Biblica® Open Lao Contemporary Version
ເພງສັນລະເສີນ 92
(ບົດເພງສັນລະເສີນ, ບົດເພງ, ສຳລັບວັນຊະບາໂຕ)
ເປັນການດີທີ່ຈະສັນລະເສີນພຣະເຈົ້າຢາເວ ຂ້າແດ່ອົງຜູ້ສູງສຸດ
ແລະ ເປັນການດີທີ່ຈະບັນເລງເພງແດ່ນາມຂອງພຣະອົງ,
ທີ່ຈະປະກາດຄວາມຮັກຂອງພຣະອົງໃນເວລາເຊົ້າ
ແລະ ປະກາດຄວາມສັດຊື່ຂອງພຣະອົງໃນເວລາກາງຄືນ,
ບັນເລງເພງດ້ວຍພິນສິບສາຍ ແລະ ພິນໃຫຍ່
ບັນເລງດ້ວຍພິນເຂົາຄູ່.
ຂ້າແດ່ພຣະເຈົ້າຢາເວ ເພາະພຣະອົງໃຫ້ຂ້ານ້ອຍຍິນດີກັບກິດຈະການທັງຫລາຍຂອງພຣະອົງ;
ຂ້ານ້ອຍຮ້ອງເພງຊື່ນຊົມຍິນດີໃນສິ່ງທີ່ມືຂອງພຣະອົງໄດ້ກະທຳ.
ຂ້າແດ່ພຣະເຈົ້າຢາເວ ກິດຈະການຂອງພຣະອົງນັ້ນຍິ່ງໃຫຍ່
ຄວາມຄິດຂອງພຣະອົງກໍລ້ຳເລິກທີ່ສຸດ!
ຄົນທີ່ບໍ່ຮູ້ຈັກຄິດບໍ່ສາມາດຮູ້ໄດ້,
ຄົນໂງ່ກໍບໍ່ອາດເຂົ້າໃຈໄດ້,
ຄືເຖິງແມ່ນຄົນຊົ່ວຈະງອກງາມຂຶ້ນດັ່ງຫຍ້າ
ແລະ ຄົນຊົ່ວທັງຫລາຍຈະຮຸ່ງເຮືອງ,
ພວກເຂົາກໍຈະຖືກທຳລາຍໄປຕະຫລອດການ.
ຂ້າແດ່ພຣະເຈົ້າຢາເວ ແຕ່ພຣະອົງເປັນທີ່ຍົກຍ້ອງຕະຫລອດໄປ.
ຂ້າແດ່ພຣະເຈົ້າ ແນ່ນອນ, ສັດຕູຂອງພຣະອົງ
ສັດຕູຂອງພຣະອົງຈະພິນາດຈິບຫາຍໄປຢ່າງແນ່ນອນ;
ບັນດາຄົນທີ່ເຮັດຊົ່ວກໍຈະກະຈັດກະຈາຍໄປ.
ແຕ່ພຣະອົງໄດ້ຍົກພະລັງອຳນາດ1ຂອງຂ້ານ້ອຍໃຫ້ເຂັ້ມແຂງດັ່ງເຂົາຂອງງົວປ່າ;
ນ້ຳມັນບໍລິສຸດຖືກເທລົງເທິງຂ້ານ້ອຍ.
ຕາຂອງຂ້ານ້ອຍໄດ້ເຫັນຄວາມພ່າຍແພ້ຂອງບັນດາສັດຕູຂອງຂ້ານ້ອຍ;
ຫູຂອງຂ້ານ້ອຍໄດ້ຍິນສຽງຂອງສັດຕູຜູ້ຊົ່ວຮ້າຍຂອງຂ້ານ້ອຍພ່າຍແພ້ໄປ.
ຄົນຊອບທຳຈະງອກງາມຂຶ້ນດັ່ງຕົ້ນຕານ,
ພວກເຂົາຈະເຕີບໃຫຍ່ຂຶ້ນດັ່ງຕົ້ນແປກແຫ່ງເລບານອນ;
ເຊິ່ງປຸກໄວ້ໃນວິຫານຂອງພຣະເຈົ້າຢາເວ,
ພວກເຂົາຈະງອກງາມຂຶ້ນໃນສວນຂອງພຣະເຈົ້າຂອງພວກເຮົາ.
ເຖິງແມ່ນເຖົ້າແກ່ແລ້ວກໍຍັງເກີດໝາກ,
ແລະ ຈະຍັງສົດຊື່ນ ແລະ ຂຽວ,
ປະກາດວ່າ “ພຣະເຈົ້າຢາເວນັ້ນທ່ຽງທຳ;
ພຣະອົງເປັນສີລາຂອງຂ້ານ້ອຍ ແລະ ໃນພຣະອົງນັ້ນບໍ່ມີຄວາມຊົ່ວຮ້າຍໃດໆ”.
Source notes (1)
- Footnote ຫລື ເຂົາສັດ ເຊິ່ງເປັນສັນຍາລັກຂອງກຳລັງ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.