Biblica® Open Lao Contemporary Version
ເພງສັນລະເສີນ 89
(ມັດຄິນຂອງເອທານ ວົງເອສະຣາ)
ຂ້ານ້ອຍຈະຮ້ອງເພງເຖິງຄວາມຮັກອັນຍິ່ງໃຫຍ່ຂອງພຣະເຈົ້າຢາເວຕະຫລອດໄປ;
ຂ້ານ້ອຍຈະປະກາດໃຫ້ຄົນທຸກຊົ່ວອາຍຸໄດ້ຮູ້ເຖິງຄວາມສັດຊື່ຂອງພຣະອົງ
ດ້ວຍປາກຂອງຂ້ານ້ອຍ.
ຂ້ານ້ອຍຈະປະກາດວ່າຄວາມຮັກຂອງພຣະອົງນັ້ນຢືນຍົງໝັ້ນຄົງຕະຫລອດໄປ,
ປະກາດວ່າພຣະອົງໄດ້ໄດ້ຄວາມສັດຊື່ຂອງພຣະອົງໄວ້ໃນຟ້າສະຫວັນນັ້ນເອງ.
ພຣະອົງໄດ້ເວົ້າວ່າ “ເຮົາໄດ້ເຮັດຄຳໝັ້ນສັນຍາກັບຜູ້ທີ່ເຮົາໄດ້ເລືອກໄວ້,
ເຮົາໄດ້ປະຕິຍານຕໍ່ດາວິດຜູ້ຮັບໃຊ້ຂອງເຮົາວ່າ:
‘ເຮົາຈະຕັ້ງເຊື້ອສາຍຂອງເຈົ້າໄວ້ຕະຫລອດໄປ
ແລະ ໃຫ້ບັນລັງຂອງເຈົ້າຍືນຍົງຢູ່ທຸກຊົ່ວອາຍຸ’ ”.
ຂ້າແດ່ພຣະເຈົ້າຢາເວ, ຟ້າສະຫວັນສັນລະເສີນການອັດສະຈັນຂອງພຣະອົງ,
ແລະ ສັນລະເສີນຄວາມສັດຊື່ຂອງພຣະອົງໃນບ່ອນຊຸມນຸມຂອງຜູ້ບໍລິສຸດດ້ວຍ.
ເພາະຕະຫລອດທົ່ວຟ້າເບື້ອງເທິງ ມີຜູ້ໃດສາມາດທຽບກັບອົງພຣະເຈົ້າຢາເວໄດ້?
ໃນທ່າມກາງຊາວສະຫວັນທັງຫລາຍ ຜູ້ໃດຈະເໝືອນພຣະເຈົ້າຢາເວ?
ພຣະເຈົ້ານັ້ນເປັນທີ່ຢຳເກງຫລາຍທີ່ສຸດໃນທີ່ປະຊຸມຂອງຜູ້ບໍລິສຸດ;
ພຣະອົງໜ້າຢໍາເກງຫລາຍກວ່າບັນດາຜູ້ທີ່ຢູ່ອ້ອມຮອບພຣະອົງທັງໝົດ.
ຂ້າແດ່ພຣະເຈົ້າຢາເວ ພຣະເຈົ້າຜູ້ມີລິດອຳນາດຍິ່ງໃຫຍ່ ມີຜູ້ໃດເໝືອນພຣະອົງ?
ຂ້າແດ່ພຣະເຈົ້າຢາເວ ພຣະອົງມີອຳນາດ ແລະ ຄວາມສັດຊື່ຂອງພຣະອົງກໍອ້ອມຮອບພຣະອົງ.
ພຣະອົງຄອບຄອງຢູ່ເໜືອທະເລທີ່ປັ່ນປ່ວນ
ເມື່ອຄື້ນຊັດຂຶ້ນ, ພຣະອົງກໍເຮັດໃຫ້ມັນສະຫງົບລົງ.
ພຣະອົງໄດ້ບຸກໂຈມຕີຣາຫັບເໝືອນດັ່ງຜູ້ທີ່ຖືກຂ້າ;
ພຣະອົງເຮັດໃຫ້ສັດຕູຂອງພຣະອົງກະຈັດກະຈາຍໄປດ້ວຍມືອັນເຂັ້ມແຂງຂອງພຣະອົງ.
ຟ້າສະຫວັນເປັນຂອງພຣະອົງ, ແຜ່ນດິນໂລກກໍເປັນຂອງພຣະອົງດ້ວຍ;
ພຣະອົງໄດ້ສ້າງໂລກ ແລະ ທຸກສິ່ງທີ່ຢູ່ໃນໂລກ.
