Biblica® Open Lao Contemporary Version
ສຸພາສິດ 12
ຜູ້ໃດກໍຕາມທີ່ຮັກການເຟິກຝົນວິໄນກໍຮັກຄວາມຮູ້,
ແຕ່ຜູ້ໃດກໍຕາມທີ່ກຽດຊັງການດັດແປງແກ້ໄຂກໍໂງ່ຈ້າ.
ຄົນດີໄດ້ຮັບຄວາມພໍໃຈຈາກພຣະເຈົ້າຢາເວ,
ແຕ່ພຣະອົງກ່າວໂທດຄົນທີ່ວາງແຜນຊົ່ວ.
ບໍ່ມີຜູ້ໃດຢືນຢູ່ດ້ວຍຄວາມຊົ່ວຂອງຕົນ,
ແຕ່ຮາກຖານຂອງຄົນຊອບທຳຈະບໍ່ຖືກຖອນຈັກເທື່ອ.
ເມຍທີ່ມີກຽດເປັນມົງກຸດຂອງຜົວ,
ແຕ່ເມຍທີ່ເຮັດໃຫ້ອັບອາຍຂາຍໜ້າເປັນດັ່ງກະດູກຜ່ອຍ.
ແຜນການຂອງຄົນຊອບທຳນັ້ນຍຸຕິທຳ,
ແຕ່ຄໍາແນະນໍາຂອງຄົນຊົ່ວຮ້າຍນັ້ນເປັນການຫລອກລວງ.
ຄໍາເວົ້າຂອງຄົນຊົ່ວຮ້າຍດັກລໍຖ້າເອົາຊີວິດ
ແຕ່ຄໍາເວົ້າຂອງຄົນທ່ຽງທຳຊ່ວຍຄົນໃຫ້ພົ້ນໄດ້.
ຄົນຊົ່ວຮ້າຍຈະຫລົ້ມຈົມ ແລະ ດັບສູນໄປ,
ແຕ່ເຮືອນຂອງຄົນຊອບທຳຕັ້ງໝັ້ນຄົງຢູ່.
ຄົນໄດ້ຮັບການຍົກຍ້ອງຕາມຄວາມສະຫລຽວສະຫລາດຂອງຕົນ,
ແຕ່ຄົນທີ່ຄິດຄົດໂກງຈະຖືກໝິ່ນປະໝາດ.
ເປັນຄົນທໍາມະດາແຕ່ມີຄົນຮັບໃຊ້
ກໍດີກວ່າເຮັດທໍາທ່າເປັນຄົນຍິ່ງໃຫຍ່ແຕ່ບໍ່ມີອາຫານກິນ.
ຄົນຊອບທຳເປັນຫ່ວງນໍາການເປັນຢູ່ຂອງສັດລ້ຽງຂອງພວກເຂົາ,
ແຕ່ຄວາມກະລຸນາຂອງຄົນຊົ່ວຮ້າຍກໍຍັງໂຫດຮ້າຍຢູ່.
ຄົນທີ່ເຮັດວຽກໄຖດິນຂອງຕົນຈະມີອາຫານຢ່າງອຸດົມສົມບູນ,
ແຕ່ຄົນທີ່ມີແຕ່ໃຝ່ຝັນກໍເປັນຄົນບໍ່ຮູ້ຈັກຄິດ.
ຄົນຊົ່ວຮ້າຍປາຖະໜາຢາກໄດ້ປ້ອມປ້ອງກັນຂອງຄົນເຮັດຊົ່ວ,
ແຕ່ຮາກຖານຂອງຄົນຊອບທຳຈະໝັ້ນຄົງຢູ່.
ຄົນເຮັດຊົ່ວຈະຖືກບ້ວງແຮ້ວຍ້ອນຄຳເວົ້າຊົ່ວຂອງຕົນ,
ແຕ່ຄົນຊອບທຳກໍພົ້ນຈາກຄວາມເດືອດຮ້ອນ.
ຜົນຈາກປາກຂອງພວກເຂົາ ເຮັດໃຫ້ມະນຸດເຕັມໄປດ້ວຍສິ່ງທີ່ດີ,
ແລະ ການງານຈາກມືຂອງພວກເຂົາຈະນໍາລາງວັນມາໃຫ້ພວກເຂົາ.
