की बेला अंजीरों, अऊर अनारों को देश हय; अऊर तल वालो जैतून अऊर शहेद को भी देश आय। 9ऊ देश म खाना की कमी नहीं होयेंन, अऊर नहीं ओको म तोख कोयी चीज की कमी होयेंन; उत को गोटा लोहा युक्त आय, अऊर उत की पहाड़ी म सी तय तांबा खोद क निकाल सकजो। 10अऊर तय भरपेट खाजो, अऊर ऊ अच्छो देश को वजह जो तोरो परमेश्वर तोख देयेंन ओख धन्य मानजो।”

प्रभु ख भूलन को खिलाफ चेतावनी

11“येकोलायी सावधान रह्यजो, कहीं असो नहीं होय की अपनो परमेश्वर यहोवा ख भूल कर ओकी जो जो आज्ञा, नियम, अऊर विधि मय जो अज तोख सुनाऊ हय ओख पालन करनो छोड़ दे; 12असो नहीं हो की जब तय खाय क तृप्त हो, अऊर अच्छो अच्छो घर बनाय क ओको म रहन लग्यो, 13अऊर तोरो गाय-बईल अऊर शेरी-मेंढी की बढ़ोतरी होयेंन, अऊर तोरो सोना, चांदी, अऊर तोरो सब तरह को धन बढ़ेंन। 14तब तोरो मन म घमण्ड आय जाय, अऊर तय अपनो परमेश्वर यहोवा ख भूल जाये, जो तोख गुलामी सी मतलब मिस्र देश सी निकाल क लायो हय। 15अऊर ऊ बड़ो अऊर भयानक सुनसान जागा सी लायो हय, जित जहरीलो सांप अऊर बिच्छू अऊर सूखो देश होतो, ओन तोरो लायी चकमक की चट्टान सी पानी निकाल्यो होतो, 16अऊर तोख जंगल म मन्ना खिलायो, जेख तुम्हरो पुर्वज भी जानत नहीं होतो, अऊर तोरी परीक्षा करी कि आखिर म तोरो भला होय। 17अऊर कहीं असो मत सोचन लगजो कि यो सम्पत्ति मोरो च सामर्थ अऊर ताकत सी मोख मिली हय। 18पर तय अपनो परमेश्वर यहोवा ख याद रखजो, कहालीकि उच हय त तोख सम्पत्ति कमावन की सामर्थ येकोलायी देवय हय, कि जो वाचा ओन तोरो पूर्वजों सी कसम खाय क बान्धी होती ओख पूरो करजो, जसो अज भी हय। 19यदि तय अपनो परमेश्वर यहोवा ख भूल क दूसरों देवता को पीछू होये, अऊर उन्की पूजा अऊर प्रनाम करजो, त मय तोख अज समझाय देवय कि तुम सच म मर जावों। 20जो देश ख परमेश्वर तुम्हरो आगु सी नाश करयो हय, उन्कोच समान तुम भी अपनो परमेश्वर को वचन नहीं मानन सी नाश होय जायेंन।”