Biblica® Open Lao Contemporary Version
ພຣະບັນຍັດສອງ 15
ປີແຫ່ງການຍົກໜີ້
(ລລວ 25:8-38)
ທຸກທ້າຍປີທີເຈັດພວກເຈົ້າຕ້ອງຍົກໜີ້ຕ່າງໆ. ໂດຍເຮັດດັ່ງນີ້ຄື: ເຈົ້າໜີ້ທຸກຄົນຈະຕ້ອງຍົກເລີກການກູ້ຢືມທີ່ພວກເຂົາໄດ້ເຮັດໄວ້ກັບພີ່ນ້ອງຮ່ວມຊາດອິດສະຣາເອນ. ເຈົ້າໜີ້ຈະຕ້ອງບໍ່ຮຽກຮ້ອງການຊຳລະເງິນຈາກຄົນໃດໃນທ່າມກາງພີ່ນ້ອງຮ່ວມຊາດຂອງຕົນ, ເພາະວ່າເປັນເວລາທີ່ພຣະເຈົ້າຢາເວໄດ້ປະກາດໃຫ້ຍົກເລີກພັນທະໜີ້ແລ້ວ. ພວກເຈົ້າອາດທວງໜີ້ຈາກຄົນຕ່າງດ້າວໄດ້, ແຕ່ຈົ່ງຍົກໜີ້ໃຫ້ຊາວອິດສະຣາເອນທີ່ເປັນພີ່ນ້ອງຮ່ວມຊາດຂອງພວກເຈົ້າເອງ. ເຖິງຢ່າງໃດກໍຕາມ, ຈະບໍ່ມີຄົນທຸກຍາກໃນທ່າມກາງພວກເຈົ້າ, ເພາະພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນພວກເຈົ້າຢ່າງເຫລືອລົ້ນໃນດິນແດນທີ່ພຣະອົງໄດ້ມອບໃຫ້ພວກເຈົ້າຄອບຄອງເປັນມໍລະດົກຂອງພວກເຈົ້າ, ຖ້າພຽງແຕ່ພວກເຈົ້າເຊື່ອຟັງພຣະເຈົ້າຢາເວ ພຣະເຈົ້າຂອງພວກເຈົ້າຢ່າງຄົບຖ້ວນ ແລະ ເອົາໃຈໃສ່ປະຕິບັດຕາມຄຳສັ່ງທັງໝົດທີ່ຂ້າພະເຈົ້າກຳລັງມອບໃຫ້ພວກເຈົ້າໃນວັນນີ້. ເພາະພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນພວກເຈົ້າຕາມທີ່ພຣະອົງສັນຍາໄວ້, ພວກເຈົ້າຈະໃຫ້ຫລາຍຊົນຊາດຢືມ ແຕ່ພວກເຈົ້າຈະບໍ່ຕ້ອງຢືມຈາກຜູ້ໃດ. ພວກເຈົ້າຈະປົກຄອງຫລາຍຊົນຊາດ ແຕ່ຈະບໍ່ມີຊົນຊາດໃດປົກຄອງພວກເຈົ້າ.
ຖ້າມີຄົນທຸກຍາກທ່າມກາງພີ່ນ້ອງອິດສະຣາເອນໃນເມືອງໃດຂອງດິນແດນທີ່ພຣະເຈົ້າຢາເວ ພຣະເຈົ້າຂອງພວກເຈົ້າມອບໃຫ້ແກ່ພວກເຈົ້າ, ຢ່າເປັນຜູ້ມີໃຈແຂງກະດ້າງ ຫລື ຂີ້ຖີ່ຕໍ່ພວກເຂົາ. ກົງກັນຂ້າມ, ຈົ່ງມີໃຈກວ້າງເອື້ອເຟື້ອໃຫ້ພວກເຂົາຢືມຕາມທີ່ພວກເຂົາຕ້ອງການ. ຈົ່ງລະວັງ ຢ່າມີຄວາມຄິດຊົ່ວຮ້າຍຢູ່ໃນໃຈວ່າ: “ປີທີເຈັດ ເຊິ່ງເປັນປີແຫ່ງການຍົກໜີ້ໃກ້ຈະມາເຖິງແລ້ວ”, ພວກເຈົ້າກໍເລີຍບໍ່ມີນ້ຳໃຈ ບໍ່ຍອມໃຫ້ສິ່ງໃດແກ່ພີ່ນ້ອງຜູ້ມີຄວາມຕ້ອງການໃນທ່າມກາງພີ່ນ້ອງອິດສະຣາເອນ. ພວກເຂົາອາດຮ້ອງຂໍຕໍ່ພຣະເຈົ້າຢາເວຕໍ່ສູ້ພວກເຈົ້າ, ແລ້ວຈະຖືວ່າເປັນຄວາມຜິດບາບຂອງພວກເຈົ້າ. ພວກເຈົ້າຈົ່ງໃຫ້ພວກເຂົາດ້ວຍໃຈກວ້າງຂວາງ ແລະ ຢ່າມີໃຈຄິດເສຍດາຍ ເພາະພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນທຸກສິ່ງທີ່ພວກເຈົ້າລົງມືເຮັດ. ຈະມີຄົນທຸກຍາກໃນດິນແດນຢູ່ສະເໝີ. ເຫດສະນັ້ນ ຂ້າພະເຈົ້າຈຶ່ງສັ່ງພວກເຈົ້າໃຫ້ມີໃຈກວ້າງຂວາງແກ່ພີ່ນ້ອງອິດສະຣາອນທີ່ທຸກຍາກຜູ້ທີ່ມີຄວາມຕ້ອງການໃນດິນແດນຂອງພວກເຈົ້າ.
