Afisawayi 3

Bulus Pɛli Shɔgbeteyi Ɓa Yahudawayi ɓa Vishonɛ

1Aru gbetenkɔ, Nkɔng Bulus n ɔ̃ a jaahm aru Kirisi Yesɔ yuu n gaki Ɗa awɔ yuu shɔgbete ɔ ɓa Yahudawaɓayɛ. 2Pɛnizɛ ɔ ntatɛttɔ nɛ Ɗalapa aru u tɔ̃vɨn pɛlinɛ ang vishonɛm nɛn pɛli awɔ yuu. 3Ɗalapa ɓeli u ruumanɛ gbete ma a ɗɔɓusinɛ a tasinrɛ. ( N bee jaavi tɛttɔ au yuuni, 4naa ɔkɛ ɓali vigbete n beeyɛnɛ, ɔ yɛ mativitɔ ang vigbete n zɛyɛni ayuu Kirisi viɓusinɛni.) 5Si tɛ̃ɛ̃tɛ̃ɛ Ɗalapa jo geli shɔ ruɓusinɛm ɓa, ama dɔdɔrim a nyaba Ɗa suru Ɗalapa ɓeli jashonɛ au janyagadiyi ruɓusinɛutɛ. 6Ruɓusinɛ ukɔ ɔ̃rɛ nɛ, a ka ruu tɔ̃vɨnkɔ Shɔgbeteyi ɓa Yahudawaɓa a Yahudawayini i kpaa Ɗa vɔɔ susãri tasinɛtɔ; i pɛ gboki bi gbetenkɔ, ikɔma i kpaa vitɔ atette vigbete Ɗalapa ma a Kirisi Yesɔ kabiini.

7Ɗalapa pɔ̃ jawɛrɛ nɛn ayuu ruu tɔ̃vɨn aru sẽrẽ tɔ̃vɨn pɛlinɛ gbete Ɗalapa ãng-yɛ, gbete ãng-yɛ au tete kaka vishonɛ. 8Nkɔng ɔ̃rɛ pẽtẽrẽ a tete Ɗalapa ɓɛɛ shɔzɛyi ni; a shɔmni piti kpai Ɗalapa yaasin nyabatɛ nɛn n ti shɔ gbeteyi ɓa Yahudawayi ɓa ruu tɔ̃vɨn ɗɔrɔrɔm, 9Ɗalapa lɔrɛ n pɔ̃rɛ shɔ piti kpai shɔu zɛu ruɓusinɛ gbete ɓusi au sisɨn au vishonɛ. Ɗalapa shɔgbete au shɛshi vi piti kpai, ɓusi ruɓusinɛm gbiti-gbiti a saa gbete tɛɛyɛ piti kpai, 10Si a Ɗalapa sisɨn nɛ dɔdɔrim nɛn pɛli vishonɛ a shɔ gbeteyi ãsisɨn a Ɗabiiyɛ nɛi geli shɔ kakayi gbeteyi kolapa a kotipini i zɛ Ɗa ruu sẽrẽ tottot tɔ. 11Ɗalapa pɛli vim ayuu u ruu gbete sɔ̃nyaɓayɛ, au kpaa pɛlinɛ a Kirisi Yesɔ Uɓeyelapa kabiiyɛ. 12A yuɓasinɛ a Kirisini au nyaba sisɨn ãnɛ Ɗabi awuni u bilakitɛ u yɛ Ɗalapa ɗekɨn a kakani fɛ̃ɛm. 13Aru nankɔ n gakɔɔtɔ ɔkɔɔ zɔ̃ sisɨnnɛ aruviya n ɗɔgbete n ɓooraa awɔ yuuyɛ; n pɛli vim piti kpai awɔ yuukɔ.

Kirisi Ɔrinɛ

14Aru vigbete Ɗalapa pɛlinyɛ n ta a yugboti au Ɓeye gbete a lapayɛ ɗekɨn, 15ukɔ ɔ̃rɛ shɔ gbete ã wɛrɛ kopishɔpiya nii gaanɛrɛ a kolapa a kotipini kpai. 16N gaki Ɗalapa au tete ɓusɨng sisɨn bassinɛ waanɛ u ãwɔ kaka aka Ɗa suru aru ɔ sisɨn u lakitɔ, 17n gaki Ɗa n-tɛ Kirisi u kɔ u wɛrɛ awɔ sisɨn a nyaba sisɨn-ãnɛ. N gaki Ɗa n-tɛ ɔ kpaa gɨn-gɨn zɔ ɔrinɛtɔ, 18nɔgbete ɔ a shɔ gbeteyi ãsisɨn yɛ, ɔ kpaa kaka gbete ɔ zɛvi raaki fɛ̃ɛmtɔ, u yushinɛ au jambani, ukɔ Kirisi ɔrinɛ. 19Ɔ a kati ɔ zɛu ɔrinɛrɛ ya ko a shomni kpai shɔ zɛ dɔɔɓa piti kpaini ɓa- aru nankɔ ɔ nta Ɗalapa vishonɛtɔ awɔ sisɨn.

20Au bi u kaka vishonɛ aɗɔgbete shovi-shonɛ au biiyɛ, pɛli vishonɛtɛ fɛ̃ɛm tɛ vigbete au kãyɛtɔ, ko vigbete u yɛ lɛri a sisɨnyɛ: 21bassinɛ yɛnɛ Ɗalapa bi a shɔ gbeteyi ãsisɨn Ɗabii a Kirisi Yesɔni ko-pi ɗaviya, yunɛ dɔdɔrim yɛnɛ ɗekɨn dangdang! Nankɔ.