ພຣະອົງໄດ້ສ້າງທິດເໜືອ ແລະ ທິດໃຕ້;
ພູເຂົາທາໂບ ແລະ ພູເຂົາເຮີໂມນຕ່າງກໍຮອງຊື່ນຊົມຍິນດີຍົກຍ້ອງນາມຂອງພຣະອົງ.
ແຂນຂອງພຣະອົງນັ້ນມີພະລັງ;
ມືຂອງພຣະອົງແຂງແຮງ, ມືຂວາຂອງພຣະອົງກໍເປັນທີ່ຍົກຍ້ອງ.
ຄວາມຊອບທຳ ແລະ ຄວາມຍຸຕິທຳແມ່ນຮາກຖານແຫ່ງບັນລັງຂອງພຣະອົງ;
ຄວາມຮັກ ແລະ ຄວາມສັດຊື່ແມ່ນອອກໜ້າພຣະອົງ.
ຂ້າແດ່ພຣະເຈົ້າຢາເວ ຄວາມສຸກມີແກ່ບັນດາຜູ້ທີ່ຮູ້ຈັກໂຫ່ຮ້ອງສັນລະເສີນພຣະອົງ,
ຄືຜູ້ທີ່ເດີນໃນຄວາມສະຫວ່າງຕໍ່ໜ້າພຣະອົງ.
ພວກເຂົາຍິນດີໃນນາມຂອງພຣະອົງຕະຫລອດທັງວັນ
ພວກເຂົາຊື່ນຊົມໃນຄວາມຊອບທຳຂອງພຣະອົງ.
ເພາະພຣະອົງເປັນກຽດ ແລະ ເປັນກຳລັງຂອງພວກເຂົາ,
ແລະ ໂດຍຄວາມພໍໃຈຂອງພຣະອົງ ພຣະອົງໄດ້ຍົກຊູພະລັງອຳນາດ1ຂອງພວກຂ້ານ້ອຍ.
ແທ້ຈິງແລ້ວ, ໂລ່2ຂອງພວກເຮົາທັງຫລາຍເປັນຂອງພຣະເຈົ້າຢາເວ,
ກະສັດຂອງພວກເຮົາເປັນຂອງອົງບໍລິສຸດແຫ່ງອິດສະຣາເອນ.
ຄັ້ງໜຶ່ງ ພຣະອົງໄດ້ເວົ້າຜ່ານທາງນິມິດ
ກັບປະຊາຊົນຜູ້ສັດຊື່ຂອງພຣະອົງວ່າ:
“ເຮົາໄດ້ໃຫ້ກຳລັງແກ່ນັກຮົບຜູ້ໜຶ່ງ;
ເຮົາໄດ້ເຊີດຊູຊາຍໜຸ່ມຄົນໜຶ່ງຈາກທ່າມກາງຄົນທັງຫລາຍ.
ເຮົາໄດ້ພົບດາວິດຜູ້ຮັບໃຊ້ຂອງເຮົາ;
ເຮົາໄດ້ເຈີມລາວດ້ວຍນ້ຳມັນບໍລິສຸດຂອງເຮົາ.
ມືຂອງເຮົາຈະຄ້ຳຊູລາວໄວ້;
ແນ່ນອນ ແຂນຂອງເຮົາກໍຈະຊ່ວຍລາວໃຫ້ເຂັ້ມແຂງ.
ສັດຕູຈະບໍ່ມີໄຊເໜືອລາວ;
ຄົນຊົ່ວຮ້າຍຈະບໍ່ກົດຂີ່ຂົ່ມເຫັງລາວ.
ເຮົາຈະຍ່ອງຄູ່ຕໍ່ສູ້ຂອງລາວຕໍ່ໜ້າລາວ
ແລະ ໂຄ່ນລົ້ມບັນດາສັດຕູຂອງລາວ.
ຄວາມຮັກໝັ້ນຄົງຂອງເຮົາຈະຢູ່ກັບລາວ,
ແລະ ເຂົາ3ຂອງລາວຈະໄດ້ຮັບການຍົກຂຶ້ນໂດຍນາມຂອງເຮົາ.
ເຮົາຈະວາງມືຂອງລາວເໜືອທະເລ,
ວາງມືຂວາຂອງລາວເໜືອແມ່ນ້ຳທັງຫລາຍ.
