व्यवस्थाविवरन 7

परमेश्वर को अपनो लोग

(निर्गमन ३४:११-१६)

1“फिर जब तोरो परमेश्वर यहोवा तोख ऊ देश म जेको मुखियां होन लायी जावय हय उत पहुंचायेंन अऊर तोरो आगु सी हित्ती, गिर्गाशी, एमोरी, कनानी, परिज्जी, हिब्बी अऊर यबूसी नाम की बहुत सारो राज्य ख जो बड़ी अऊर सामर्थी हय सातों राज्य ख निकाल देयेंन। 2अऊर तोरो परमेश्वर यहोवा उन ख तोरो हाथ म कर देन, अऊर तय उन्ख हराय देयेंन; तब उन ख पूरो तरहसी नाश कर लेजो; उन्को सी वाचा मत बांधजो, अऊर उन्को पर दया मत करजो। 3अऊर ओको सी बिहाव को बन्धन मत बान्धजो, अऊर अपनी बेटी उन्ख मत देजो, अऊर उन्की बेटी अपनो बेटा को बिहाव लायी मत लेजो। 4कहालीकि ऊन तुम्हरी सन्तान ख मोरो पीछू चलन सी बहकायेंन, अऊर दूसरो भगवान की उपासना करायेंन; अऊर योच कारन यहोवा को गुस्सा तुम्हरो ऊपर भड़केंन, अऊर ऊ तोरो नाश कर डालेंन। 5उन लोगों सी असो बर्ताव करजो, की उन्की वेदियों ख गिराय डालजो। उन्को खम्बा ख तोड़ देजो। उन्की अशेरा नाम की मूर्ती ख काट क, अऊर उन्की खोदी मूर्तियों ख आगी म जलाय देजो। 6कहालीकि तय अपनो परमेश्वर यहोवा की पवित्र प्रजा आय; परमेश्वर न धरती पर को सब देश को लोगों म सी तोख चुन लियो हय कि तय ओकी प्रजा अऊर निजी धन ठहरन लायी। 7परमेश्वर न जो तुम्हरो सी प्रेम कर ख तुम ख चुन लियो, कारन यो नहीं होतो कि तुम गिनती म अऊर सब देश को लोगों सी जादा होतो, पर तुम त सब देश को लोगों सी गिनती म कम होतो; 8यहोवा न तुम ख अपनो ताकतवर हाथ सी तुम्ख मिस्र देश सी बाहेर निकाल्यो होतो, योच कारन आय कि ऊ तुम सी प्रेम रखय हय, अऊर वा कसम क भी पूरी करन चाहवय हय जो ओन तुम्हरो बापदादों सी खायी होती। 9येकोलायी जान ले कि तोरो परमेश्वर यहोवा योच एक परमेश्वर आय, यो विश्वास लायक हय, जो ओकोसी प्रेम करय अऊर ओकी आज्ञा मानय हय उन्को संग ऊ हजार पीढ़ी तक अपनी वाचा को पालन करय हय, अऊर उन्को पर दया करय हय; 10अऊर जो ओकोसी दुस्मनी रखय हय उन्को सी बदला ले ख नाश कर डालय हय, अपनो दुस्मन को बारे म यो देर नहीं करय, ऊ देखतो च ओको सी बदला लेयेंन। 11येकोलायी हि आज्ञावों , विधियों अऊर नियमों ख , जो मय अज तोख बताऊ हय ओख पालन करन करजो।”

आज्ञा मानन को फल

(व्यवस्थाविवरन २८:१-१४)

