व्यवस्थाविवरन 3

ओग राजा की हार

(गिनती २१:३१-३५)

1“तब हम मुड़ क बाशान ख जान वाली रस्ता सी चलन लग्यो; अऊर बाशान को राजा ओग अपनी पूरी सेना सहीत हमरो सामना करन ख निकल आयो, कि हम सी एद्रेई म लड़ायी करे।” 2तब परमेश्वर न मोरो सी कह्यो, ओको सी मत डर; कहालीकि मय ओकी पूरी सेना अऊर देश सहीत तोख दे देऊ हय; अऊर जसो तय न हेशबोन को रहन वालो एमोरियों को राजा सीहोन सी करयो हय, वसोच ओको सी भी करजो।

3यो तरह हमरो परमेश्वर न पूरी सेना सहीत बाशान को राजा ओग ख भी हमरो हाथ म कर दियो; अऊर हम न ओख यहां तक मारतो रह्यो कि उन्म सी कोयी भी नहीं बच पायो। 4उच समय हम न ओको पूरो शहरों ख ले लियो, कोयी असो शहर नहीं रह्यो जेक हम न उन्को सी नहीं लियो हो, यो रीति सी अर्गोब को पूरो देश, जो बाशान म ओग को राज्य म होतो अऊर ओको म साठ शहर होतो, ऊ हम न ले लियो। 5हि सब शहर किला वालो होतो, अऊर उन्की ऊची दीवार, अऊर द्वार अऊर पट्टियों सी गढ़ दियो गयो होतो, अऊर बिना दीवार को भी बहुत सो गांव होतो। 6अऊर जसो हम न हेशबोन को राजा सीहोन को शहरों सी करयो होतो वसोच हम न इन शहरों सी भी करयो, यानेकि सब बस्यो हुयो शहरों को लोगों, बाईयों अऊर बाल बच्चां सहीत सब ख सत्यानाश कर डाल्यो। 7पर हम्न सब पशुवों अऊर शहरों ख लूट लियो। 8यो तरह ऊ समय यरदन को पार रहनवालो एमोरियों को दोयी राजा सी अर्नोन को नाला सी हेर्मोन पहाड़ी तक को देश ले लियो। 9सीदोनी लोग हेर्मोन पहाड़ी ख सिर्योन कह्य हंय, अऊर एमोरी लोग सनीर कह्य हंय। 10सवान जागा को देश को सब नगर, अऊर पूरो गिलाद, अऊर सल्का, अऊर एद्रेई तक जो ओग को राज्य को शहर होतो, पूरो बाशान हम न ले लियो।

11जो रपाई लोग रह्य गयो होतो, उन्म सी केवल बाशान को राजा ओग बच गयो होतो, ओकी खटिया लोहा की बनी होती। ऊ त अम्मोनियों को रब्बा शहर म पड़्यो हय, खटिया की लम्बायी चौदा अऊर चौड़ायी चार हाथ होती।

देश की जमीन को बटवारा

(गिनती ३२:१-४२)

12“जो देश ख हम न कब्जा म ले लियो ऊ यो आय, यानेकि अर्नोन घाटी को किनार वालो अरोएर शहर सी ले क सब शहरों सहीत गिलाद को पहाड़ी देश को अरधो भाग, जेक मय न रूबेनियों अऊर गादियों ख दे दियो होतो।” 13अऊर गिलाद को बच्यो हुयो भाग, अऊर पूरो बाशान, यानेकि अर्गोब को पूरो देश जो ओग को राज्य म होतो, इन्क मय न मनश्शे को अरधो कुल ख दे दियो। सारा बाशान त रपाइयों को देश कहलावय हय। 14अऊर मनश्शेई याईर न गशूरियों अऊर माकावासियों की सीमा तक अर्गोब को पूरो देश ले लियो, अऊर बाशान को शहरों को नाम अपनो नाम पर हब्बोतयाईर रख्यो, अऊर उच नाम अज तक बन्यो हय।