ລາວຈະຮ້ອງຕໍ່ເຮົາວ່າ ‘ພຣະອົງເປັນບິດາ,
ເປັນພຣະເຈົ້າ, ເປັນສີລາ ແລະ ເປັນພຣະຜູ້ຊ່ວຍໃຫ້ພົ້ນຂອງຂ້ານ້ອຍ’.
ແລະ ເຮົາຈະຕັ້ງລາວເປັນລູກກົກຂອງເຮົາ,
ໃຫ້ລາວໄດ້ຮັບການຍົກຍ້ອງສູງສຸດໃນທ່າມກາງກະສັດທັງຫລາຍຂອງແຜ່ນດິນໂລກ.
ເຮົາຈະຖະໜອມຄວາມຮັກຂອງເຮົາທີ່ມີຕໍ່ລາວຕະຫລອດໄປ,
ແລະ ຄຳໝັ້ນສັນຍາຂອງເຮົາຕໍ່ລາວຈະບໍ່ມີວັນສິ້ນສຸດ.
ເຮົາຈະຕັ້ງເຊື້ອສາຍຂອງລາວໄວ້ຕະຫລອດໄປ,
ບັນລັງຂອງລາວຈະຍືນຍົງຢູ່ຄູ່ຟ້າສະຫວັນ.
“ຖ້າລູກຫລານຂອງລາວປະຖິ້ມກົດບັນຍັດຂອງເຮົາ
ແລະ ບໍ່ໄດ້ປະພຶດຕາມກົດເກນຂອງເຮົາ,
ຖ້າພວກເຂົາຝ່າຝືນດຳລັດຂອງເຮົາ
ແລະ ບໍ່ເຮັດຕາມຄຳສັ່ງຂອງເຮົາ,
ເຮົາກໍຈະລົງໂທດຄວາມບາບຂອງພວກເຂົາດ້ວຍໄມ້ແສ້,
ແລະ ຂ້ຽນຕີພວກເຂົາເພາະຄວາມຊົ່ວຊ້າ;
ແຕ່ເຮົາຈະບໍ່ເອົາຄວາມຮັກຂອງເຮົາຄືນມາຈາກລາວ,
ແລະ ຈະບໍ່ມີວັນກະບົດຕໍ່ຄຳໝັ້ນສັນຍາຂອງເຮົາ,
ເຮົາຈະບໍ່ລະເມີດຄຳໝັ້ນສັນຍາຂອງເຮົາ
ແລະ ເຮົາຈະບໍ່ປີ້ນຄຳເວົ້າຂອງເຮົາຄືນ.
ເຮົາໄດ້ປະຕິຍານເປັນຄຳຂາດໂດຍຄວາມບໍລິສຸດຂອງເຮົາ
ແລະ ເຮົາຈະບໍ່ຕົວະດາວິດ.
ຄືເຊື້ອສາຍຂອງລາວຈະດຳລົງຢູ່ຕະຫລອດໄປ
ແລະ ບັນລັງຂອງລາວຈະໝັ້ນຍືນຕໍ່ໜ້າເຮົາເໝືອນດວງຕາເວັນ;
ຈະຕັ້ງໝັ້ນຄົງຢູ່ຕະຫລອດໄປເໝືອນດວງເດືອນ,
ເຊິ່ງເປັນພະຍານທີ່ສັດຊື່ໃນທ້ອງຟ້າ”.
ແຕ່ບັດນີ້ ພຣະອົງໄດ້ປະຕິເສດ, ພຣະອົງໄດ້ປະຖິ້ມຂ້ານ້ອຍແລ້ວ,
ພຣະອົງໄດ້ໃຈຮ້າຍຢ່າງແຮງຕໍ່ຜູ້ທີ່ພຣະອົງໄດ້ເຈີມໄວ້.
ພຣະອົງໄດ້ຍົກເລີກຄຳໝັ້ນສັນຍາທີ່ໃຫ້ໄວ້ກັບຜູ້ຮັບໃຊ້ຂອງພຣະອົງ
ແລະ ໄດ້ຖິ້ມມົງກຸດຂອງລາວລົງໃສ່ຂີ້ຝຸ່ນໃຫ້ເປັນມົນທິນ.
ພຣະອົງໄດ້ທຳລາຍກຳແພງທັງໝົດຂອງລາວ
ແລະ ປ່ອຍໃຫ້ທີ່ໝັ້ນຂອງລາວກາຍເປັນຊາກຫັກພັງ.
