व्यवस्थाविवरन 1

होरेब पहाड़ी सी निकलन की आज्ञा

1जो बात मूसा न यरदन नदी को ओनपार सुनसान जागा म कहीं होती, ऊ जागा सूप को आगु अराबा म अऊर पारान शहर अऊर तोपेल शहर को बीच, अऊर लाबान हसेरोत अऊर दीजाहाब म, पूरो इस्राएलियों सी कह्यो ही यो आय। 2होरेब पहाड़ी सी कादेशबर्ने तक को यात्रा सेईर पहाड़ी को रस्ता सी ग्यारा दिन को हय 3चालीसवों साल को ग्यारावों महीना को पहिलो दिन ख इस्राएलियों न मिस्र ख छोड़्यो होतो ऊ समय परमेश्वर न मूसा ख इस्राएलियों सी कहन की आज्ञा दी होती, ओको अनुसार मूसा उन्को सी या बात कहन लग्यो। 4जब मूसा न एमोरियों को राजा हेशबोनवासी सीहोन अऊर बाशान को राजा अशतारोतवासी ओग ख एद्रेई म हरायो, 5ओको बाद परमेश्वर को अनुसार मूसा यरदन को पूर्व म मोआब देश म व्यवस्था को विवरन करन लग्यो,

ओन कह्यो, 6“हमरो परमेश्वर यहोवा न होरेब को जवर हम सी कह्यो होतो, तुम लोगों ख या पहाड़ी को जवर रह्यतो हुयो बहुत दिन भय गयो हंय; 7येकोलायी अब इत सी आगु बड़ो, अऊर एमोरियों को पहाड़ी देश म, अऊर अराबा म रहन वालो को जवर, पहाड़ी जागा म, खल्लो मैदान म, दक्षिन देश म अऊर समुन्दर को किनारे, कनानियों को देश अऊर लबानोन म, महानदी तक मतलब फरात नदी तक चली जावो। 8सुनो, मय ऊ देश ख तुम्हरो आगु कर देऊ हय; जो देश को बारे म परमेश्वर न अब्राहम, इसहाक, अऊर याकूब, तुम्हरो बापदादों सी कसम खाय क कह्यो होतो कि मय येख तुम ख अऊर तुम्हरो बाद तुम्हरो कुल ख देऊं, ओख अब जाय क अपनो अधिकार म कर लेवो।”

मूसा द्वारा न्यायियों की नियुक्ति

(निर्गमन १८:१३-२७)

9“ऊ समय मूसा न तुम सी कह्यो, मय तुम्हरो बोझ अकेलो नहीं सम्भाल सकू; 10कहालीकि तुम्हरो परमेश्वर यहोवा न तुम ख यहां तक बढ़ायो हय कि तुम गिनती म अज आसमान को तारा को जसो अनगिनत भय गयो हय। 11तुम्हरो बापदादों को परमेश्वर तुम ख हजार गुना अऊर भी बढ़ाये, अऊर अपनो वादा को अनुसार तुम ख आशीर्वाद भी देतो रहे! 12पर तुम्हरी परेशानी, अऊर बोझ, अऊर झगड़ा ख मय अकेलो कहां तक सह सकू हय? 13येकोलायी तुम अपनो अपनो कुल म सी बुद्धिमान अऊर समझदार अऊर अनुभवी आदमी चुन लेवो, अऊर मय उन्ख तुम पर मुखिया ठहराऊं। 14येको उत्तर म तुम न मोरो सी कह्यो, जो कुछ तय हम सी कह्य हय ओको करनो अच्छो हय।” 15येकोलायी मय न तुम्हरो कुल को मुख्य जो बुद्धिमान अऊर अनुभवी आदमी होतो ओख चुन क तुम पर मुखिया नियुक्त करयो, कुछ हजार पर, असो सौ, पचास, अऊर दस को समूह पर एक एक प्रमुख अऊर वसोच तुम्हरो घरानो पर भी नियुक्त करयो।

