Biblica® Open Lao Contemporary Version
ນາງຣຸດ 1
ນາງນາໂອມີ ແລະ ນາງຣຸດ
ໃນສະໄໝທີ່ບັນດາຜູ້ປົກຄອງໄດ້ປົກຄອງ, ມີການອຶດຢາກອາຫານເກີດຂຶ້ນໃນແຜ່ນດິນນັ້ນ. ດັ່ງນັ້ນ ຈຶ່ງມີຊາຍຄົນໜຶ່ງຈາກເບັດເລເຮັມໃນເຂດຢູດາຍ, ພ້ອມດ້ວຍເມຍຂອງລາວ ແລະ ລູກຊາຍສອງຄົນ ໄດ້ໄປອາໄສຢູ່ໃນດິນແດນໂມອາບຊົ່ວໄລຍະໜຶ່ງ. ຊາຍຄົນນັ້ນມີຊື່ວ່າເອລີເມເຫລັກ, ເມຍຂອງລາວຊື່ວ່ານາໂອມີ ແລະ ລູກຊາຍຂອງລາວສອງຄົນຊື່ມາໂລນ ແລະ ກີລີໂອນ. ພວກເຂົາເປັນຄົນເອຟຣັດ ເຊິ່ງມາຈາກເບັດເລເຮັມ, ໃນແຂວງຢູດາຍ. ແລ້ວພວກເຂົາກໍໄດ້ໄປທີ່ໂມອາບ ແລະ ໄດ້ອາໄສຢູ່ທີ່ນັ້ນ.
ຕໍ່ມາ ເອລີເມເຫລັກ, ເຊິ່ງເປັນຜົວຂອງນາໂອມີ, ກໍໄດ້ຕາຍໄປ ແລະ ນາງຈຶ່ງຢູ່ຕາມລໍາພັງກັບລູກຊາຍທັງສອງຂອງນາງ. ພວກເຂົາໄດ້ແຕ່ງງານກັບຍິງຊາວໂມອາບ, ຄົນໜຶ່ງຊື່ວ່າໂອປາ ແລະ ອີກຄົນໜຶ່ງຊື່ວ່າຣຸດ. ຫລັງຈາກທີ່ພວກເຂົາໄດ້ອາໄສຢູ່ທີ່ນັ້ນເປັນເວລາສິບປີ, ທັງມາໂລນ ແລະ ກີລີໂອນກໍໄດ້ຕາຍໄປເໝືອນກັນ ແລະ ນາງນາໂອມີຈຶ່ງຢູ່ຜູ້ດຽວໂດຍບໍ່ມີລູກທັງສອງ ແລະ ຜົວຂອງນາງ.
ນາງນາໂອມີ ແລະ ນາງຣຸດກັບຄືນໄປທີ່ເບັດເລເຮັມ
ເມື່ອຢູ່ໃນໂມອາບ ນາງນາໂອມີກໍໄດ້ຍິນວ່າພຣະເຈົ້າຢາເວໄດ້ມາຊ່ວຍປະຊາຊົນຂອງພຣະອົງ ໂດຍຈັດຕຽມອາຫານສໍາລັບພວກເຂົາ, ນາງນາໂອມີ ແລະ ລູກໃພ້ທັງສອງຂອງນາງກໍຕຽມຕົວເດີນທາງອອກຈາກທີ່ນັ້ນເພື່ອກັບຄືນບ້ານ. ນາງນາໂອມີ ແລະ ລູກໃພ້ສອງຄົນກໍໄດ້ອອກຈາກບ່ອນທີ່ນາງເຄີຍອາໄສຢູ່ ແລະ ອອກເດີນທາງໄປຕາມຖະໜົນທີ່ຈະພາພວກເຂົາກັບໄປທີ່ດິນແດນຢູດາຍ.