12“अऊर तुम हि नियमों ख सुन ख, ओको पालन करजो अऊर ओख अपनो व्यवहार म लाजो, त तोरो परमेश्वर यहोवा भी ऊ दया को वाचा को पालन करेंन जो ओन तोरो बापदादों सी प्रतिज्ञा करी होती; 13अऊर ऊ तोरो सी प्रेम रखेंन, अऊर तोख आशीर्वाद देयेंन, अऊर तोख गिनती म बढ़ायेंन; अऊर जो देश ओन तोरो बापदादों सी कसम खाय ख तोख देन ख कह्यो होतो ओको म ऊ तोरी सन्तान पर, अऊर अनाज, नयो अंगूरीरस, अऊर तोरो तेल पर आशीर्वाद देयेंन, अऊर तोरी गाय-बईल अऊर शेरी-मेंढी की बढ़ोतरी करेंन। 14तय सब देश को लोगों सी जादा धन्य होयजो; तोरो बीच म कोयी आदमी अऊर बाई बांझ नहीं रहेंन, अऊर तोरो पालतु पशु म भी कोयी असो नहीं रहेंन। 15‘अऊर यहोवा तोरो सी सब तरह की रोग दूर करेंन; अऊर मिस्र की बड़ी-बड़ी महामारी जेक तय जानय हय ओको म सी एक भी तोख लगनो नहीं देयेंन, यो सब तोरो दुश्मन क च लगेंन।’ 16अऊर देश देश को जितनो लोग ख तोरो परमेश्वर यहोवा तोरो हक्क म कर देंन, तय उन सब ख सत्यानाश करजो, उन्को पर दया मत दिखाजो, अऊर उन्को देवतावों कि उपासना मत करजो, नहीं त तय जाल म फस जाजो।”

17“यदि तय अपनो मन म सोचो, कि ऊ राष्ट्र जो मोरो सी जादा हय; त मय उन्ख कसो बाहेर निकाल सकू? 18तब भी उन्को सी मत डरजो, जो कुछ तोरो परमेश्वर यहोवा न फिरौन सी अऊर पूरो मिस्र सी करयो ओख अच्छो सी याद रखजो। 19जो बड़ो बड़ो परीक्षा को काम तय न अपनी आंखी सी देख्यो, अऊर जो चिन्ह, अऊर चमत्कार, अऊर जो ताकतवर हाथ, अऊर उद्धार को लायी बढ़ायो हुयो हाथ जेको द्वारा तोरो परमेश्वर न तोख निकाल क लायो, ओको अनुसार तोरो परमेश्वर ऊ सब लोग सी भी जेकोसी तय डरय हय करेंन। 20येको अलावा तोरो परमेश्वर उन्को बीच डंक मारन वाली माखियों ख भेजेंन। जेकोसी बच्यो हुयो अऊर तोरो आगु सी भग क लुक्यो हुयो लोगों ख भी नाश करेंन। 21तय ओकोसी डरजो मत; कहालीकि तोरो परमेश्वर तोरो बीच म हय, अऊर ऊ महान अऊर भय योग्य परमेश्वर हय। 22तोरो परमेश्वर ऊ राष्ट्रों ख तोरो आगु सी धीरू धीरू निकाल देयेंन; त तय एकदम सी ओख नहीं मार सकजो, नहीं त जंगल को जनावर आय ख तोरो नुकसान करेंन। 23तब भी तोरो परमेश्वर यहोवा ओख तोरो सी हराय देंन, अऊर जब तक नाश नहीं होय जायेंन तब तक ऊ उलझन म डालेंन। 24अऊर ऊ उन्को राजावों ख तोरो हाथ म सौंप देयेंन, अऊर तय उन को नाम धरती सी मिटाय डालजो; ओको म सी कोयी भी तोरो आगु खड़ो नहीं रह सकेंन, अऊर आखरी म तय ओख मार डालजो। 25उन्को देवतावों की खोदी हुयी मूर्तियों ख तुम आगी म जलाय देजो; जो चान्दी यां सोना ओको पर होना ओको लालच मत करजो, नहीं त तय ओको वजह जाल म फस जाजो; कहालीकि असी चीज तुम्हरो परमेश्वर यहोवा की नजर म घृणित हय। 26अऊर कोयी घृणित चिजे अपनो घर म मत लाजो, नहीं त तय भी ओको समान नाश होन की चीज बनजों; ओख सत्यानाश की चीज समझ क ओकोसी गुस्सा करजो अऊर ओकोसी लगाव मत रखजो; कहालीकि वा खराब चीज आय।”