Lamma Bible Translation Project
Afisawayi 2
Yunɛ vɔrɔ anɛ Suru
Akɨnti ɔ si naa shɔ gbeteyi vɔtɛttɔyɛ aruviya ɔ bɛ̃ɛ̃ Ɗalapa nya gɨnnɛ awɔ pɛli ruuvini. A ɗauni ɔ gɨn nyaba kɔ̃linɛ shɔ kotipi; ɔ gɨn suru kɔ̃linɛ gbete i ɗaki shɔyɛ, suru gbete sã shɔgbeteyi gɨn Ɗalapa nyaɓayɛ. Nizɛ kɔ u kpai u sijo naa ikɔ, u gɨn jo vigbete u bi kasiyɛ, u pɛli vigbete u bi a sisɨn kasiyɛ. Au ɔ̃nɛ nɔgbete u kasiyɛ, jinagbete ko-piya kasiyɛ, ukɔma siu kãanɛ Ɗalapa sisɨn lɛsinɛ nɛu nɔ au yuu nagbete nɔ a shɔ zɔgãsiyi yuuyɛ.
Ama Ɗalapa raantanɛ pɛ bang, u ɔrinɛ gbete ɔriuyɛ pɛ̃niba, aruukɔ aɗagbete u si naa shɔgbeteyi vɔtɛttɔyɛ a suru u ji gɨn Ɗalapa nya ɓa, a sɔriu a suruni a Kirisi kabii. U kpaa naraanɛ a nyaba Ɗa tɔ̃vɨn shonɛ. Au yuɓasinɛ a Kirisi Yesɔni, Ɗalapa yusiu laparɛ nɛu ɔ̃ awuni kolapa. Ɗalapa pɛli vim aru u tasi shɔ laduru gbete i kaanɛ nɛ, u vishonɛ tɔ̃vɨn au tɛɛ kaka shanɛtɔ aɗɔn yisinya ɓa, a ɔrinɛ gbete tasiu a Kirisi Yesɔ kabiiyɛ. Aruiviya a nyaba Ɗalapa tɔ̃vɨn pɛlinɛ a sisɨn ãnɛ Ɗabii ɔ kpaa naraanɛrɛ. Ɓa ruu ɔ vishonɛ kakabi ɓa, ama pɛ Ɗalapa vi ãnɛ, shɔwɔyɛ baasi ɓa au yuuni ɓa. Ɗalapa kɔ pɔ̃u jo namini, au yuɓasinɛ a Kirisi Yesɔni, shɛshiu ayuu vitɔ̃vɨng pɛlinɛ, gbete pɔ̃siu tɛttɔ nɛu pɛliyɛ.
Shɔ sisɨn Ãnɛ a Kirisi i Gbete
Ɔ shɔgbete ɔ ɓa Yahudawa ɓa a yeenɛ. Gbete Yahudawayi ɓainɛ <<shɔgbete shɔ ji yeeriyi shaa ɓayɛ>>ai ɓai yuunɛ shɔ yeeriyi shaatɛyɛ ( vim tasi vigbete vɔshɔ pɛliu biiyɛ ɔ kpaa sisɨntɔ a nɔgbete ɔ si a kɨntiyɛ. A ɗauni si shɔ ji ɓasɔɔ ɓa Kirini ɓa. Ɔ si pɛ shɔzatiyi, awɔ si ɓa tete shɔgbete Ɗalapa lɔyiyɛni ɓa. Ɔ siɓa a tete ruumanɛni ɓa, gbete a Ɗalapa ma au shɔbiiyiyɛni ɓa, awɔ ɔ̃ a kotipim sisɨn pɔ̃nɛ ɓa, ɔ Ɗalapa ɓa. Ama kayuɓasinɛ a Kirisi Yesɔni, shɔgbete ɔ si kpɛlɛ a wuniyɛ, a nyaba Kirisi kpaa Ɗalapa n-tɔɔtɛ maani awuni. Aruviya Kirisi au yuu n-tiu ɔ̃nɛbiinyatɔ̃nɛtɛ a nyaba gbete ɓasi Yahudawayi a shɔgbeteyi ɓa Yahudawa ɓa i ɔ̃tɛ gbete. Au bikɔ sãki kãsiri gbete vɔsiyirɛ a risiyi shɔnɔpɔ̃ a zɔni. Sɔ̃ɔ̃ Musa nya-ãsinɛtɛ au nyadanɛni, pɛli vim ɗɔkɔ aru u ɓasi Yahudawayi a shɔgbeteyi ɓa Yahudawa ɓa i ɔ̃ gbete awuni. A nyabankɔ i kpaa ɔ̃nɛbiinyatɔ̃nɛ. Kirisi vɔnɛ a yulaa lɛsiyi ɔ̃nɛ nɔpɔ̃ kati; a nyaba laa gbete shɔ ɓaunaa aɗɔn ɓasi Yahudawayi a shɔgbete i ɓa Yahudawa ɓayi yuu gbete a sɔriyi a Ɗalapa ɗɔbii. Aruukɔ Kirisi arɛ a nwari ruu tɔ̃vɨn piti a shɔgbeteyi ɓa Yahudawa ɓa kpai aru ɔ̃nɛbiinyatɔnɛ, ɔ shɔgbete ɔ kpɛlɛ a Ɗalapani, a Yahudawayini shɔgbete i maani a Ɗalapani. Ji a Kirisi ruubiikɔ u piti kpai, Yahudawayi a shɔgbeteyi ɓa Yahudawa ɓa, u yɛ zɛnɔ anɛtɔ a Ɗalapa u Ɓeye ɗekɨn a suru gbete.
Aru nankɔ ɔ shɔgbete ɔ ɓa Yahudawa ɓam, ɔ tɔkɨn shɔtipi wɔɔyi ko shɔzatiyi ɓa; dɔdɔrim ɔ jatipiyi a Ɗalapa shɔbiiyi, ɔ tete Ɗalapa shɔwɛrɛyi. Ɔkɔma shɔ maawɔtɛ jo a dɔjaa gbete Yesɔ jashonɛyi a janyagadi i gaa manɛyɛni, Kirisi Yesɔ au yuu ukɔ ɔ̃rɛ tari tɔ̃vɨn pɛ̃niba. Ukɔ sã ɗɔmaanɛurɛ kpai a ɗɔzɔ, a pɔ̃ ɗɔu banɛrɛ ɔ̃ wɛrɛ Ɗa wɔsɔ-wɔsɔ gbete shɔ ã tɛtɔ a Uɓeyelapa naa. Awɔ yuɓasinɛ a Kirisini ɔkɔma shɔ maawɔtɛ jo awuni nyazɔ, a shɔ gãsiyini kpai a ɗɔgbete Ɗalapa ɔ̃ yɛ, au ka suru.
Lamma Bible Translation Project. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.