Biblica® Open Lao Contemporary Version
ສຸພາສິດ 11
ພຣະເຈົ້າຢາເວກຽດຊັງຕາຊິງທີ່ບໍ່ສັດຊື່,
ແຕ່ພຣະອົງພໍໃຈນໍາການຊັ່ງຕວງທີ່ຖືກຕ້ອງ.
ເມື່ອຄວາມອວດຕົວມາ, ຄວາມອັບອາຍຂາຍໜ້າກໍຕາມມາ,
ແຕ່ປັນຍາມານໍາຄວາມຖ່ອມຕົວ.
ຄວາມສັດຊື່ນຳທາງຄົນທ່ຽງທຳ,
ແຕ່ຄວາມບໍ່ສັດຊື່ກໍຖືກທຳລາຍດ້ວຍກົນອຸບາຍຂອງຕົນ.
ຄວາມຮັ່ງມີຈະຊ່ວຍຫຍັງບໍ່ໄດ້ໃນວັນແຫ່ງຄວາມໂກດຮ້າຍ,
ແຕ່ຄວາມຊອບທຳຊ່ວຍໃຫ້ພົ້ນຈາກຄວາມຕາຍ.
ຄວາມຊອບທຳຂອງຄົນບໍ່ມີທີ່ຕຳໜິເຮັດໃຫ້ທາງຂອງພວກເຂົາຊື່ໄປ.
ແຕ່ຄົນຊົ່ວຮ້າຍຈະລົ້ມລົງດ້ວຍຄວາມຊົ່ວຮ້າຍຂອງຕົນ.
ຄວາມຊອບທຳຂອງຄົນທ່ຽງທຳຊ່ວຍພວກເຂົາໃຫ້ພົ້ນ,
ແຕ່ຄົນບໍ່ສັດຊື່ຈະຖືກບ້ວງແຮ້ວຍ້ອນຄວາມປາດຖະໜາຊົ່ວຂອງຕົນ.
ຄວາມຫວັງທີ່ຝາກໄວ້ນໍາຄົນຊົ່ວກໍຕາຍໄປພ້ອມກັບພວກເຂົາ;
ຄໍາສັນຍາທັງໝົດແຫ່ງອໍານາດຂອງພວກເຂົາກໍຈະສູນເປົ່າ.1
ຄົນຊອບທຳໄດ້ຮັບການກອບກູ້ໃຫ້ພົ້ນຈາກຄວາມເດືອດຮ້ອນ.
ແຕ່ຄວາມເດືອດຮ້ອນນັ້ນຈະຕົກໃສ່ຄົນຊົ່ວຮ້າຍແທນ.
ປາກຂອງຄົນບໍ່ຮູ້ພຣະເຈົ້າທຳລາຍເພື່ອນບ້ານຂອງຕົນ,
ແຕ່ຄົນຊອບທຳໜີໄປໄດ້ໂດຍອາໄສຄວາມຮູ້.
ເມື່ອຄົນຊອບທຳຈະເລີນຮຸ່ງເຮືອງ, ບ້ານເມືອງກໍຊົມຊື່ນຍິນດີ;
ເມື່ອຄົນຊົ່ວຮ້າຍຈິບຫາຍໄປ, ກໍມີສຽງໂຮຮ້ອງຍິນດີ.
ໂດຍພອນຂອງຄົນທ່ຽງທຳ ບ້ານເມືອງກໍໄດ້ຮັບການຍົກຍ້ອງ,
ແຕ່ໂດຍປາກຂອງຄົນຊົ່ວຮ້າຍ ບ້ານເມືອງກໍຖືກທໍາລາຍ.
ຄົນບໍ່ຮູ້ຈັກຄິດກໍດູຖູກເພື່ອນບ້ານຂອງຕົນ,
ແຕ່ຄົນທີ່ມີຄວາມເຂົ້າໃຈກໍຄວບຄຸມລີ້ນຂອງຕົນໄວ້.
ຄຳນິນທາທໍລະຍົດຄວາມໄວ້ວາງໃຈ,
ແຕ່ຄົນທີ່ສັດຊື່ໄດ້ກໍຮັກສາຄວາມລັບໄວ້.
ເພາະຂາດການຊີ້ນຳ ປະເທດຊາດກໍລົ້ມຈົມ,
ແຕ່ມີທີ່ປຶກສາຫລາຍຄົນກໍປອດໄພ.
ຜູ້ໃດກໍ່ຕາມທີ່ຄ້ຳປະກັນໃຫ້ຄົນແປກໜ້າຈະເດືອດຮ້ອນແນ່ນອນ,
ແຕ່ຜູ້ທີ່ປະຕິເສດການຈັບມືສັນຍາກໍປອດໄພ.
ຍິງທີ່ມີໃຈເມດຕາກໍໄດ້ຮັບກຽດ,
ແຕ່ຊາຍໂຫດຮ້າຍໄດ້ພຽງແຕ່ຄວາມຮັ່ງມີເທົ່ານັ້ນ.
