व्यवस्थाविवरन 4

मूसा की शिक्षा

1मूसा न कह्यो, “अब, हे इस्राएल, जो जो आज्ञा अऊर नियम मय तुम्ख सिखानो चाहऊ हय उन्ख सुन लेवो, अऊर उन पर चलो; जेको सी तुम जीन्दो रहो, अऊर जो देश तुम्हरो पूर्वजों को परमेश्वर यहोवा तुम्ख देवय हय ओको म जाय क ओको अधिकारी बन जावो। 2जो आज्ञा मय तुम ख सुनाऊ हय ओको म नहीं कुछ बढ़ाजो, अऊर घटाजो; तुम्हरो परमेश्वर यहोवा की जो जो आज्ञा मय तुम्ख सुनाऊ हय उन्ख तुम पालन करो। 3तुम न त अपनी आंखी सी देख्यो हय कि बालपोर देवता को वजह यहोवा न का का करयो; यानेकि जितनो आदमी बालपोर देवता को पीछू भय गयो होतो उन पूरो ख तुम्हरो परमेश्वर न तुम्हरो बीच म सी सत्यानाश कर डाल्यो; 4पर तुम जो अपनो परमेश्वर सी जुड़्यो रहनवालो अज तक सब को सब अज तक जीन्दो हय।”

5सुनो, मय न त अपनो परमेश्वर यहोवा की आज्ञा को अनुसार तुम्ख आज्ञा अऊर नियम सिखायो हंय, कि जो देश को अधिकारी होन लायी जावय हय ओको म तुम उन्को अनुसार चलो। 6येकोलायी तुम विश्वास सी उन्को पालन करजो; कहालीकि अऊर देशों को लोगों को आगु तुम्हरी बुद्धि अऊर समझ येको सी प्रगट होयेंन, मतलब हि इन सब विधियों ख सुन क कहेंन, कि निश्चय यो देश बुद्धिमान अऊर समझदार हय।

7देखो, कौन सी असो देश हय जेको देवता ओको जवर रह्य हय जसो हमरो परमेश्वर, जब हम ओख पुकारजे हंय, ऊ हमरी सुनय हय। 8फिर असो कौन सो महान देश हय जेको जवर असी न्याय विधि अऊर नियम हय, जसो कि यो पूरी व्यवस्था जेक मय अज तुम्हरो आगु रखू हय? 9“तुम अपनो बारे म सावधान रहो, अऊर अपनो मन की बड़ी चौकसी करो! कही असो नहीं होय कि जो जो बाते तुम न अपनी आंखी सी देखी उन्ख भूल जावो, अऊर वा बाते तुम्हरो मन सी जीवन भर लायी जाति रहे; पर तुम उन बातों ख अपनो टुरा अऊर नाती ख सिखाजो। 10विशेष कर क् ऊ दिन की बाते जब तुम होरेब पहाड़ी को जवर अपनो परमेश्वर को आगु खड़ो होतो, जब परमेश्वर न मोरो सी कह्यो होतो, उन लोगों ख मोरो जवर जमा कर कि मय उन्ख अपनो आज्ञा सुनाऊ, जेको सी हि सीखे, ताकि जितनो दिन हि धरती पर जीन्दो रहे उतनो दिन मोरो भय मानतो रहे, अऊर अपनो बाल बच्चा ख भी योच सिखाये।”

11तब तुम जवर जाय क ऊ पहाड़ी को खल्लो खड़ो भयो, अऊर ऊ पहाड़ी आगी सी जर रह्यो होतो, अऊर ओकी लौ स्वर्ग तक पहुंचत होती, अऊर ओको चारयी तरफ अन्धारो, अऊर बादर, अऊर घोर अन्धकार छायो हुयो होतो। 12तब परमेश्वर न ऊ आगी को बीच म सी बाते करी; बातों की आवाज त तुम ख सुनायी पड़्यो पर कोयी रूप नहीं दिख्यो, केवल आवाजच आवाज सुनायी पड़ी। 13अऊर यहोवा न तुम ख अपनो वाचा को दस वचनों ख मानन की आज्ञा दी; अऊर उन्ख गोटा की दोय पाटियों पर लिख दियो। 14अऊर मोख यहोवा न उच समय तुम्ख विधि अऊर नियम सिखान की आज्ञा दी, येकोलायी कि जो देश को कब्जा लेन लायी तुम जाय रह्यो हय ओको म तुम उन्को पालन करो।

