Biblica® Open Lao Contemporary Version
ໂຣມ 10
ພີ່ນ້ອງທັງຫລາຍເອີຍ, ຄວາມປາຖະໜາໃນໃຈ ແລະ ຄຳອະທິຖານຂອງເຮົາຕໍ່ພຣະເຈົ້າເພື່ອຊົນຊາດອິດສະຣາເອນຄື ຂໍໃຫ້ພວກເຂົາທັງຫລາຍໄດ້ຮັບຄວາມພົ້ນ. ເພາະເຮົາສາມາດເປັນພະຍານໄດ້ວ່າ ພວກເຂົາຮ້ອນຮົນເພື່ອພຣະເຈົ້າ ແຕ່ຄວາມຮ້ອນຮົນຂອງພວກເຂົາບໍ່ໄດ້ຕັ້ງຢູ່ເທິງຄວາມຮູ້. ເນື່ອງຈາກພວກເຂົາບໍ່ຮູ້ຈັກຄວາມຊອບທຳຂອງພຣະເຈົ້າ ແລະ ພະຍາຍາມຕັ້ງຄວາມຊອບທຳຂອງຕົນເອງຂຶ້ນມາ, ພວກເຂົາຈຶ່ງບໍ່ຍອມຮັບຄວາມຊອບທຳຂອງພຣະເຈົ້າ. ພຣະຄຣິດເຈົ້າເປັນບົດສະຫລຸບສຸດທ້າຍຂອງກົດບັນຍັດ ເພື່ອຈະມີຄວາມຊອບທຳສຳລັບທຸກຄົນທີ່ເຊື່ອ.
ໂມເຊໄດ້ຂຽນເຖິງຄວາມຊອບທຳຕາມກົດບັນຍັດໄວ້ຢ່າງນີ້ວ່າ, “ຜູ້ໃດທີ່ເຮັດສິ່ງເຫລົ່ານີ້ຈະມີຊີວິດຢູ່ໂດຍສິ່ງເຫລົ່ານີ້”.1 ແຕ່ຄວາມຊອບທຳໂດຍຄວາມເຊື່ອກ່າວວ່າ, “ຢ່າຄິດໃນໃຈວ່າ, ‘ຜູ້ໃດຈະຂຶ້ນໄປເທິງສະຫວັນ?’2” (ຄືນໍາເອົາພຣະຄຣິດເຈົ້າລົງມາ) “ຫລື ‘ຜູ້ໃດຈະລົງໄປໃນບ່ອນເລິກ?’ ”3 (ຄືນໍາເອົາພຣະຄຣິດເຈົ້າຂຶ້ນມາຈາກຄວາມຕາຍ). ແຕ່ຄວາມຊອບທຳນັ້ນໄດ້ກ່າວໄວ້ຢ່າງໃດ? “ຖ້ອຍຄຳນີ້ຢູ່ໃກ້ເຈົ້າ ຢູ່ໃນປາກຂອງເຈົ້າ ແລະ ຢູ່ໃນໃຈຂອງເຈົ້າ”4 ຄືຖ້ອຍຄຳແຫ່ງຄວາມເຊື່ອທີ່ພວກເຮົາກຳລັງປະກາດຢູ່ນັ້ນ, ຖ້າເຈົ້າຍອມຮັບດ້ວຍປາກຂອງເຈົ້າວ່າ, “ພຣະເຢຊູເຈົ້າເປັນອົງພຣະຜູ້ເປັນເຈົ້າ” ແລະ ເຊື່ອໃນໃຈຂອງເຈົ້າວ່າ ພຣະເຈົ້າໄດ້ເຮັດໃຫ້ພຣະອົງເປັນຄືນມາຈາກຕາຍແລ້ວ ເຈົ້າກໍຈະໄດ້ຮັບຄວາມພົ້ນ. ດ້ວຍວ່າ ເຈົ້າເຊື່ອດ້ວຍໃຈ ຈຶ່ງໄດ້ຖືວ່າເປັນຜູ້ຊອບທຳ ແລະ ເພາະເຈົ້າຍອມຮັບດ້ວຍປາກ ຈຶ່ງໃຫ້ເຈົ້າໄດ້ລອດພົ້ນ. ຕາມທີ່ພຣະຄຳພີກ່າວໄວ້ວ່າ, “ຜູ້ໃດທີ່ເຊື່ອໃນພຣະອົງຈະບໍ່ໄດ້ຮັບຄວາມອັບອາຍ”.5 ເພາະບໍ່ມີຄວາມແຕກຕ່າງກັນລະຫວ່າງຄົນຢິວ ແລະ ຄົນຕ່າງຊາດ ອົງພຣະຜູ້ເປັນເຈົ້າອົງດຽວກັນເປັນອົງພຣະຜູ້ເປັນເຈົ້າຂອງຄົນທັງປວງ ແລະ ອວຍພອນຢ່າງບໍລິບູນແກ່ທຸກຄົນທີ່ຮ້ອງຫາພຣະອົງ, ເພາະວ່າ, “ທຸກຄົນທີ່ຮ້ອງອອກນາມຂອງອົງພຣະຜູ້ເປັນເຈົ້າກໍຈະໄດ້ຮັບຄວາມພົ້ນ”.6