ແລ້ວນາງນາໂອມີກໍໄດ້ເວົ້າກັບລູກໃພ້ທັງສອງຂອງຕົນວ່າ, “ໃຫ້ພວກເຈົ້າແຕ່ລະຄົນກັບໄປ, ໄປຍັງບ້ານແມ່ຂອງພວກເຈົ້າ. ຂໍພຣະເຈົ້າຢາເວສະແດງຄວາມເມດຕາແກ່ພວກເຈົ້າ, ເໝືອນດັ່ງທີ່ພວກເຈົ້າໄດ້ສະແດງຄວາມເມດຕາຕໍ່ຜົວຂອງພວກເຈົ້າຜູ້ທີ່ໄດ້ຕາຍໄປແລ້ວ ແລະ ຕໍ່ເຮົາ. ຂໍພຣະເຈົ້າຢາເວອວຍພອນໃຫ້ພວກເຈົ້າແຕ່ລະຄົນໄດ້ແຕ່ງງານມີຜົວອີກ”.
ແລ້ວນາງກໍໄດ້ຈູບລາພວກເຂົາ ແລະ ພວກເຂົາກໍຮ້ອງໄຫ້ສຽງດັງ. ແລະ ເວົ້າກັບນາງວ່າ, “ພວກເຮົາຈະກັບໄປກັບແມ່ ໄປຫາຍາດພີ່ນ້ອງຂອງແມ່”.
ແຕ່ນາງນາໂອມີໄດ້ຕອບວ່າ, “ລູກ, ຈົ່ງກັບເມືອເຮືອນ. ເປັນຫຍັງພວກເຈົ້າຈຶ່ງຈະໄປກັບແມ່? ແມ່ຈະມີລູກຊາຍທີ່ຈະໃຫ້ເປັນຜົວຂອງພວກເຈົ້າໄດ້ອີກບໍ? ລູກ, ຈົ່ງກັບໄປຍັງເຮືອນ; ແມ່ເອງກໍເຖົ້າແກ່ເກີນກວ່າຈະມີຜົວອີກ. ເຖິງແມ່ນແມ່ຄິດວ່າຍັງມີຄວາມຫວັງສໍາລັບແມ່ຢູ່ ເຖິງແມ່ນວ່າແມ່ຈະໄດ້ຜົວໃນຄືນນີ້ ແລະ ມີລູກຊາຍຫລາຍຄົນ. ພວກເຈົ້າຈະລໍຖ້າໃຫ້ພວກເຂົາໃຫຍ່ຂຶ້ນມາບໍ? ພວກເຈົ້າຍັງຄົງເປັນໂສດສໍາລັບພວກເຂົາຢູ່ບໍ? ລູກ, ຢ່າເລີຍ. ມັນຈະມີຄວາມຂົມຂື່ນສໍາລັບແມ່ຫລາຍກວ່າສໍາລັບພວກເຈົ້າ, ເພາະມືຂອງພຣະເຈົ້າຢາເວໄດ້ຫັນມາຕໍ່ສູ້ແມ່!”
ແລ້ວພວກເຂົາກໍຮ້ອງໄຫ້ສຽງດັງອີກ. ຫລັງຈາກນັ້ນ ນາງໂອປາຈຶ່ງໄດ້ຈູບລາແມ່ຍ່າຂອງຕົນ, ແຕ່ນາງຣຸດໄດ້ຈ່ອງລາວໄວ້.
ນາງນາໂອມີໄດ້ເວົ້າກັບນາງຣຸດວ່າ, “ເບິ່ງແມ, ເອື້ອຍໃພ້ຂອງເຈົ້າກໍກຳລັງກັບໄປຫາຍາດພີ່ນ້ອງຂອງລາວ ແລະ ພະທັງຫລາຍຂອງລາວ. ຈົ່ງກັບໄປກັບນາງ”.