ທຸກຄົນທີ່ຜ່ານໄປມາໄດ້ປຸ້ນລາວ;
ລາວກາຍເປັນຂີ້ປາກຂອງເພື່ອນບ້ານຂອງລາວ;
ພຣະອົງໄດ້ຍົກຊູມືຂວາຂອງສັດຕູຂອງລາວ
ພຣະອົງເຮັດໃຫ້ສັດຕູຂອງລາວທຸກຄົນຊື່ນຊົມຍິນດີ.
ແທ້ຈິງແລ້ວ ພຣະອົງໄດ້ປິ່ນຄົມດາບຂອງລາວ
ແລະ ບໍ່ໄດ້ສະໜັບສະໜູນລາວໃນສົງຄາມ.
ພຣະອົງໄດ້ຢຸດຕິຄວາມສະຫງ່າງາມຂອງລາວ
ແລະ ປີ້ນບັນລັງຂອງລາວລົງກັບພື້ນ.
ພຣະອົງໄດ້ຕັດຮອນເວລາໄວໜຸ່ມຂອງລາວໃຫ້ສັ້ນລົງ;
ແລະ ພຣະອົງປົກຄຸມລາວດ້ວຍຄວາມອັບອາຍ.
ຂ້າແດ່ພຣະເຈົ້າຢາເວ ອີກດົນປານໃດ? ພຣະອົງຈະເຊື່ອງພຣະອົງເອງຕະຫລອດໄປບໍ່?
ອີກດົນປານໃດທີ່ຄວາມໂກດຮ້າຍຂອງພຣະອົງຈະໄໝ້ເໝືອນກັບໄຟ?
ຂໍລະນຶກວ່າຊີວິດຂອງຂ້ານ້ອຍຜ່ານໄປໄວປານໃດ.
ພຣະອົງສ້າງມວນມະນຸດໄວ້ຢ່າງບໍ່ມີປະໂຫຍດຫຍັງ!
ຜູ້ໃດສາມາດຢູ່ຄ້ຳຟ້າ ແລະ ບໍ່ຕ້ອງຕາຍ,
ຫລື ຜູ້ໃດທີ່ໜີພົ້ນອຳນາດຂອງຂຸມຝັງສົບໄດ້?
ຂ້າແດ່ອົງພຣະຜູ້ເປັນເຈົ້າ ຄວາມຮັກຍິ່ງໃຫຍ່ຂອງພຣະອົງໃນແຕ່ກ່ອນ
ທີ່ໄດ້ສັນຍາໄວ້ແກ່ດາວິດດ້ວຍຄວາມສັດຊື່ຂອງພຣະອົງນັ້ນຢູ່ຢູ່ໃສ?
ຂ້າແດ່ອົງພຣະຜູ້ເປັນເຈົ້າ ຂໍໂຜດລະນຶກວ່າຜູ້ຮັບໃຊ້4ຂອງພຣະອົງຖືກດູຖູກຢ່າງໃດ,
ແລະ ຂ້ານ້ອຍຕ້ອງທົນຕໍ່ຄຳໝິ່ນປະໝາດຂອງປະຊາຊາດທັງຫລາຍໄວ້ໃນໃຈຫລາຍພຽງໃດ,
ຂ້າແດ່ພຣະເຈົ້າຢາເວ ຂ້ານ້ອຍທົນຕໍ່ຄຳເຢາະເຢີ້ຍທີ່ສັດຕູຂອງພຣະອົງດູຖູກ,
ພວກເຂົາໄດ້ດູຖູກທຸກບາດກ້າວຂອງຜູ້ທີ່ພຣະອົງໄດ້ເຈີມໄວ້.
ຂໍສັນລະເສີນແດ່ພຣະເຈົ້າຕະຫລອດໄປ!
ອາແມນ ແລະ ອາແມນ.
Source notes (4)
- Footnote ຫລື ເຂົາສັດຂອງພວກຂ້ານ້ອຍ “ເຂົາສັດ” ໃນທີ່ນີ້ເປັນສັນຍາລັກຂອງຜູ້ທີ່ເຂັ້ມແຂງ ຫລື ກຳລັງ ເຊັ່ນດຽວກັບຂໍ້ 24
- Footnote ຫລື ກະສັດຜູ້ຄອບຄອງ
- Footnote ຫລື ພະລັງອຳນາດ
- Footnote ຫລື ຜູ້ຮັບໃຊ້ທັງຫລາຍ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.