व्यवस्थाविवरन 2

जंगल म भटकनो

1“तब वा आज्ञा को अनुसार, जो परमेश्वर न मोख दी होती, हम घुम क निकल्यो, अऊर लाल समुन्दर की रस्ता को सुनसान जागा को तरफ गयो; अऊर बहुत दिन तक सेईर पहाड़ी को बाहेर बाहेर चलतो रह्यो।”

2तब यहोवा न मोरो सी कह्यो, 3तुम लोगों ख यो पहाड़ी को बाहेर बाहेर चलतो हुयो बहुत दिन बीत गयो, अब घुम क उत्तर दिशा को तरफ चलो। 4अऊर तय लोगों ख मोरी या आज्ञा बता, कि तुम सेईर को रहन वालो अपनो भाऊ एसाव वंशियों की सीमा को जवर सी होय क जान पर हो; अऊर हि तुम सी डर जायेंन। येकोलायी तुम बहुत सावधान रहो; 5उन्ख मत छेड़ो; कहालीकि उन्को देश म सी मय तुम्ख पाय रखन की जागा तक नहीं देऊं, यो वजह मय न सेईर पहाड़ी एसावियों को अधिकार म कर दियो हय। 6तुम उन सी लेय क भोजन खाय सको अऊर पानी पी सको।

7कहालीकि तुम्हरो परमेश्वर यहोवा तुम्हरो हाथों को सब कामों को विषय म तुम्ख आशीर्वाद देतो आयो हय; यो सुनसान जागा म तुम्हरो चलनो फिरनो ऊ जानय हय; इन चालीस सालो म तुम्हरो परमेश्वर यहोवा तुम्हरो संग संग रह्यो हय; अऊर तुम ख कुछ कमी नहीं भयी।

8बल्की हम सेईर निवासी अऊर अपनो भाऊ एसावियों को जवर सी होय क, अराबा की रस्ता, अऊर एलत अऊर एस्योनगेबेर ख पीछू छोड़ क चल्यो। “तब हम मुड़ क मोआब को सुनसान रस्ता सी होय क चल्यो।”

9तब परमेश्वर न मोरो सी कह्यो, मोआबियों ख मत सताजो अऊर नहीं लड़ायी लायी छोड़जो, कहालीकि मय उन्को देश म सी कुछ एक तुकड़ा भी तोरो हक्क म नहीं देऊं कहालीकि मय न आर नगर ख लूतियों को वंशजों को हक्क म करयो हय। 10उन्को पहिले उत एमी को लोग बस्यो हुयो होतो, जो अनाकियों को जसो ताकतवर अऊर लम्बो-लम्बो अऊर गिनती म बहुत होतो; 11अऊर अनाकियों को जसो हि भी रपाई नाम सी पहिचानत होतो, पर मोआबी लोग उन्ख एमी कहत होतो। 12अऊर इन को पहिले म सेईर म होरी जाति को लोग बस्यो होतो, पर एसाव को कुल न उन्ख ऊ देश सी निकाल दियो, अऊर अपनो आगु सी नाश कर क् उन्की जागा पर खुद बस गयो; जसो कि इस्राएलियों न यहोवा को दियो हुयो अपनो हक्क को देश म करयो।

13तब यहोवा न कह्यो, अब तुम लोग उठो अऊर जेरेद नदी को पार जावो। तब हम जेरेद नदी को पार आयो। 14अऊर हमरो कादेश-बर्ने ख छोड़नो सी ले क जेरेद नदी पार होन तक अड़तीस साल बीत गयो, ओको बीच म परमेश्वर को प्रतिज्ञा को अनुसार ऊ पीढ़ी को सब योद्धा डेरा म सी नाश भय गयो। 15अऊर जब तक हि नाश नहीं भयो तब तक परमेश्वर को हाथ उन्ख डेरा म सी मिटाय डालन लायी उन्को खिलाफ उठ्योच रह्यो।

16“त सब योद्धा लोगों को बीच म सी मर क नाश भय गयो, 17तब परमेश्वर न मोरो सी कह्यो, 18तय अज आर नगर को जवर मोआब की सीमा ख पार करजो।”