15अऊर मय न गिलाद देश माकीर ख दे दियो, 16अऊर रूबेन अऊर गाद वंशियों ख मय न गिलाद सी ले अर्नोन को नाला तक को देश दे दियो, यानेकि ऊ नाला को बीच उन्की सीमा ठहरायो, अऊर यब्बोक नदी तक जो अम्मोनियों की सीमा हय; 17अऊर किन्नेरेत झील सी ले पिसगा की ढलान को खल्लो तक को अराबा को सागर तक, जो मृत सागर भी कहलावय हय, अराबा अऊर यरदन नदी को पूर्व को तरफ को पूरो देश भी मय न उन्खच दे दियो।

18“ऊ समय मय न तुम्ख यो आज्ञा दी, तुम्हरो परमेश्वर यहोवा न तुम्ख यो देश दियो हय कि ओख अपनो अधिकार म रखो; तुम सब लड़न वालो हथियार पकड़ क अपनो भाऊ इस्राएलियों को आगु आगु ऊ पार चलो।” 19पर तुम्हरी पत्नियां, अऊर बाल बच्चा, अऊर जनावर, जिन्ख मय जानु हय कि बहुत सो हंय, ऊ सब तुम्हरो शहरों म जो मय न तुम्ख दियो हंय रहे। 20अऊर जब यहोवा तुम्हरो भाऊवों ख वसोच आराम दे जसो कि ओन तुम ख दियो हय, अऊर हि ऊ देश को अधिकारी होय जाये जो तुम्हरो परमेश्वर यहोवा उन्ख यरदन नदी को ओनपार देवय हय; तब तुम भी अपनो अपनो अधिकार की जमीन पर जो मय न तुम्ख दी हय उत वापस आवो।

21तब मय न उच समय यहोशू ख आदेश दे क कह्यो, तय न अपनी आंखी सी देख्यो हय कि तोरो परमेश्वर यहोवा न इन दोयी राजावों सी का करयो हय; वसोच परमेश्वर उन सब राज्यों सी करेंन जिन्म तय पार होय क जाजो। 22उन सी मत डरजो; कहालीकि जो तुम्हरो तरफ सी लड़न वालो हय ऊ तुम्हरो परमेश्वर यहोवा हय।

मूसा कनान म सिरनो सी दूर

23“उच समय मय न यहोवा सी गिड़गिड़ाय क बिनती करी, 24हे प्रभु परमेश्वर, तय अपनो सेवक ख अपनी महिमा अऊर ताकतवर हाथ दिखान लग्यो हय; स्वर्ग म अऊर धरती पर असो कौन देवता हय जो तोरो समान सामर्थी काम कर सकेंन? 25येकोलायी मोख ओनपार जान दे कि यरदन नदी को ओनपार को ऊ उत्तम देश ख, यानेकि ऊ उत्तम पहाड़ी अऊर लबानोन ख भी देखनो पाऊं।”

26पर यहोवा तुम्हरो वजह मोरो सी गुस्सा भय गयो, अऊर मोरी नहीं सुनी; पर परमेश्वर न मोरो सी कह्यो, बस कर; यो बारे म फिर कभी मोरो सी बाते मत कर। 27पिसगा पहाड़ी की सेंडी पर चढ़ जा, अऊर पूर्व, पश्चिम, उत्तर, दक्षिन चारयी तरफ नजर कर क् ऊ देश ख देख ले; कहालीकि तय या यरदन नदी को ओनपार जानो नहीं पाजो। 28अऊर यहोशू ख आज्ञा दे, अऊर ओख हिम्मत दे क मजबूत बना; कहालीकि इन लोगों को आगु आगु उच जायेंन, अऊर जो देश तय देखजो ओख उतच उन्को निजी हिस्सा कर देयेंन। 29तब हम बेतपोर की आगु की घाटी म रुक्यो होतो।