16अऊर ऊ समय मय न तुम्हरो न्यायियों ख आज्ञा दियो होतो, तुम अपनो लोगों को वाद-विवाद सुनजो, अऊर उन्को बीच अऊर उन्को पड़ोसियों अऊर परदेशियों को बीच भी न्यायीपन सी न्याय करो। 17न्याय करतो समय कोयी को पक्ष मत करजो; जसो बड़ो की वसोच छोटो आदमी की भी सुनजो; कोयी को मुंह देख क मत डरजो, कहालीकि न्याय परमेश्वर को काम हय; अऊर जो विवाद तुम्हरो लायी कठिन होना, ऊ मोरो जवर लाजो, अऊर मय ओख सुनूं। 18अऊर मय न उच समय तुम्हरो पूरो कार्य तुम्ख आज्ञा दियो।

भेदियों को भेज्यो जानो

(गिनती १३:१-३३)

19हम न होरेब पहाड़ी सी निकल क अपनो परमेश्वर यहोवा को आज्ञा अनुसार भयानक सुनसान जागा म सी चल्यो, जेक तुम न एमोरियों को पहाड़ी देश को रस्ता म देख्यो, अऊर हम कादेश-बर्ने तक आये। 20उत सी मय न तुम सी कह्यो होतो, तुम एमोरियों को पहाड़ी देश तक आय गयो हय जेक हमरो परमेश्वर यहोवा हम्ख देवय हय। 21देखो, ऊ देश ख तुम्हरो परमेश्वर यहोवा तुम्हरो आगु कर देवय हय। जावो, अऊर अपनो बाप-दादो को परमेश्वर यहोवा को वचन को अनुसार ओको पर अधिकार कर लेवो। मत डर, तुम्हरो मन कमजोर नहीं होय।

22“अऊर तुम सब मोरो जवर आय क कहन लग्यो, हम अपनो आगु आदमियों ख भेज देयेंन, जो ऊ देश को पता लगाय क हम ख यो बताय दे, कि कौन सो रस्ता सी होय क चलनो होना अऊर कौन-कौन सो नगर सी सिरनो पड़ेंन।”

23या बात मोख अपनी नजर म भली लगी मय न तुम सी बारा आदमी, हर एक कुल सी एक आदमी लियो। 24अऊर हि पहाड़ी देश म गयो, अऊर एशकोल नाला पहुंच क ऊ देश को भेद लियो। 25अऊर ऊ देश को फरों म सी कुछ फर ले क हमरो जवर आयो, अऊर हम ख यो खबर दियो, जो देश हमरो परमेश्वर यहोवा हम ख देवय हय, ऊ अच्छो हय।

26तब भी तुम न उत जान सी मना करयो, अपनो परमेश्वर को आज्ञा को खिलाफ होय क 27अपनो डेरा म यो कह्य क कुड़कुड़ान लग्यो, “परमेश्वर हम सी बैर रखय हय, येकोलायी हम ख मिस्र देश सी निकाल क लायो हय कि हम ख एमोरियों को वश म कर क् हमरो नाश कर डाले।” 28हम कहां जाय रह्य हय? हमरो भाऊवों न यो कह्य क हमरो मन ख कमजोर कर दियो हय कि उत को लोग हम सी बड़ो अऊर ताकतवर हय, अऊर उत को नगर बड़ो-बड़ो हय, उन्की शहरपनाह आसमान सी बाते करय हंय, अऊर हम न उत अनाक वंशियों ख भी देख्यो हय।

