Biblica® Open Lao Contemporary Version
ເພງສັນລະເສີນ 90
ໝວດທີ 4
ພສສ 90–106
(ຄຳອະທິຖານຂອງໂມເຊ ຄົນຂອງພຣະເຈົ້າ)
ຂ້າແດ່ອົງພຣະຜູ້ເປັນເຈົ້າ ພຣະອົງເປັນບ່ອນເພິ່ງພາຂອງພວກຂ້ານ້ອຍ
ຕະຫລອດທຸກຊົ່ວອາຍຸ.
ກ່ອນທີ່ພູເຂົາຈະເກີດມາ
ຫລື ກ່ອນທີ່ພຣະອົງຈະໃຫ້ທັງໂລກເກີດຂຶ້ນ,
ພຣະອົງເປັນພຣະເຈົ້າຕັ້ງແຕ່ນິລັນການເຖິງນິລັນການ.
ພຣະອົງໄດ້ເຮັດໃຫ້ມະນຸດກັບຄືນສູ່ຂີ້ຝຸ່ນດິນ,
ໂດຍເວົ້າວ່າ “ບັນດາບຸດຂອງມະນຸດ ຈົ່ງກັບຄືນສູ່ຂີ້ຝຸ່ນດິນ”.
ເພາະພັນປີໃນສາຍຕາຂອງພຣະອົງ
ກໍເປັນເໝືອນວັນດຽວທີ່ຫາກໍ່ຜ່ານໄປ,
ຫລື ເໝືອນຊົ່ວໂມງດຽວໃນເວລາກາງຄືນ.
ພຣະອົງໄດ້ກວາດມະນຸດໄປໃນຄວາມຕາຍ
ພວກເຂົາເປັນເໝືອນຫຍ້າຂຽວສົດໃນເວລາເຊົ້າ
ເຊິ່ງໃນເວລາເຊົ້າມັນກໍງອກຂຶ້ນມາໃໝ່
ແຕ່ເມື່ອຄ່ຳມາມັນກໍແຫ້ງ ແລະ ຫ່ຽວໄປ.
ພວກຂ້ານ້ອຍຖືກເຜົາຜານໂດຍຄວາມໃຈຮ້າຍຂອງພຣະອົງ
ແລະ ຕົກໃຈຢ້ານກົວໂດຍຄວາມຮ້າຍຂອງພຣະອົງ.
ພຣະອົງໄດ້ເປີດເຜີຍຄວາມຊົ່ວຊ້າຕ່າງໆຂອງພວກຂ້ານ້ອຍຕໍ່ໜ້າພຣະອົງ,
ຄວາມບາບທັງຫລາຍຂອງພວກຂ້ານ້ອຍທີ່ເຊື່ອງຢູ່ກໍປາກົດແຈ້ງໃນຄວາມສະຫວ່າງຕໍ່ໜ້າພຣະອົງ.
ວັນເວລາທັງໝົດຂອງພວກຂ້ານ້ອຍໄດ້ໝົດໄປພາຍໃຕ້ຄວາມໂກດຮ້າຍຂອງພຣະອົງ;
ປີເດືອນຂອງພວກຂ້ານ້ອຍຈົບລົງດ້ວຍການຄ່ຳຄວນ.
ຊ່ວງຊີວິດຂອງພວກຂ້ານ້ອຍຄືເຈັດສິບປີ,
ຫລື ແປດສິບປີ, ຖ້າກຳລັງຂອງພວກຂ້ານ້ອຍຍັງມີຢູ່;
ແມ່ນແຕ່ເວລາທີ່ດີທີ່ສຸດຂອງພວກເຂົາກໍມີແຕ່ຄວາມເດືອດຮ້ອນ ແລະ ໂສກເສົ້າ,
ເພາະບໍ່ດົນກໍຜ່ານພົ້ນໄປ ແລະ ພວກເຮົາກໍຈາກໄປ.
ຜູ້ໃດທີ່ຮູ້ເຖິງລິດອຳນາດແຫ່ງຄວາມໃຈຮ້າຍຂອງພຣະອົງ?
ເພາະຄວາມໂກດຮ້າຍຂອງພຣະອົງນັ້ນໃຫຍ່ຫລວງເທົ່າກັບຄວາມໜ້າຢຳເກງຂອງພຣະອົງ.
ຂໍໂຜດສອນພວກຂ້ານ້ອຍໃຫ້ນັບເວັນເວລາຂອງຕົນ,
ເພື່ອພວກຂ້ານ້ອຍຈະໄດ້ມີຈິດໃຈທີ່ປະກອບດ້ວຍສະຕິປັນຍາ.
ຂ້າແດ່ພຣະເຈົ້າຢາເວ! ຂໍໂຜດກະລຸນາດ້ວຍ ຈະເປັນຢ່າງນີ້ໄປອີກດົນເທົ່າໃດ?
ຂໍໂຜດເມດຕາສົງສານບັນດາຜູ້ຮັບໃຊ້ຂອງພຣະອົງດ້ວຍ.
ຂໍໃຫ້ພວກຂ້ານ້ອຍອິ່ມເຕັມດ້ວຍຄວາມຮັກໝັ້ນຄົງຂອງພຣະອົງໃນເວລາເຊົ້າ.
ເພື່ອພວກຂ້ານ້ອຍຈະຮ້ອງເພງດ້ວຍຄວາມຊື່ນຊົມຍິນດີ ແລະ ຍິນດີຕະຫລອດຊົ່ວຊີວິດຂອງພວກຂ້ານ້ອຍ.
ໂປດໃຫ້ວັນເວລາອັນຜາສຸກຍືນຍາວແກ່ພວກຂ້ານ້ອຍ
ເພື່ອຊົດເຊີຍກັບປີເດືອນທີ່ພຣະອົງໄດ້ໃຫ້ພວກຂ້ານ້ອຍພົບກັບຄວາມເດືອດຮ້ອນ.
ຂໍສະແດງກິດຈະການຂອງພຣະອົງແກ່ບັນດາຜູ້ຮັບໃຊ້ຂອງພຣະອົງ,
ສະແດງຄວາມສະຫງ່າງາມຂອງພຣະອົງແກ່ບັນດາລູກຫລານຂອງພວກເຂົາ.
ຂໍໃຫ້ຄວາມພໍໃຈ1ຂອງອົງພຣະຜູ້ເປັນເຈົ້າ ພຣະເຈົ້າຂອງພວກຂ້ານ້ອຍຢູ່ເໜືອພວກຂ້ານ້ອຍ;
ຂໍໂຜດສະຖາປະນາການງານທີ່ມືຂອງພວກຂ້ານ້ອຍເຮັດ
ແມ່ນແລ້ວ, ຂໍໂຜດສະຖາປະນາການງານທີ່ມືຂອງພວກຂ້ານ້ອຍເຮັດດ້ວຍ.
Source notes (1)
- Footnote ຫລື ຄວາມງາມ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.