व्यवस्थाविवरन 5

दस आज्ञा

(निर्गमन २०:१-१७)

1मूसा न पूरो इस्राएलियों ख बुलाय क कह्यो, “हे इस्राएलियों, जो जो विधि अऊर नियम मय अज तुम्ख बताऊ हय ऊ सुनो, येकोलायी कि उन्ख सीख क पालन करो। 2हमरो परमेश्वर यहोवा न होरेब पहाड़ी पर हम सी वाचा बान्धी। 3यो वाचा ख परमेश्वर न हमरो पूर्वजों सी नहीं, हम सीच बान्धी हय, जो अज को दिन तक जीन्दी हंय। 4परमेश्वर न ऊ पहाड़ी पर आगी को बीच म सी तुम लोगों सी आमने-सामने बाते करी; 5ऊ आगी को डर सी तुम पहाड़ी पर नहीं चढ़्यो होतो, येकोलायी मय परमेश्वर को वचन तुम ख बतावन लायी तुम्हरो अऊर परमेश्वर को बीच म खड़ो रह्यो।”

“तब यहोवा न कह्यो, 6मय तोरो परमेश्वर यहोवा आय, जो तुम्ख मिस्र देश सी निकाल लायो हय, जित तुम गुलामी म होतो।”

7तय मोख छोड़ दूसरो ख परमेश्वर कर क् नहीं मानजो।

8तय अपनो लायी कोयी मूर्ति खोद क मत बनाजो, अऊर नहीं कोयी की मूर्ती बनाजो जो आसमान म, यां धरती पर, यां धरती को खल्लो पानी म हय; 9तय उन्ख झुक क दण्डवत मत करजो अऊर नहीं उन्की उपासना करजो; कहालीकि मय तोरो परमेश्वर यहोवा जलन रखन वालो ईश्वर आय, अऊर जो मोरो सी दुश्मनी रखय हंय उन्को टुरा, नाती, अऊर पन्तियों ख दुष्कर्म को दण्ड देऊ हय, 10अऊर जो मोरो सी प्रेम रखय हंय अऊर मोरी आज्ञावों ख मानय हंय उन हजारों पीढ़ियों तक दया करू हय।

11तय अपनो परमेश्वर यहोवा को नाम बेकार म मत लेजो; कहालीकि जो व्यक्ति यहोवा को नाम बेकार लेवय ऊ उन्ख निर्दोष नहीं ठहरायेंन।

12तय आराम दिन ख मान क पवित्र रखजो, जसो तोरो परमेश्वर यहोवा न तोख आज्ञा दी। 13तय छय दिन तक अपनो काम-काज करजो। 14पर सातवों दिन तोरो परमेश्वर यहोवा लायी आराम को दिन हय; ओको म नहीं त तय कोयी काम काज करजो, नहीं तोरो टुरा, नहीं तोरी टुरी, नहीं तोरो दास, नहीं तोरी दासी, नहीं तोरो बईल, नहीं तोरो गधा, नहीं तोरो कोयी जनावर, नहीं कोयी परदेशी भी जो तोरो नगरों को अन्दर हो; जेको सी तोरो दास अऊर तोरी दासी भी तोरो आगु आराम करे। 15अऊर यो बात ख याद रखजो कि मिस्र देश म तय खुद दास होतो, अऊर उत सी तोरो परमेश्वर न सामर्थ को द्वारा निकाल्यो होतो; यो वजह तोरो परमेश्वर यहोवा तोख आराम दिन ख मानन की आज्ञा देवय हय।

16अपनो माय-बाप को आदर करजो, जसो की तोरो परमेश्वर यहोवा तोख आज्ञा दी हय; जेको सी जो देश तोरो परमेश्वर यहोवा तोख देवय हय ओको म तय बहुत दिन तक रहनो पाये, अऊर तोरो भलो हो।