ຜູ້ທີ່ມີໃຈເມດຕາກໍສ້າງປະໂຫຍດໃຫ້ຕົນເອງ,
ແຕ່ຜູ້ທີ່ໂຫດຮ້າຍນໍາຄວາມຈິບຫາຍມາສູ່ຕົນເອງ.
ຄົນຊົ່ວຮ້າຍໄດ້ຄ່າຈ້າງທີ່ຫລອກລວງ,
ແຕ່ຜູ້ທີ່ຫວ່ານຄວາມຊອບທຳ ຍ່ອມໄດ້ຮັບບຳເໜັດຢ່າງແນ່ນອນ.
ຄົນຊອບທຳຈະໄດ້ຮັບຊີວິດທີ່ແທ້ຈິງ,
ແຕ່ຜູ້ໃດທີ່ຕິດຕາມຄວາມຊົ່ວກໍຈະພົບຄວາມຕາຍ.
ພຣະເຈົ້າຢາເວກຽດຊັງຄົນທີ່ມີໃຈຫລອກລວງ,
ແຕ່ພຣະອົງພໍໃຈໃນທາງຂອງຄົນທີ່ບໍ່ມີຕຳໜິ.
ຈົ່ງໝັ້ນໃຈວ່າ: ຄົນຊົ່ວຮ້າຍຈະໜີບໍ່ພົ້ນການລົງໂທດ,
ແຕ່ຄົນຊອບທຳຈະໄດ້ຮັບການປົດປ່ອຍ.
ຜູ້ຍິງງາມທີ່ບໍ່ມີຄວາມຮອບຄອບ
ກໍເໝືອນແຫວນຄຳເກາະດັງໝູ.
ຄວາມປາຖະໜາຂອງຄົນຊອບທຳຈົບລົງດ້ວຍດີ,
ແຕ່ຄວາມຫວັງຂອງຄົນຊົ່ວຮ້າຍຈົບລົງດ້ວຍຄວາມໂກດຮ້າຍ.
ຄົນໜຶ່ງໃຫ້ດ້ວຍໃຈກວ້າງຂວາງ, ຍິ່ງມີເພີ່ມຂຶ້ນ;
ແຕ່ບາງຄົນຍິ່ງຂີ້ຖີ່ຍິ່ງທຸກຈົນລົງ.
ຄົນທີ່ມີໃຈເອື້ອເຟື້ອເພື່ອແຜ່ຈະຈະເລີນຮຸ່ງເຮືອງ;
ຜູ້ໃດກໍ່ຕາມທີ່ນຳຄວາມຊື່ນໃຈໄປສູ່ຄົນອື່ນ ກໍຈະໄດ້ຮັບພຣະພອນ.
ປະຊາຊົນສາບແຊ່ງຜູ້ທີ່ກັກເຂົ້າໄວ້ຂາຍກິນກຳໄລ,
ແຕ່ພວກເຂົາອະທິຖານອວຍພອນຜູ້ທີ່ເຕັມໃຈຂາຍໃຫ້.
ຜູ້ທີ່ສະແຫວງຫາເຮັດຄວາມດີ ກໍຈະໄດ້ຮັບຄວາມກະລຸນາ,
ແຕ່ຄວາມຊົ່ວຈະມາຫາຜູ້ທີ່ສະແຫວງຫາມັນ.
ຄົນທີ່ວາງໃຈໃນຊັບສົມບັດຂອງຕົນນັ້ນ ຈະລົ້ມລົງ,
ແຕ່ຄົນຊອບທຳຈະຈະເລີນຂຶ້ນດັ່ງໃບໄມ້ຂຽວ.
ຜູ້ໃດກໍຕາມທີ່ນໍາຄວາມຈິບຫາຍມາສູ່ຄອບຄົວຂອງຕົນຈະບໍ່ເຫລືອຫຍັງ,
ແລະ ຄົນໂງ່ຈ້າຈະເປັນຄົນຮັບໃຊ້ຂອງຄົນສະຫລາດ.
ຜົນແຫ່ງຄົນຊອບທຳເປັນຕົ້ນໄມ້ແຫ່ງຊີວິດ,
ແລະ ຄົນສະຫລາດຈະຊ່ວຍໃຫ້ຄົນອື່ນມີຊີວິດຢູ່.
ຖ້າຄົນຊອບທຳໄດ້ຮັບບຳເໜັດຂອງຕົນໃນແຜ່ນດິນໂລກ,
ຄົນບໍ່ນັບຖືພຣະເຈົ້າ ແລະ ຄົນບາບຍິ່ງຈະໄດ້ຮັບຜົນຂອງຕົນຫລາຍກວ່ານັ້ນອີກເທົ່າໃດນໍ!
Source notes (1)
- Footnote ຫລື ຄວາມຫວັງທີ່ຝາກໄວ້ກັບສິ່ງທີ່ບໍ່ຈີລັງກໍຕາຍໄປພ້ອມກັບມັນ ຄຳສັນຍາທີ່ໄດ້ຈາກອຳນາດຂອງສິ່ງທີ່ບໍ່ຈີລັງກໍສູນເປົ່າ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.