Biblica® Open Lao Contemporary Version
ເພງສັນລະເສີນ 88
(ບົດເພງ, ບົດເພງສັນລະເສີນຂອງລູກຊາຍຂອງໂກຣາ, ເຖິງຫົວໜ້ານັກຮ້ອງ, ຕາມທຳນອງມາຮາລາດເລອັນໂນດ, ມັດຄິນຂອງເຮມານວົງເອສະຣາ)
ຂ້າແດ່ພຣະເຈົ້າຢາເວ ພຣະອົງເປັນພຣະເຈົ້າຜູ້ຊ່ວຍຂ້ານ້ອຍໃຫ້ພົ້ນ;
ຂ້ານ້ອຍຮ້ອງຫາພຣະອົງທັງກາງເວັນ ແລະ ກາງຄືນ.
ຂໍໃຫ້ຄຳອະທິຖານຂອງຂ້ານ້ອຍນັ້ນຂຶ້ນມາເຖິງຕໍ່ໜ້າພຣະອົງ
ໂຜດອ່ຽງຫູຟັງຄຳຮ້ອງຂໍຂອງຂ້ານ້ອຍດ້ວຍ.
ເພາະຂ້ານ້ອຍນັ້ນຈົມຢູ່ໃນຄວາມເດືອດຮ້ອນ
ແລະ ຊີວິດຂອງຂ້ານ້ອຍກໍໃກ້ຈະຕາຍ.
ຂ້ານ້ອຍຖືກນັບລວມຢູ່ໃນບັນດາຄົນທີ່ລົງໄປສູ່ຂຸມ;
ຂ້ານ້ອຍເປັນເໝືອນຄົນທີ່ບໍ່ມີກຳລັງ.
ຂ້ານ້ອຍຖືກແຍກໄວ້ກັບຄົນຕາຍ
ເໝືອນຜູ້ທີ່ຖືກຂ້າທີ່ນອນຢູ່ໃນຂຸມຝັງສົບ,
ຜູ້ທີ່ພຣະອົງຈະບໍ່ລະນຶກເຖິງອີກຕໍ່ໄປ,
ຜູ້ທີ່ພຣະອົງຈະບໍ່ເບິ່ງແຍງອີກຕໍ່ໄປ.
ພຣະອົງໃຫ້ຂ້ານ້ອຍຈົມລົງໃນຂຸມທີ່ເລິກທີ່ສຸດ,
ໃນບ່ອນເລິກທີ່ມືດມິດທີ່ສຸດ.
ຄວາມໂກດຮ້າຍຂອງພຣະອົງໄດ້ຕົກຢູ່ເໜືອຂ້ານ້ອຍຢ່າງໜັກ;
ພຣະອົງໄດ້ໃຫ້ຄື້ນຂອງພຣະອົງຊັດຖ້ວມຂ້ານ້ອຍ.
ພຣະອົງໄດ້ເຮັດໃຫ້ໝູ່ສະໜິດຂອງຂ້ານ້ອຍຕີໂຕອອກຫ່າງຈາກຂ້ານ້ອຍ
ແລະ ເຮັດໃຫ້ຂ້ານ້ອຍເປັນທີ່ໜ້າກຽດຊັງຕໍ່ພວກເຂົາ.
ຂ້ານ້ອຍຖືກກັກ ແລະ ໝົດທາງໜີ.
ດວງຕາຂອງຂ້ານ້ອຍນັ້ນໝົ່ນໝອງເພາະຄວາມໂສກເສົ້າ.
ຂ້າແດ່ພຣະເຈົ້າຢາເວ, ຂ້ານ້ອຍຮ້ອງຫາພຣະອົງທຸກວັນ;
ຂ້ານ້ອຍຍົກມືຂຶ້ນຕໍ່ພຣະອົງ.
ພຣະອົງສະແດງການອັດສະຈັນແກ່ຄົນຕາຍບໍ?
ຈິດວິນຍານທັງຫລາຍຂອງພວກເຂົາລຸກຂຶ້ນມາສັນລະເສີນພຣະອົງບໍ?
ຄວາມຮັກໝັ້ນຄົງຂອງພຣະອົງຖືກປະກາດໃນຂຸມຝັງສົບບໍ?
ຄວາມສັດຊື່ຂອງພຣະອົງຖືກປະກາດໃນແດນຈິບຫາຍບໍ?
ການອັດສະຈັນຂອງພຣະອົງເປັນທີ່ຮູ້ຈັກໃນແດນແຫ່ງຄວາມມືດມິດບໍ?
ແລ້ວກິດຈະການອັນຊອບທຳຂອງພຣະອົງເປັນທີ່ຮູ້ຈັກໃນແດນທີ່ຖືກລືມບໍ?
ແຕ່ຂ້ານ້ອຍຮ້ອງຫາພຣະອົງໃຫ້ຊ່ວຍ ຂ້າແດ່ພຣະເຈົ້າຢາເວ;
ໃນເວລາເຊົ້າຄຳອະທິຖານຂອງຂ້ານ້ອຍກໍຂຶ້ນໄປເຖິງພຣະອົງ.
ຂ້າແດ່ພຣະເຈົ້າຢາເວ ດ້ວຍເຫດໃດພຣະອົງຈຶ່ງປະຕິເສດຂ້ານ້ອຍ?
ດ້ວຍເຫດໃດພຣະອົງຈຶ່ງເຊື່ອງໃບໜ້າຂອງພຣະອົງຈາກຂ້ານ້ອຍ?
ຕັ້ງແຕ່ຂ້ານ້ອຍຍັງໜຸ່ມ, ຂ້ານ້ອຍໄດ້ທຸກທໍລະມານ ແລະ ເກືອບຕາຍ;
ຂ້ານ້ອຍຕ້ອງປະເຊີນກັບຄວາມໜ້າຢ້ານຂອງພຣະອົງ ແລະ ໝົດຫວັງ.
ຄວາມໂກດຮ້າຍຂອງພຣະອົງຖ້ວມທົ້ນຂ້ານ້ອຍ;
ຄວາມໜ້າຢ້ານຂອງພຣະອົງໄດ້ທຳລາຍຂ້ານ້ອຍ.
ສິ່ງເຫລົ່ານັ້ນໄດ້ອ້ອມຮອບຂ້ານ້ອຍເໝືອນນ້ຳຖ້ວມຕະຫລອດວັນ;
ມັນໄດ້ຖ້ວມຂ້ານ້ອຍຈົນມິດ.
ພຣະອົງໄດ້ເອົາມິດສະຫາຍ ແລະ ເພື່ອນບ້ານໄປຈົນໝົດ
ເຫລືອແຕ່ຄວາມມືດທີ່ເປັນໝູ່ສະໜິດຂອງຂ້ານ້ອຍ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.