ແຕ່ນາງຣຸດໄດ້ຕອບວ່າ, “ຂໍຢ່າຮຽກຮ້ອງໃຫ້ລູກໄປຈາກແມ່ ຫລື ຫັນໜີໄປຈາກແມ່ເລີຍ. ແມ່ໄປໃສລູກກໍຈະໄປນໍາ ແລະ ແມ່ຢູ່ໃສລູກກໍຈະຢູ່ນໍາ. ຍາດພີ່ນ້ອງຂອງແມ່ກໍຈະເປັນຍາດພີ່ນ້ອງຂອງລູກ ແລະ ພຣະເຈົ້າຂອງແມ່ກໍຈະເປັນພຣະເຈົ້າຂອງລູກ. ແມ່ຕາຍຢູ່ໃສລູກກໍຈະຕາຍທີ່ນັ້ນດ້ວຍ ແລະ ຂໍໃຫ້ຖືກຝັງຢູ່ໃນທີ່ນັ້ນ. ຖ້າລູກຍອມໃຫ້ມີສິ່ງໃດມາແຍກແມ່ ແລະ ລູກອອກຈາກກັນ, ນອກຈາກຄວາມຕາຍແລ້ວ ກໍຂໍພຣະເຈົ້າຢາເວຈັດການກັບລູກຢ່າງໜັກ”. ເມື່ອນາງນາໂອມີເຫັນວ່ານາງຣຸດຕັ້ງໃຈໄປກັບຕົນແທ້, ນາງຈຶ່ງຢຸດຂໍຮ້ອງນາງຣຸດ.
ດັ່ງນັ້ນ ຍິງທັງສອງຈຶ່ງເດີນທາງໄປຈົນພວກເຂົາໄດ້ມາເຖິງເບັດເລເຮັມ. ເມື່ອພວກເຂົາໄດ້ມາຮອດເບັດເລເຮັມແລ້ວ, ທົ່ວທັງເມືອງພາກັນຕື່ນເຕັ້ນເພາະພວກເຂົາ, ພວກແມ່ຍິງຖາມກັນວ່າ, “ນີ້ແມ່ນນາງນາໂອມີແທ້ໆບໍ?”
ນາງນາໂອມີໄດ້ຕອບວ່າ, “ຂໍຢ່າເອີ້ນຂ້ອຍວ່ານາໂອມີ.1 ຂໍໃຫ້ເອີ້ນຂ້ອຍວ່າມາຣາ,2 ເພາະວ່າອົງຜູ້ມີລິດອຳນາດຍິ່ງໃຫຍ່ໄດ້ເຮັດໃຫ້ຊີວິດຂອງຂ້ອຍຂົມຂື່ນຫລາຍ. ຂ້ອຍມີທຸກຢ່າງຄົບບໍລິບູນເມື່ອຈາກເມືອງນີ້ໄປ, ແຕ່ພຣະເຈົ້າຢາເວໄດ້ນຳຂ້ອຍກັບມາມືເປົ່າ. ເປັນຫຍັງຈຶ່ງເອີ້ນຂ້ອຍວ່ານາໂອມີ? ໃນເມື່ອພຣະເຈົ້າຢາເວໄດ້ເຮັດໃຫ້ຂ້ອຍເຈັບປວດ ແລະ ອົງຍິ່ງໃຫຍ່ໄດ້ນໍາເອົາເຄາະຮ້າຍມາສູ່ຂ້ອຍ”.
ດັ່ງນັ້ນ ເວລາທີ່ນາງນາໂອມີກັບມາຈາກໂມອາບ ໂດຍມີນາງຣຸດລູກໃພ້ຊາວໂມອາບມານໍາ, ພວກເຂົາມາຮອດເບັດເລເຮັມກົງກັບຕົ້ນລະດູເກັບກ່ຽວເຂົ້າບາເລ.
Source notes (2)
- Footnote ແປວ່າ ລະທົມຂົມຂື່ນ ເຊັ່ນດຽວກັບຂໍ້ 21
- Footnote ແປວ່າ ຂົມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.