मूर्तिपूजा को विरुद्ध चेतावनी

15“तुम खुद बहुत सावधान रह्यजो। कहालीकि जब यहोवा न तुम सी होरेब पहाड़ी पर आगी को बीच म सी बाते करी तब तुम ख कोयी रूप नहीं दिखायी पड़्यो, 16कही असो नहीं होय कि तुम बिगड़ क चाहे आदमी चाहे बाई को जसो अपनो लायी मूर्ति बनाये, 17चाहे धरती पर चलन वालो कोयी जनावर, चाहे आसमान म उड़न वालो कोयी पक्षी को, 18चाहे जमीन पर रेंगन वालो कोयी जन्तु, चाहे धरती को पानी म रहन वाली कोयी मच्छी को रूप की कोयी मूर्ति खोद क बनाय लेवो, 19यां असो नहीं होय कि जब तुम आसमान को तरफ आंखी उठाय क सूरज, चन्दा, अऊर तारा ख, यानेकि आसमान को पूरो तारागन देखो, तब बहक क उन्ख प्रनाम कर क् उन्की सेवा करन लगो जिन्ख तुम्हरो परमेश्वर न धरती पर को सब देश वालो लायी रख्यो हय। 20अऊर तुम ख परमेश्वर न लोहा की भट्ठी को जसो मिस्र देश सी निकाल क आयो हय, येकोलायी कि तुम ओको निज लोग अऊर ओकी निज जायजाद ठहरो, जसो अज प्रगट हय। 21तब तुम्हरो वजह यहोवा न मोरो सी गुस्सा कर क् यो कसम खायी, तय यरदन नदी को ओनपार नहीं जानो पाजो, अऊर जो उत्तम देश इस्राएलियों को परमेश्वर यहोवा उन्ख उन्को निज भाग कर क् देवय हय ओको म तय सिर नहीं पाजो। 22मोख योच देश म मरनो हय, मय यरदन नदी को ओन पार नहीं जाय सकू; पर तुम ओन पार जाय क ऊ उत्तम देश को अधिकारी होय जावों। 23येकोलायी खुद तुम सावधान रहो, कही असो नहीं होय कि तुम ऊ वाचा ख भूल क, जो तुम्हरो परमेश्वर न तुम सी बान्धी हय, कोयी अऊर चिज की मूर्ति खोद क बनावो, जेक तुम्हरो परमेश्वर यहोवा न तुम ख मना करयो हय। 24कहालीकि तुम्हरो परमेश्वर भस्म करन वाली आगी आय; ऊ जलन रखन वालो परमेश्वर आय।

25“यदि ऊ देश म रह्यतो-रह्यतो बहुत दिन बीत जान पर, अऊर अपनो बेटा अऊर नाती पैदा होनो पर, तुम बिगड़ क कोयी चिज को रूप की मूर्ति खोद क बनावो, अऊर यो रीति सी अपनो परमेश्वर यहोवा को प्रति बुरायी कर क् ओख गुस्सा दिलावो, 26त मय अज आसमान अऊर धरती ख तुम्हरो विरुद्ध साक्षी मान क कहू हय, कि जो देश को हक्कदार होन लायी तुम यरदन नदी को ओन पार जान पर हो ओको म तुम जल्दी सी नाश होय जावों; अऊर बहुत दिन रहनो नहीं पावों, पर पूरी रीति सी नाश होय जावों। 27अऊर परमेश्वर तुम ख देश देश को लोगों म बिखेर देयेंन, अऊर जिन राज्यों को बीच परमेश्वर तुम ख पहुंचायेंन उन्म तुम थोड़ो च रह्य जायेंन। 28अऊर उत तुम आदमी की बनायी हुयी लकड़ी अऊर गोटा को देवतावों की सेवा करो, जो नहीं देखय, अऊर नहीं सुनय, अऊर नहीं खावय, अऊर नहीं सूंघय हंय। 29पर उत भी यदि तुम अपनो परमेश्वर ख ढूंढो, त ऊ तुम ख मिल जायेंन, अगर तुम अपनो पूरो मन सी अऊर अपनो पूरो जीव सी ओख ढूंढो। 30आखरी को दिनों म जब तुम संकट म पड़ो, अऊर ये सब विपत्तियां तुम पर आय पड़े, तब तुम अपनो परमेश्वर यहोवा को तरफ फिरो अऊर ओकी बात मानो; 31कहालीकि तोरो परमेश्वर यहोवा दयालु परमेश्वर आय, ऊ तुम ख नहीं छोड़ेंन अऊर नहीं नाश करेंन, अऊर जो वाचा ओन तोरो पूर्वजों सी कसम खाय क बान्धी हय ओख नहीं भूलेंन।

