Biblica® Open Lao Contemporary Version
ພຣະບັນຍັດສອງ 16
ປັດສະຄາ
(ອພຍ 12:14-20; ລລວ 23:4-8; ຈບຊ 28:16-25)
ຈົ່ງສະຫລອງປັດສະຄາຂອງພຣະເຈົ້າຢາເວ ພຣະເຈົ້າຂອງພວກເຈົ້າໃນເດືອນອາບີບ, ເພາະໃນເດືອນອາບີບນັ້ນພຣະອົງໄດ້ນຳພວກເຈົ້າອອກມາຈາກເອຢິບໃນເວລາກາງຄືນ. ຈົ່ງເລືອກເຄື່ອງບູຊາປັດສະຄາຈາກຝູງແບ້, ຝູງແກະ ແລະ ຝູງງົວຂອງພວກເຈົ້າ ຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າໃນບ່ອນທີ່ພຣະເຈົ້າຢາເວຈະເລືອກໃຫ້ເປັນບ່ອນສະຖິດຢູ່ຂອງນາມຂອງພຣະອົງ. ຢ່າກິນເຄື່ອງຖວາຍບູຊານີ້ກັບເຂົ້າຈີ່ທີ່ມີເຊື້ອແປ້ງ, ແຕ່ຈົ່ງກິນກັບເຂົ້າຈີ່ບໍ່ມີເຊື້ອແປ້ງຕະຫລອດເຈັດວັນ, ເຊິ່ງເປັນເຂົ້າຈີ່ແຫ່ງຄວາມທຸກທໍລະມານ, ເພາະພວກເຈົ້າອອກມາຈາກເອຢິບຢ່າງຮີບດ່ວນ ເພື່ອວ່າພວກເຈົ້າຈະໄດ້ລະນຶກເຖິງວັນທີ່ພວກເຈົ້າອອກມາຈາກເອຢິບນັ້ນຕະຫລອດຊີວິດຂອງພວກເຈົ້າ. ຢ່າໃຫ້ມີເຊື້ອແປ້ງຢູ່ໃນໃນດິນແດນທັງໝົດຂອງພວກເຈົ້າເປັນເວລາເຈັດວັນ. ຢ່າໃຫ້ມີຊີ້ນທີ່ພວກເຈົ້າຖວາຍໃນແລງວັນທີໜຶ່ງເຫລືອຄ້າງຈົນເຖິງຕອນເຊົ້າ.
ພວກເຈົ້າຕ້ອງບໍ່ຖວາຍເຄື່ອງບູຊາປັດສະຄາໃນເມືອງໃດໆທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ພວກເຈົ້າ ນອກຈາກໃນບ່ອນທີ່ພຣະອົງຈະເລືອກໄວ້ໃຫ້ເປັນບ່ອນສະຖິດຢູ່ຂອງນາມຂອງພຣະອົງ. ຢູ່ທີ່ນັ້ນພວກເຈົ້າຕ້ອງຖວາຍເຄື່ອງບູຊາປັດສະຄາໃນຕອນຄ່ຳເມື່ອຕາເວັນຕົກດິນ, ໃນວັນຄົບຮອບປີ1ແຫ່ງການເດີນທາງອອກມາຈາກເອຢິບຂອງພວກເຈົ້າ. ຈົ່ງປິ້ງຊີ້ນ ແລະ ກິນເຄື່ອງຖວາຍບູຊາໃນບ່ອນທີ່ພຣະເຈົ້າຢາເວ ພຣະເຈົ້າຂອງພວກເຈົ້າຈະເລືອກໄວ້. ແລ້ວກັບໄປທີ່ເຕັນຂອງພວກເຈົ້າໃນເວລາເຊົ້າວັນຕໍ່ມາ. ຈົ່ງກິນເຂົ້າຈີ່ບໍ່ມີເຊື້ອແປ້ງເປັນເວລາຫົກວັນ ແລະ ໃນວັນທີເຈັດໃຫ້ປະຊາຊົນມາຊຸມນຸມກັນຕໍ່ໜ້າພຣະເຈົ້າຢາເວ ພຣະເຈົ້າຂອງພວກເຈົ້າ ແລະ ຢ່າເຮັດວຽກ.
ເທດສະການປະຈຳອາທິດ
(ລລວ 23:15-22; ຈບຊ 28:26-31)
ຈົ່ງນັບເຈັດອາທິດຫລັງຈາກທີ່ພວກເຈົ້າເລີ່ມລົງມືກ່ຽວເຂົ້າ. ແລ້ວຈົ່ງສະຫລອງເທດສະການປະຈຳອາທິດຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າໂດຍມອບເຄື່ອງຖວາຍບູຊາຕາມຄວາມຄວາມສະໝັກໃຈ ຕາມອັດຕາສ່ວນຂອງພຣະພອນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ມອບໃຫ້ແກ່ພວກເຈົ້າ. ແລະ ຈົ່ງຊື່ນຊົມຍິນດີຢູ່ຕໍ່ໜ້າພຣະເຈົ້າຢາເວ ພຣະເຈົ້າຂອງພວກເຈົ້າໃນບ່ອນທີ່ພຣະອົງຈະເລືອກເປັນບ່ອນສະຖິດຢູ່ຂອງນາມຂອງພຣະອົງ, ພວກເຈົ້າພ້ອມກັບລູກຊາຍ ແລະ ລູກສາວຂອງພວກເຈົ້າ, ຂ້າທາດຊາຍ ແລະ ຍິງຂອງພວກເຈົ້າ, ຊາວເລວີໃນເມືອງຂອງພວກເຈົ້າ, ຄົນຕ່າງດ້າວ, ລູກກຳພ້າພໍ່ ແລະ ແມ່ໝ້າຍທີ່ອາໄສຢູ່ໃນທ່າມກາງພວກເຈົ້າ. ຈົ່ງລະນຶກວ່າພວກເຈົ້າເຄີຍເປັນຂ້າທາດໃນເອຢິບ ແລະ ຈົ່ງເອົາໃຈໃສ່ປະຕິບັດຕາມດຳລັດເຫລົ່ານີ້.