29पर मय न तुम सी कह्यो होतो, तुम उन सी मत डरो अऊर मत घबरावो। 30तुम्हरो परमेश्वर यहोवा जो तुम्हरो आगु आगु चलय हय, खुद तुम्हरो तरफ सी लड़ेंन, जसो कि मिस्र म तुम्हरो आगु तुम्हरो लायी करयो होतो। 31तुम न सुनसान जागा म भी देख्यो कि जसो कोयी आदमी अपनो बच्चा ख गोदी म उठाय क चलय हय, वसोच हमरो परमेश्वर यहोवा हम ख या जागा पर पहुंचन तक, पूरो रस्ता म जेकोसी हम आयो हय, पकड़्यो रह्यो। 32तब भी तुम न अपनो परमेश्वर यहोवा पर विश्वास नहीं करयो। 33जो तुम्हरो आगु आगु येकोलायी चलत होतो कि डेरा डालन की जागा तुम्हरो लायी ढूंढे , अऊर रात ख आगी अऊर दिन ख बादर म प्रगट हो क चल्यो, ताकि तुम ख ऊ रस्ता दिखाये जेको पर तुम चलो।

इस्राएल ख सजा मिलनो

(गिनती १४:२०-४५)

34तुम्हरी बात सुन्क परमेश्वर को गुस्सा भड़क्यो, अऊर ओन यो कसम खायी, 35निश्चय यो बुरी पीढ़ी को आदमी म सी एक भी ऊ अच्छो देश ख देख नहीं पायेंन, जेक मय न उन्को बाप-दादो ख देन की प्रतिज्ञा करी होती। 36यपुन्ने को बेटा कालेब च ओख देखनो पायेंन, अऊर जो जमीन पर ओको पाय पड़्यो हय, ऊ मय ओख अऊर ओको वंश ख भी देऊं, कहालीकि ऊ मोरो पीछु पूरो रीति सी भय गयो हय। 37अऊर मोरो पर भी परमेश्वर तुम्हरो कारन गुस्सा भयो, अऊर कह्यो, मूसा तय भी उत जानो नहीं पायेंन। 38नून को टुरा यहोशू जो तोरो आगु खड़ो हय, ऊ उत जानो पायेंन, येकोलायी तय ओख उत्साहित कर, कहालीकि ऊ देश ख इस्राएलियों को हिस्सा म उच कर देयेंन।

39तुम्हरो बाल बच्चां जिन को बारे म तुम कह्य हय कि इन ख लूट लेयेंन, जो सही गलत को बारे म समझय भी नहाय, परमेश्वर हम सी कह्य हय कि हि उत सिरेंन, अऊर उन ख ऊ देश देऊ हय, अऊर हि वहां को हक्कदार होयेंन। 40पर तुम लोग घुम क निकलो अऊर लाल समुन्दर को रस्ता सी सुनसान जागा को तरफ जावो।

41तब तुम न मोरो सी कह्यो, हम न परमेश्वर को विरोध म पाप करयो हय, अब हम अपनो परमेश्वर की आज्ञा को अनुसार चढ़ायी करबों अऊर लड़ाई करबोंन। तब तुम अपनो हथियार बान्ध क पहाड़ी पर बिना सोच्यो समझ्यो चढ़ायी करन ख तैयार भय गयो।

42तब परमेश्वर न मोरो सी कह्यो, उन सी कह्य दो कि तुम मत चढ़ो, अऊर नहीं लड़ाई करो, कहालीकि मय तुम्हरो संग म नहाय, कहीं असो नहीं होय कि तुम अपनो बैरियों सी हार जावो। 43मय न तुम सी कह्यो, पर तुम न नहीं मानी, पर परमेश्वर की आज्ञा को खिलाफ जिद्द कर क् पहाड़ी पर चढ़ गयो। 44तब ऊ पहाड़ी को निवासी एमोरी जाति को लोग तुम्हरो सामना करन लायी निकल क शहेद की माखियों को जसो तुम्हरो पीछा करयो, अऊर सेईर देश को होर्मा नगर तक तुम्ख खदेड़ दियो। 45तब तुम लौट क परमेश्वर को आगु रोवन लग्यो, पर परमेश्वर न तुम्हरी नहीं सुन्यो, नहीं तुम्हरी बातों पर कान लगायो। 46अऊर तुम कादेश म बहुत दिन तक उत रह्यो।