ທາງຂອງຄົນໂງ່ຈ້າກໍເບິ່ງຄືວ່າຖືກຕ້ອງ,
ແຕ່ຄົນມີປັນຍາຍ່ອມຟັງຄຳແນະນຳ.
ຄົນໂງ່ຈ້າສະແດງຄວາມຮ້າຍອອກມາໃຫ້ເຫັນທັນທີ,
ແຕ່ຄົນສະຫລາດບໍ່ສົນໃຈຕໍ່ຄຳໝິ່ນປະໝາດ.
ພະຍານທີ່ສັດຊື່ກໍເວົ້າຄວາມຈິງ,
ແຕ່ພະຍານບໍ່ຈິງກໍເວົ້າແຕ່ຄວາມຕົວະ.
ຄຳເວົ້າທີ່ບໍ່ຄິດກໍສຽບແທງດັ່ງດາບ,
ແຕ່ລີ້ນຂອງຄົນມີປັນຍາກໍປິ່ນປົວໃຫ້ຫາຍດີ.
ຮິມສົບທີ່ເວົ້າຄວາມຈິງຍືນຍົງຕະຫລອດໄປ,
ແຕ່ລີ້ນທີ່ຕົວະຢູ່ໄດ້ພຽງຊົ່ວຄາວ.
ການຫລອກລວງຢູ່ໃນໃຈຂອງຜູ້ທີ່ວາງແຜນການຊົ່ວຮ້າຍ,
ແຕ່ຜູ້ທີ່ສົ່ງເສີມຄວາມສະຫງົບສຸກມີແຕ່ຄວາມຊື່ນຊົມຍິນດີ.
ບໍ່ມີເຫດຮ້າຍອັນໃດຕົກໃສ່ຄົນຊອບທຳ
ແຕ່ຄົນຊົ່ວຮ້າຍກໍຈະເຕັມໄປດ້ວຍຄວາມເດືອດຮ້ອນ.
ພຣະເຈົ້າຢາເວກຽດຊັງປາກທີ່ເວົ້າຕົວະ,
ແຕ່ພຣະອົງພໍໃຈນໍາຄົນທີ່ສັດຊື່.
ຄົນສະຫລາດເກັບຄວາມຮູ້ໄວ້ສໍາລັບພວກເຂົາເອງ,
ແຕ່ໃຈຂອງຄົນໂງ່ຈ້າສະແດງຄວາມໂງ່ຈ້າຂອງພວກເຂົາອອກມາ.
ມືທີ່ດຸໝັ່ນກໍຈະໄດ້ປົກຄອງ,
ແຕ່ຄວາມຂີ້ຄ້ານຈົບລົງດ້ວຍການຖືກບັງຄັບໃຊ້ແຮງງານ.
ຄວາມກະວົນກະວາຍເຮັດໃຫ້ໜັກໃຈ,
ແຕ່ຄຳໜູນໃຈເຮັດໃຫ້ມີກໍາລັງຂຶ້ນ.
ຄົນຊອບທຳເລືອກໝູ່ຢ່າງລະມັດລະວັງ,1
ແຕ່ທາງຂອງຄົນຊົ່ວຮ້າຍນໍາພາພວກເຂົາໃຫ້ຫລົງເສຍໄປ.
ຄົນຂີ້ຄ້ານບໍ່ຍອມປິ້ງຊີ້ນທີ່ຄົນອື່ນຫາມາໃຫ້,
ແຕ່ຄົນດຸໝັ່ນຊອກຫາອາຫານມາໄດ້ຢ່າງຫລວງຫລາຍ.2
ທາງແຫ່ງຄວາມຊອບທຳມີຊີວິດ;
ທາງນັ້ນນຳໄປສູ່ຊີວິດນິລັນດອນ.
Source notes (2)
- Footnote ຫລື ຄົນ ຊອບ ທຳເປັນຜູ້ຊີ້ທິດທາງໃຫ້ແກ່ເພື່ອນ ບ້ານ
- Footnote ໃນພາສາເຮັບເຣີຂໍ້ນີ້ມີຄວາມໝາຍບໍ່ຊັດເຈນ
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.