19अऊर जब तय अम्मोनियों को जवर पहुंच्यो, तब उन्ख मत सताजो अऊर नहीं छोड़जो, कहालीकि मय अम्मोनियों को देश म सी कुछ भी तोरो हक्क म नहीं करूं, कहालीकि मय न ओख लूत को वंशजों को हक्क म कर दियो हय। 20ऊ देश भी रपाई देश को नाम सी जान्यो जात होतो, कहालीकि पुरानो दिनों म रपाई लोग, जिन्ख अम्मोन वंशी उन्ख जमजुम्मी कहत होतो, हि उत रहत होतो; 21हि जमजुम्मी भी अनाकियों को जसो ताकतवर अऊर लम्बो-लम्बो अऊर गिनती म बहुत होतो; पर परमेश्वर न इन्क अम्मोनियों को आगु सी नाश कर डाल्यो, अऊर उन्न उन्ख ऊ देश सी निकाल दियो, अऊर उन्की जागा पर खुद रहन लग्यो; 22जसो कि परमेश्वर न सेईर को निवासी एसाव वंशियों को आगु सी होरी लोग ख नाश करयो, अऊर उन्न उन्ख ऊ देश सी निकाल दियो, अऊर अज तक उन्की जागा पर हि खुद रह्य हंय। 23वसोच अव्वी लोगों ख, जो गाजा नगर तक गांवो म बस्यो हुयो होतो, उन्ख कप्तोरियों लोगों न जो कप्तोर नगर सी निकल्यो होतो नाश करयो, अऊर उन्की जागा पर खुद रहन लग्यो।

24अब तुम लोग उठो, अऊर अर्नोन नदी ख पार करो : सुनो, मय हेशबोन को एमोरी राजा सीहोन ख ओको देश समेत तुम्हरो हाथ म कर देऊ हय; येकोलायी ऊ देश ख अपनो हक्क म सुरूवात करो, अऊर ऊ राजा सी लड़ायी छेड़ देवो। 25अऊर अज पूरो लोग आसमान को खल्लो रह्य हय उन सब को मन म मय तोरो विषय डर अऊर थरथराहट समाऊं; हि तोरो नाम सुन क डर को मारे कापेंन।

राजा सीहोन की हार

(गिनती २१:२१-३०)

26“तब मय न कदेमोत नाम को सुनसान जागा सी हेशबोन को राजा सीहोन को जवर शान्ति की या बाते कहन लायी दूत भेज्यो: 27मोख अपनो देश म सी होय क जान दे; मय सड़क सड़क चली जाऊं मय नहीं दायो तरफ अऊर नहीं बायो तरफ मुड़ूं।” 28हम अपनो रुपया सी खान की चिज लेयबों कि खाये, अऊर पानी भी रुपया ले क मोख देजो कि मय पीऊं; बस हम्ख पैदलच जान दे, 29जसो सेईर को रहवासी एसावियों न अऊर आर नगर को रहवासी मोआबियों न मोरो सी जसो व्यवहार करयो, वसोच तय भी मोरो सी कर, या रीति सी मय यरदन नदी को पार होय क ऊ देश म पहुंचूं जो हमरो परमेश्वर हम्ख देवय हय।

30पर हेशबोन को राजा सीहोन न हम ख अपनो देश म सी होय क जान नहीं दियो; कहालीकि तुम्हरो परमेश्वर न ओकी आत्मा ख कठोर अऊर ओको मन हठीला कर दियो होतो, येकोलायी कि ओख तुम्हरो हाथ म कर दे, जसो कि अज प्रगट हय।

31अऊर यहोवा न मोरो सी कह्यो, सुन, मय देश सहीत सीहोन ख तोरो बस म कर देन वालो हय; ऊ देश ख अपनो अधिकार म लेनो सुरूवात कर। 32तब राजा सीहोन अपनी पूरी सेना सहीत निकल आयो, अऊर हमरो सामना कर क् लड़ायी करन लायी यहस तक चढ़तो आयो। 33अऊर हमरो परमेश्वर न ओख हमरो द्वारा हराय दियो, अऊर हम न उन्को टुरावों अऊर पूरी सेना ख मार डाल्यो। 34अऊर उच समय हम न ओको पूरो नगर ख अधिकार म कर लियो, अऊर एक एक नगर को आदमी, बाईयों, अऊर बच्चा समेत यहां तक सत्यानाश करयो कि कोयी भी नहीं बच्यो; 35पर जनावरों ख हम न अपनो कर लियो, अऊर उन नगरों की पूरी लूट भी हम न ले ली जिन्ख हम न जीत लियो होतो। 36अरोएर नगर सी जो अर्नोन घाटी को किनारे म हय, अऊर ऊ नगर सी, जो घाटी म बस्यो हय, गिलाद तक एक भी नगर हमरी पहुंच सी बाहेर नहीं होतो; हमरो परमेश्वर यहोवा न सब नगर हम्ख सौंप दियो होतो। 37पर हम अम्मोनियों को देश को जवर, बल्की यब्बोक नदी को ऊ पार जितनो देश हय, अऊर पहाड़ी देश को नगर जित जानो सी हमरो परमेश्वर यहोवा न हम ख मना करयो होतो, उत हम नहीं गयो।