Biblica® Open Lao Contemporary Version
ເພງສັນລະເສີນ 91
ຜູ້ໃດກໍຕາມທີ່ອາໄສຢູ່ໃນທີ່ກຳບັງຂອງອົງຜູ້ສູງສຸດ
ຈະໄດ້ພັກສະຫງົບໃນຮົ່ມເງົາຂອງອົງຜູ້ມີລິດອຳນາດຍິ່ງໃຫຍ່.
ຂ້ານ້ອຍຈະຕອບພຣະເຈົ້າຢາເວວ່າ,1 “ພຣະອົງເປັນປ້ອມປ້ອງກັນ ແລະ ເປັນທີ່ລີ້ໄພຂອງຂ້ານ້ອຍ,
ເປັນພຣະເຈົ້າຂອງຂ້ານ້ອຍ ຜູ້ທີ່ຂ້ານ້ອຍໄວ້ວາງໃຈ”.
ແນ່ນອນ ພຣະອົງຈະຊ່ວຍເຈົ້າໃຫ້ພົ້ນ
ຈາກກັບດັກທັງຫລາຍ
ແລະ ຈາກໂລກລະບາດອັນຮ້າຍແຮງ.
ພຣະອົງຈະປົກປ້ອງເຈົ້າດ້ວຍປີກຂອງພຣະອົງ,
ແລະ ເຈົ້າຈະລີ້ໄພຢູ່ໃຕ້ຫົ່ມປີກຂອງພຣະອົງ;
ຄວາມສັດຊື່ຂອງພຣະອົງເປັນໂລ່ ແລະ ເປັນປ້ອມປ້ອງກັນຂອງເຈົ້າ.
ເຈົ້າຈະບໍ່ຕ້ອງຢ້ານຄວາມຢ້ານກົວໃນເວລາກາງຄືນ
ຫລື ລູກສອນທີ່ຍິງເຂົ້າໃສ່ໃນເວລາກາງເວັນ,
ຫລື ບໍ່ຕ້ອງຢ້ານໂລກລະບາດທີ່ຄຸກຄາມໃນຄວາມມືດ
ຫລື ໄພພິບັດທີ່ທຳລາຍໃນເວລາກາງເວັນ.
ຄົນເປັນພັນອາດຈະລົ້ມລົງຕາຍຢູ່ຂ້າງເຈົ້າ,
ຄົນເປັນໝື່ນຢູ່ທີ່ຂວາມືຂອງເຈົ້າ,
ແຕ່ໄພພິບັດນັ້ນຈະບໍ່ມາໃກ້ເຈົ້າ.
ເຈົ້າຈະສັງເກດເບິ່ງດ້ວຍຕາຂອງຕົນເອງເທົ່ານັ້ນ
ແລະ ເຫັນຄົນຊົ່ວຖືກລົງໂທດ.
ຖ້າເຈົ້າເວົ້າວ່າ “ພຣະເຈົ້າຢາເວຜູ້ເປັນທີ່ລີ້ໄພຂອງຂ້ານ້ອຍ”
ແລະ ເຈົ້າໄດ້ໃຫ້ອົງຜູ້ສູງສຸດເປັນທີ່ພັກພິງຂອງເຈົ້າ,
ແລ້ວກໍຈະບໍ່ມີອັນຕະລາຍເກີດຂຶ້ນກັບເຈົ້າ,
ບໍ່ມີໄພພິບັດຈະມາໃກ້ເຕັນຂອງເຈົ້າ.
ເພາະພຣະອົງຈະສັ່ງເທວະດາຂອງພຣະອົງເລື່ອງເຈົ້າ
ໃຫ້ເບິ່ງແຍງເຈົ້າໃນທຸກທາງຂອງເຈົ້າ;
ເທວະດາເຫລົ່ານັ້ນຈະຍື່ນມືຂອງພວກເຂົາອູ້ມເຈົ້າໄວ້
ເພື່ອບໍ່ໃຫ້ຕີນຂອງເຂົ້າກະທົບກັບຫີນ.
ເຈົ້າຈະຢຽບໂຕສິງ ແລະ ງູເຫົ່າ;
ເຈົ້າຈະຢຽບໂຕສິງໃຫຍ່ ແລະ ງູພິດ.
ພຣະເຈົ້າກ່າວວ່າ “ເພາະລາວຮັກເຮົາ ເຮົາຈະກອບກູ້ເອົາລາວ;
ເຮົາຈະປົກປ້ອງລາວ ເພາະລາວຍອມຮັບນາມຂອງເຮົາ.
ລາວຈະຮ້ອງຫາເຮົາ ແລະ ເຮົາຈະຕອບລາວ
ເຮົາຈະຢູ່ກັບລາວໃນເວລາເດືອດຮ້ອນ,
ເຮົາຈະປົດປ່ອຍລາວ ແລະ ໃຫ້ລາວໄດ້ຮັບກຽດ.
ເຮົາຈະໃຫ້ລາວອິ່ມເຕັມດ້ວຍຊີວິດຍືນຍາວ
ແລະ ສະແດງຄວາມພົ້ນຂອງເຮົາແກ່ລາວ”.
Source notes (1)
- Footnote ຫລື ລາວເວົ້າເຖິງພຣະເຈົ້າຢາເວວ່າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.