ເທດສະການປຸກຕູບຢູ່
(ລລວ 23:33-43; ຈບຊ 29:12-39)
ຫລັງຈາກຮວບຮວມຜົນຜະລິດຈາກລານຟາດເຂົ້າ ແລະ ຈາກອ່າງບີບນ້ຳອະງຸ່ນແລ້ວ ຈົ່ງສະຫລອງເທດສະການປຸກຕູບຢູ່ເປັນເວລາເຈັດວັນ. ຈົ່ງພາກັນຊື່ນຊົມຍິນດີກັບການສະຫລອງເທດສະການຂອງພວກເຈົ້າພ້ອມກັບບັນດາລູກຊາຍລູກສາວ, ຄົນຮັບໃຊ້ຊາຍຍິງ, ຊາວເລວີ, ຊາວຕ່າງດ້າວ, ລູກກຳພ້າ ແລະ ແມ່ໝ້າຍໃນເມືອງຂອງພວກເຈົ້າ. ຈົ່ງສະຫລອງເທດສະການນີ້ຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າໃນບ່ອນທີ່ພຣະເຈົ້າຢາເວຈະເລືອກເປັນເວລາເຈັດວັນ. ເພາະພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນພວກເຈົ້າໃນການເກັບກ່ຽວ ແລະ ໃນວຽກງານທຸກຢ່າງທີ່ພວກເຈົ້າເຮັດ ແລະ ພວກເຈົ້າຈະຊື່ນຊົມຍິນດີຢ່າງເຕັມທີ່.
ຜູ້ຊາຍທຸກຄົນໃນອິດສະຣາເອນຕ້ອງເຂົ້າພົບພຣະເຈົ້າຢາເວ ພຣະເຈົ້າຂອງພວກເຈົ້າປີລະສາມຄັ້ງໃນບ່ອນທີ່ພຣະອົງຈະເລືອກຄື: ໃນເທດສະການກິນເຂົ້າຈີ່ບໍ່ມີເຊື້ອແປ້ງ, ເທດສະການແຫ່ງອາທິດ ແລະ ເທດສະການປຸກຕູບຢູ່. ຢ່າໃຫ້ຜູ້ໃດເຂົ້າພົບພຣະເຈົ້າຢາເວໂດຍມືເປົ່າ. ແຕ່ລະຄົນຕ້ອງນຳເອົາເຄື່ອງຖວາຍມາຕາມອັດຕາສ່ວນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ອວຍພອນ.
ຜູ້ຕັດສິນ
ຈົ່ງແຕ່ງຕັ້ງຜູ້ຕັດສິນ ແລະ ເຈົ້າໜ້າທີ່ປົກຄອງສຳລັບແຕ່ລະເຜົ່າໃນທຸກເມືອງທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ມອບໃຫ້ແກ່ພວກເຈົ້າ ແລະ ຄົນເຫລົ່ານີ້ຈະຕັດສິນຄວາມໃຫ້ປະຊາຊົນຢ່າງຍຸຕິທຳ. ຢ່າບິດເບືອນຄວາມຍຸຕິທຳ ຫລື ສະແດງຄວາມລຳອຽງ. ຢ່າຮັບສິນບົນ, ເພາະສິນບົນບັງຕາຂອງຄົນສະຫລາດ ແລະ ສໍ້ໂກງຄຳເວົ້າຂອງຜູ້ບໍ່ມີຄວາມຜິດ. ຈົ່ງປະຕິບັດຕາມຄວາມຍຸຕິທຳເທົ່ານັ້ນ, ເພື່ອວ່າພວກເຈົ້າຈະມີຊີວິດຢູ່ ແລະ ຄອບຄອງດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ມອບໃຫ້ພວກເຈົ້າ.
ຢ່າກາບໄຫວ້ພະອື່ນ
ຢ່າຕັ້ງເສົາໄມ້ຂອງເຈົ້າແມ່ອາເຊຣາຂຶ້ນຂ້າງແທ່ນບູຊາທີ່ພວກເຈົ້າສ້າງຂຶ້ນແກ່ພຣະເຈົ້າຢາເວ ພຣະເຈົ້າຂອງພວກເຈົ້າ, ແລະ ຢ່າຕັ້ງຫີນສັກສິດຂຶ້ນ ເພາະພຣະເຈົ້າຢາເວ ພຣະເຈົ້າຂອງພວກເຈົ້າກຽດຊັງສິ່ງເຫລົ່ານີ້.
Source notes (1)
- Footnote ຫລື ເມື່ອຕະເວັນຕົກດິນໃນຊ່ວງເວລານັ້ນຂອງມື້
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.