17तय हत्या मत करजो।

18तय व्यभिचार मत करजो।

19तय चोरी मत करजो।

20तय कोयी को खिलाफ झूठी गवाही मत देजो।

21तय कोयी की पत्नी को लालच मत करजो, अऊर नहीं कोयी को घर, उन्को खेत, उन्को दास, उन्की दासी, उन्को बईल यां गधा को, अऊर नहीं उन्को कोयी अऊर चिजों को लालच करजो।

22“योच वचन यहोवा न ऊ पहाड़ी पर आगी, अऊर बादर, अऊर बड़ो अन्धकार को बीच म सी तुम्हरी पूरी मण्डली सी पुकार क कह्यो; अऊर येको सी जादा अऊर कुछ नहीं कह्यो। अऊर उन्ख ओन गोटा की दोय पट्टियों पर लिख क मोख दे दियो।”

परमेश्वर को तेज सी लोगों को डर जानो

(निर्गमन २०:१८-२१)

23“जब पहाड़ी आगी सी जर रह्यो होतो, अऊर तुम न ऊ आवाज ख अन्धारो को बीच म सी आतो सुन्यो, तब तुम अऊर तुम्हरो कुलों को सब मुखिया अऊर तुम्हरो बुजूर्ग मोरो जवर आयो; 24अऊर तुम कहन लग्यो, हमरो परमेश्वर यहोवा न हम ख अपनो तेज अऊर अपनी महिमा दिखायी हय, अऊर हम न ओकी आवाज आगी को बीच म सी आतो सुन्यो; अज हम न देख लियो कि परमेश्वर आदमी सी बाते करयो, तब भी लोग जीन्दो रह्यो। 25अब हम कहाली मर जाबो? असी बड़ी आगी हम ख भस्म कर देयेंन; अऊर यदि हम अपनो परमेश्वर यहोवा की आवाज फिर सी सुनबो, त मर जाबोंन। 26पूरो मनुष्यों म सी असो कौन सो मनुष्य हय जेन आगी को बीच म सी जीन्दो परमेश्वर की आवाज सुनी अऊर ओख बोलतो हुयो सुन्यो जसो हम न सुन्यो होतो अऊर ऊ तब भी जीन्दो रह्यो? 27येकोलायी मूसा तय जवर जा, अऊर जो कुछ हमरो परमेश्वर यहोवा कहेंन ओख सुन ले; अऊर जो कुछ कहेंन ओख हम सी कह्यजो; हम ओकी सुनबोंन अऊर वसो करबोंन।”

28“जब तुम मोरो सी या बाते कह्य रह्यो होतो तब यहोवा न तुम्हरी बाते सुनी; तब ओन मोरो सी कह्यो, इन लोगों न जो बाते तोरो सी कही हंय मय न सुनी हंय; इन्न जो कुछ कह्यो ऊ अच्छो कह्यो।” 29अच्छो होतो कि उन्को मन हमेशा असोच बन्यो रह्यतो, कि हि मोरो डर मानतो हुयो मोरी सब आज्ञावों पर चलतो, जेको सी उन्की अऊर उन्को कुल की हमेशा हमेशा लायी भलायी होती! 30येकोलायी तय जाय क उन्को सी कह्य दे, कि अपनो अपनो डेरा म वापस चली जावो। 31पर तय, मूसा, इतच मोरो जवर खड़ो रह, अऊर मय हि पूरी आज्ञाये अऊर विधियां अऊर नियम जिन्ख तोख उन्ख सिखानो हय तोख बताऊ हय, जेको सी हि ऊ देश म, जेको हक्क मय उन्ख देन पर हय उन्ख हि मानेंन।

32येकोलायी तुम सावधानी सी अपनो काम करजो; परमेश्वर यहोवा की आज्ञा को अनुसार नहीं त दायो मुड़जो अऊर नहीं बायो मुड़जो। 33जो रस्ता पर चलन की आज्ञा तुम्हरो परमेश्वर यहोवा न तुम ख दी हय ऊ पूरो रस्ता पर चलतो रहो, कि तुम जीन्दो रहो, अऊर तुम्हरो भलो हो, अऊर जो जमीन ख तुम हक्क म लेन वालो हय ओको म तुम सदा बन्यो रहो।