ແຕ່ຜູ້ທີ່ຍັງບໍ່ເຊື່ອຈະຮ້ອງຫາພຣະອົງໄດ້ຢ່າງໃດ? ແລະ ຜູ້ທີ່ຍັງບໍ່ເຄີຍໄດ້ຍິນເຖິງເລື່ອງຂອງພຣະອົງ ຈະເຊື່ອໃນພຣະອົງໄດ້ຢ່າງໃດ? ແລະ ຖ້າບໍ່ມີຜູ້ໃດປະກາດໃຫ້ພວກເຂົາຟັງ ພວກເຂົາຈະໄດ້ຍິນເຖິງເລື່ອງຂອງພຣະອົງໄດ້ຢ່າງໃດ? ແລະ ຖ້າບໍ່ມີຜູ້ໃດໃຊ້ພວກເຂົາໄປ ພວກເຂົາຈະໄປປະກາດໄດ້ຢ່າງໃດ? ຕາມທີ່ມີຂຽນໄວ້ໃນພຣະຄຳພີວ່າ, “ຕີນຂອງຜູ້ນຳຂ່າວປະເສີດມາກໍງົດງາມແທ້ນໍ!”7
ແຕ່ບໍ່ແມ່ນວ່າຄົນອິດສະຣາເອນທຸກຄົນຈະຍອມຮັບຂ່າວປະເສີດນັ້ນ ເພາະເອຊາຢາໄດ້ກ່າວໄວ້ວ່າ, “ອົງພຣະຜູ້ເປັນເຈົ້າເອີຍ, ຜູ້ໃດແດ່ທີ່ໄດ້ເຊື່ອໃນຖ້ອຍຄຳຂອງພວກເຮົາ?”8 ດັ່ງນັ້ນ ຄວາມເຊື່ອເກີດຂຶ້ນໄດ້ກໍເພາະການໄດ້ຍິນຖ້ອຍຄຳ ແລະ ຖ້ອຍຄຳທີ່ໄດ້ຍິນນັ້ນກໍຄືເລື່ອງຂອງພຣະຄຣິດເຈົ້າ. ແຕ່ເຮົາຂໍຖາມວ່າ, “ພວກເຂົາບໍ່ໄດ້ຍິນບໍ?” ແນ່ນອນພວກເຂົາໄດ້ຍິນແລ້ວ.
“ສຽງຂອງພວກເຂົາໄດ້ອອກໄປທົ່ວໂລກ
ຖ້ອຍຄຳຂອງພວກເຂົາໄປເຖິງທີ່ສຸດປາຍແຜ່ນດິນໂລກ”.9
ເຮົາຂໍຖາມອີກວ່າ ຊົນຊາດອິດສະຣາເອນບໍ່ເຂົ້າໃຈບໍ? ຕອນທຳອິດໂມເຊກ່າວວ່າ,
“ເຮົາຈະເຮັດໃຫ້ເຈົ້າອິດສາບັນດາຜູ້ທີ່ບໍ່ແມ່ນຊົນຊາດ;
ເຮົາຈະຍົວະໃຫ້ເຈົ້າໃຈຮ້າຍດ້ວຍຊົນຊາດທີ່ບໍ່ມີຄວາມເຂົ້າໃຈ”.10
ແລະ ເອຊາຢາກ້າກ່າວວ່າ,
“ບັນດາຜູ້ທີ່ບໍ່ໄດ້ສະແຫວງຫາເຮົາກໍພົບເຮົາ
ເຮົາໄດ້ສະແດງຕົນເອງແກ່ບັນດາຜູ້ທີ່ບໍ່ໄດ້ເອີ້ນຫາເຮົາ”.11
ແຕ່ເພິ່ນກ່າວເຖິງພວກອິດສະຣາເອນວ່າ,
“ເຮົາໄດ້ຍື່ນມືຂອງເຮົາອອກໝົດມື້
ໃຫ້ແກ່ຊົນຊາດທີ່ບໍ່ເຊື່ອຟັງ ແລະ ດື້ດ້ານ”.12
Source notes (12)
- Footnote ລລວ 18:5
- Footnote ພບຍ 30:12
- Footnote ພບຍ 30:13
- Footnote ພບຍ 30:14
- Footnote ອຊຢ 28:16
- Footnote ຢອ 2:32
- Footnote ອຊຢ 52:7
- Footnote ອຊຢ 53:1
- Footnote ພສສ 19:4
- Footnote ພບຍ 32:21
- Footnote ອຊຢ 65:1
- Footnote ອຊຢ 65:2
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.