व्यवस्थाविवरन 6

महान आज्ञा

1“यो वा आज्ञा, अऊर ऊ विधियां अऊर नियम आय, जो तुम्ख सिखावन लायी तुम्हरो परमेश्वर यहोवा न आज्ञा दी हय, कि तुम उन्ख ऊ देश म मानो जेख अपनो हक्क म लेन लायी उत जाय रह्यो हय; 2अऊर तय अऊर तोरो बेटा अऊर तोरो पोता परमेश्वर को डरतो हुयो ओकी सब विधियां अऊर आज्ञावों ख, जो मय तोख सुनावय हय, अपनो उमर भर चलतो रहजो, जेको सी तय बहुत दिन तक बन्यो रहे। 3हे इस्राएल, सुन अऊर असोच करन की कोशिश कर; येकोसी तोरो भला होयेंन, अऊर तोरो पूर्वजों को परमेश्वर यहोवा को वचन को अनुसार ऊ देश म जहां दूध अऊर दही की धारायें बहय हय तुम बहुत होय जावो।”

4“हे इस्राएल, सुन, यहोवा हमरो परमेश्वर आय, यहोवा एकच हय; 51तय अपनो परमेश्वर यहोवा सी अपनो पूरो मन, अऊर पूरो जीव, अऊर पूरी शक्ति को साथ प्रेम रखजों। 6अऊर यो आज्ञा जो मय अज तोख सुनावय हय हि तोरो मन म बनी रह्य; 7अऊर तय उन्ख अपनो बाल बच्चां ख समझाय क सिखाजो, अऊर जब तय घर म बैठ्यो, रस्ता पर चलय, सोतो, उठतो, इन की चर्चा करतो रहजो। 8अऊर उन्ख अपनो हाथ पर निशान को रूप म बांधजो। अऊर यो तोरी दोयी आंखी को बीच म चिन्ह जसो हो। 9अऊर उन्ख अपनो अपनो घर की चौखट अऊर अपनो फाटक पर लिखजो।”

आज्ञा उल्लंघन की चेतावनी

10“जब तोरो परमेश्वर यहोवा तोख ऊ देश म पहुंचायेंन जेकी प्रतिज्ञा ओन तोरो पूर्वजों अब्राहम, इसहाक अऊर याकूब सी करी होती, ऊ तोख देयेंन। बड़ो अऊर अच्छो नगर, जो तय न नहीं बनायो हय, 11अऊर अच्छी चिजों सी भरयो हुयो घर जो तय न नहीं बनायो, आयतो खोद्यो कुंवा, जो तय न नहीं बनायो, अंगूर अऊर जैतून को बेला, जो तय न नहीं लगायो, हि सब चीज ऊ देन, अऊर तय खाय क तृप्त होयजो, 12तब सावधान रह्यजो, कहीं असो न होय कि तय यहोवा ख भूल जाये, जो तोख मिस्र की गुलामी सी निकाल लायो हय। 13अपनो परमेश्वर यहोवा को भय मानजो; ओकीच सेवा करजो, अऊर ओकीच नाम की कसम खाजो। 14तुम दूसरो देवतावों को, मतलब चारों तरफ को देश को लोगों को देवतावों को पीछु मत जाजो; 15कहालीकि तोरो परमेश्वर यहोवा जो तोरो बीच म हय ऊ जलन रखन वालो परमेश्वर आय; कहीं असो मत होय कि तोरो परमेश्वर को गुस्सा तोरो ऊपर भड़केंन, अऊर ऊ तोख धरती पर सी मिटाय डालेंन।”

16“तय अपनो परमेश्वर यहोवा की परीक्षा मत लेजो, जसो कि तुम न मस्सा म ओकी परीक्षा ली होती। 17अपनो परमेश्वर यहोवा की आज्ञावों अऊर गवाहियों अऊर विधियों ख जो मय न तोख दी हय, सावधानी को साथ मानजो। 18अऊर जो काम यहोवा की नजर म अच्छो अऊर भलो हय उच करजो, जेकोसी तोरो भला होयेंन, अऊर जो अच्छो देश को विषय म यहोवा न तोरो पूर्वजों सी कसम खायी ओको म तय जाय क ओको हक्कदार बन जाजो; 19कि तोरो पूरो दुश्मन तोरो आगु सी दूर होय जायेंन, जसो कि यहोवा न कह्यो होतो।”

20“तब आगु को जब तोरी सन्तान तोरो सी पूछेंन, या गवाही अऊर विधि अऊर नियम, जेको मानन की आज्ञा हमरो परमेश्वर यहोवा न तोख दी हय, येको मतलब का हय? 21तब उन सी कह्यजो, जब हम मिस्र म फिरौन को गुलाम होतो, तब यहोवा न बड़ी सामर्थ सी हम ख मिस्र देश सी निकाल क लायो होतो; 22अऊर यहोवा न हमरो देखतो हुयो मिस्र म फिरौन अऊर ओको पूरो घराना क दु:ख देन वालो बड़ो बड़ो चिन्ह चमत्कार करयो; 23अऊर हम ख उत सी निकाल क यो देश म पहुंचायो, जेको विषय म ओन हमरो पूर्वजों सी कसम खायी होती, कि यो देश हम्ख सौंपेंन। 24अऊर यहोवा न हम ख या सब विधियां पालन करन की आज्ञा दी हय, येकोलायी कि हम अपनो परमेश्वर यहोवा सी डरे, अऊर या रीति सी हमेशा हमरो भला होय, अऊर ऊ हम ख बचाय क रखेंन, जसो कि अज को दिन हय। 25अऊर यदि हम ओकी आज्ञा को अनुसारच सब नियम ख मानन म चौकसी करबोंन, त ऊ हमरो सी न्यायीपन ठहरेंन।”