ການປົດປ່ອຍຄົນຮັບໃຊ້
(ອພຍ 21:2-6; ລລວ 25:38-55)
ຖ້າພີ່ນ້ອງຊາວເຮັບເຣີບໍ່ວ່າຜູ້ຊາຍ ຫລື ແມ່ຍິງ ໄດ້ຂາຍຕົນເອງໃຫ້ພວກເຈົ້າ ແລະ ຮັບໃຊ້ພວກເຈົ້າມາຄົບຫົກປີແລ້ວ, ໃນປີທີເຈັດພວກເຈົ້າຕ້ອງປ່ອຍພວກເຂົາໃຫ້ເປັນອິດສະຫລະ. ແລະ ເມື່ອພວກເຈົ້າປ່ອຍພວກເຂົານັ້ນ ຢ່າປ່ອຍພວກເຂົາໄປໂດຍມືເປົ່າ. ຈົ່ງເອົາສິ່ງຂອງທີ່ພວກເຈົ້າໄດ້ມາຈາກຝູງສັດ, ຈາກລານຟາດເຂົ້າ ແລະ ຈາກອ່າງບີບນ້ຳອະງຸ່ນໃຫ້ແກ່ພວກເຂົາດ້ວຍ. ຈົ່ງແບ່ງປັນໃຫ້ພວກເຂົາຕາມທີ່ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ອວຍພອນພວກເຈົ້າ. ຈົ່ງລະນຶກວ່າພວກເຈົ້າເຄີຍເປັນຂ້າທາດຢູ່ໃນເອຢິບ ແລະ ພຣະເຈົ້າຢາເວ ພຣະເຈົ້າຂອງພວກເຈົ້າໄດ້ໄຖ່ພວກເຈົ້າ. ດ້ວຍເຫດນີ້ຂ້າພະເຈົ້າຈຶ່ງມອບຄຳສັ່ງນີ້ໃຫ້ແກ່ພວກເຈົ້າໃນວັນນີ້.
ແຕ່ຖ້າຄົນຮັບໃຊ້ຂອງພວກເຈົ້າເວົ້າຕໍ່ພວກເຈົ້າວ່າ, “ຂ້ານ້ອຍບໍ່ຢາກໄປຈາກພວກທ່ານ”, ເພາະລາວຮັກພວກເຈົ້າ ແລະ ຄອບຄົວຂອງພວກເຈົ້າ ແລະ ລາວກໍຢູ່ກັບພວກເຈົ້າຢ່າງມີຄວາມສຸກ, ແລ້ວກໍຈົ່ງໃຊ້ເຫລັກປາຍແຫລມເຈາະຫູຂອງລາວຢູ່ທີ່ປະຕູເຮືອນ, ແລ້ວລາວກໍຈະກາຍເປັນຄົນຮັບໃຊ້ຂອງພວກເຈົ້າຕະຫລອດຊີວິດ. ຈົ່ງເຮັດຢ່າງດຽວກັນນີ້ກັບຄົນຮັບໃຊ້ຍິງຂອງພວກເຈົ້າ.
ເມື່ອພວກເຈົ້າປ່ອຍຄົນຮັບໃຊ້ໄປເປັນອິດສະຫລະຢ່າຖືວ່າເປັນຄວາມລຳບາກ, ເພາະຄ່າແຮງຂອງລາວຕະຫລອດຫົກປີທີ່ລາວຮັບໃຊ້ພວກເຈົ້ານັ້ນມີຄ່າເປັນສອງເທົ່າຂອງຄ່າແຮງຂອງລູກຈ້າງ ແລະ ພຣະເຈົ້າຢາເວ ພຣະເຈົ້າຂອງພວກເຈົ້າຈະອວຍພອນທຸກສິ່ງທີ່ພວກເຈົ້າເຮັດ.
ລູກຫົວປີຂອງສັດ
ຈົ່ງແຍກສັດຫົວປີໂຕຜູ້ທຸກໂຕອອກຈາກຝູງສັດ ແລະ ຈາກຝູງແກະຂອງພວກເຈົ້າໄວ້ສຳລັບຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າ. ຢ່າເອົາລູກງົວຫົວປີໄປໃຊ້ງານ ແລະ ຢ່າຕັດຂົນລູກແກະຫົວປີຂອງພວກເຈົ້າ. ແຕ່ລະປີພວກເຈົ້າກັບຄອບຄົວຈະຕ້ອງກິນສັດເຫລົ່ານີ້ຢູ່ຕໍ່ໜ້າພຣະເຈົ້າຢາເວ ພຣະເຈົ້າຂອງພວກເຈົ້າໃນບ່ອນທີ່ພຣະອົງຈະເລືອກໃຫ້. ຖ້າສັດຫົວປີມີຕຳໜິເຊັ່ນ: ຂາເຄ ຫລື ຕາບອດ ຫລື ມີສິ່ງທີ່ຜິດປົກກະຕິ, ຢ່ານຳມາຖວາຍແກ່ພຣະເຈົ້າຢາເວ ພຣະເຈົ້າຂອງພວກເຈົ້າ. ພວກເຈົ້າຈົ່ງກິນສັດເຫລົ່ານີ້ໃນເມືອງຂອງພວກເຈົ້າເອງ. ທັງຜູ້ທີ່ບໍ່ເປັນມົນທິນ ແລະ ເປັນມົນທິນຕາມພິທີກຳກໍກິນໄດ້ເໝືອນກັບທີ່ກິນຊີ້ນກວາງນ້ອຍ ຫລື ກວາງ. ແຕ່ຢ່າກິນເລືອດ, ຈົ່ງເທລົງເທິງພື້ນດິນເໝືອນກັບເທນ້ຳ.
Biblica® Open Lao Contemporary Version. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.