32“जब सी परमेश्वर न आदमी की रचना कर क् धरती पर रख्यो तब सी ले क तय अपनो पैदा होन को दिन तक की बाते पूछ, अऊर आसमान को एक कोना सी दूसरो कोना तक की बाते पूछ, का असी बड़ी बात कभी हुयी यां सुनन म आयी हय? 33का कोयी लोगों न आगी को बीच म सी कभी परमेश्वर ख बोलतो हुयो सुन्यो हय जसो तुम न सुन्यो, अऊर तब भी जीन्दो रह्यो? 34तुम्हरो परमेश्वर न मिस्र देश म तुम्हरी आंखी को जवर करयो होतो, दुसरो देश म जाय क उन म सी एक देश हमरो लायी करयो। का वसोच कोयी दूसरो ईश्वर न आय क परीक्षा, अऊर चिन्ह, चमत्कार, युद्ध, बली हाथ, अऊर भयानक काम, अऊर उद्धार लायी फैल्यो हुयो भुजा सी कोयी देश ख अपनो लायी दूसरो देशों को बीच म सी चुनन को सहासिक काम करयो हय? 35यो सब तोख दिखायो गयो, कि तय जान लेजो कि यहोवाच परमेश्वर आय; ओको अलावा कोयी दूसरो नहाय। 36स्वर्ग सी ओन तोख अपनी वानी सुनायी कि तोख शिक्षा दे; अऊर धरती पर ओन बड़ी आगी दिखायी, अऊर ओको वचन आगी को बीच म सी तोख सुनायी पड़्यो। 37अऊर ओन तोरो पूर्वजों सी प्रेम रख्यो, येकोलायी ओन तुम्हरो कुल ख चुन लियो, अऊर अपनी उपस्थिति सी तोख अपनो बड़ो सामर्थ को द्वारा मिस्र सी निकाल लायो, 38कि तोरो सी बड़ी अऊर सामर्थी देश ख तोरो आगु सी निकाल क तोख उन्को देश म पहुंचायो, अऊर ओख तोरो निजी हिस्सा कर दियो, जसो अज को दिन दिखायी पड़य हय; 39येकोलायी अज जान ले, अऊर अपनो मन म सोच ले, कि ऊपर स्वर्ग म अऊर खल्लो धरती पर परमेश्वर को अलावा कोयी दूसरो नहाय। 40अऊर तय ओकी विधियों अऊर आज्ञावों ख पालन करो जो मय अज तोख सुनाऊ हय, येकोलायी कि तोरो अऊर तोरो पीछू तोरो वंश को भी भलो हो, अऊर जो देश तोरो परमेश्वर तोख देवय हय ओको म तय बहुत दिन रहे।”

यरदन नदी को पूर्व दिशा म शरणनगर

41तब मूसा न यरदन को पार पूर्व को तरफ तीन शहर अलग करयो, 42येकोलायी कि जो कोयी बिना जाने पहिले सी जलन रख क अपनो कोयी पड़ोसी ख मार डाले, ऊ उन्म सी कोयी नगर म भग जाये, अऊर अपनो ख बचा सकेंन। 43रूबेनी को वंश लायी बेसेर नगर जो जंगल को समथर देश म हय, अऊर गादी को कुल लायी गिलाद प्रदेश म रामोत शहर, अऊर मनश्शे को कुल लायी बाशान प्रदेश म गोलान शहर।

परमेश्वर की व्यवस्था को परिचय

44तब जो व्यवस्था मूसा न इस्राएलियों ख दी वा या आय। 45याच वा चेतावनी अऊर नियम आय जिन्ख मूसा न इस्राएलियों ख ऊ समय सुनायो जब हि मिस्र सी निकल्यो होतो, 46मतलब यरदन नदी को पार बेतपोर को आगु की घाटी म, एमोरी जाति को राजा सीहोन जो हेशबोन शहर म रहत होतो, जब मूसा अऊर इस्राएली मिस्र देश सी निकल आयो होतो तब उन्न राजा सीहोन ख हरायो होतो। 47अऊर उन्न ओको देश ख, अऊर बाशान को राजा ओग को देश ख, अपनो हक्क म कर लियो; यरदन नदी को पार पूर्व दिशा को तरफ रहन वालो एमोरी जाति को दोयी राजावों को यो देश होतो। 48यो देश अर्नोन की घाटी को कोना वालो अरोएर सी ले क सिय्योन पहाड़ी तक, जो हेर्मोन पहाड़ी भी कहलावय हय, 49ऊ पहाड़ी तक को पूरो देश, अऊर पिसगा पहाड़ी की ढलान को खल्लो को अराबा सागर तक, यरदन नदी को पार पूर्व को तरफ को पूरो अराबा हय।