Biblica® Open Sorani Kurdish Book of Life
فلیمۆن 1
له پۆڵسی به‌ندكراو له‌پێناوی عیسای مه‌سیح، هه‌روه‌ها لهتیمۆساوسی براوه، بۆ فلیمۆنی هاوكاری خۆشه‌ویست، هه‌روه‌ها بۆ خوشكه ئه‌پفییه‌ی خۆشهویستو ئه‌رخیپۆسی هاوڕێمان لهتێكۆشانو بۆ ئه‌و كۆمه‌ڵه باوه‌ڕداره‌ی لهماڵهكهت دایه. با بهرهكهتو ئاشتی خودای باوكمانو عیسای مه‌سیحی خوداوه‌ند بۆ ئێوه بێ.
خۆشهویستیو باوه‌ڕی فلیمۆن
هه‌ر كاتێ یادت بكه‌م له‌نۆیژه‌كانم سوپاسی خودا ده‌كه‌م، چونكه هه‌واڵی باوه‌ڕو خۆشه‌ویستی تۆم بیستووه به‌رامبه‌ر به عیسای مهسیحو هه‌موو برایانی پیرۆز، داواكارم له‌خودا ئه‌و باوه‌ڕه به‌هێز بكات كه به‌یه‌كه‌وه ده‌مانبه‌ستێته‌وه لهناسینی هه‌موو ئه‌و چاكانه‌ی هه‌مانه به‌هۆی مه‌سیحه‌وه. ئه‌ی برا چه‌ند دڵشادو ووره به‌رزم به خۆشه‌ویستی تۆ، چونكه دڵی برایانی پیرۆزت گه‌شانده‌وه.
داواكاری پۆڵس
هه‌رچه‌نده مافی ئه‌وه‌م هه‌یه به‌هۆی مه‌سیح، فه‌رمانت بۆ ده‌ربكه‌م سه‌باره‌ت به‌و كاره‌ی پێویسته بیكه‌یت، به‌ڵام له‌به‌ر ئه‌و خۆشه‌ویستیه‌ی هه‌مانه داوات لـێ‌ده‌كه‌م، وه‌ك نوێنه‌رێك كه ئێستا به‌ندكراوه له‌پێناوی عیسای مه‌سیح، سه‌باره‌ت به ئۆنسیمۆسی كوڕم، ئه‌وه‌ی لهبهندیخانه به‌هۆی من باوه‌ڕی هێنا، ئه‌وه‌ی جاران بێ كه‌ڵك بوو بۆ تۆ، به‌ڵام ئێستا كه‌ڵكی بۆ منو بۆ تۆ هه‌یه.
ئه‌و ده‌نێرمه‌وه بۆ لات، وه‌ریبگره وه‌ك پارچه‌یه‌ك لهجگهرم. حه‌زم ده‌كرد لێره لای خۆم بیهێڵمه‌وه، تا خزمه‌تی منی به‌ندكراو له‌پێناوی مزگێنی بكات لهجیاتی تۆ. به‌ڵام نه‌مویست هیچ شتێك بێ ڕه‌زامه‌ندی تۆ بكه‌م، تاوه‌كو ئه‌م كاره چاكه به‌خواستی خۆت بێت نه‌ك به‌ناچاری. له‌به‌رئه‌مه ئۆنسیمۆس بۆ ماوه‌یه‌ك لێت دووركه‌وته‌وه، تاوه‌كو بۆ هه‌تاهه‌تایه بگه‌ڕێته‌وه لات، جا له‌ئه‌مڕۆ به‌دواوه كۆیله نییه، به‌ڵكو باشتر له‌كۆیله، برایه‌كی خۆشه‌ویسته لهمهسیح. برایه‌كی خۆشه‌ویسته بۆ من ئاخۆ چه‌ند زیاتر بێت بۆ تۆ؟ كه لهلهشو خوداوه‌ند هاوبه‌شن.
گه‌ر تۆ من به‌هاوبه‌شی خۆت داده‌نێیت، پێشوازی لـێ‌بكه وه‌ك پێشوازی له‌من بكه‌یت. گه‌ر له شتێك خراپه‌ی به‌رامبه‌ر كردووی یاخود قه‌رزێكت به‌سه‌ریه‌وه هه‌یه، له‌سه‌ر منی بنووسه. من پۆڵسم بهخهتی ده‌ستی خۆم ده‌ینووسم كه‌وا ده‌یده‌مه‌وه، نامه‌وێ پێت بڵێم تۆ خۆشت قه‌رزاری منی. جا براگیان ئه‌م چاكه‌یه‌م له‌گه‌ڵ بكه له‌پێناوی خوداوه‌ند، دڵخۆشم بكه لهمهسیح. له‌كاتێ ئه‌م نامه‌یه ده‌نووسم بۆت، باوه‌ڕم پێت هه‌یه داواكاریه‌كه‌م جێ‌به‌جێ ده‌كه‌یت، به‌ڵكو دڵنیام زیاتر ده‌كه‌یت له‌وه‌ی داوات لـێ‌ده‌كه‌م.
سڵاوی كۆتایی
بێجگه له‌مه‌ش، شوێنی مانه‌وه‌م بۆ ئاماده بكه، چونكه هیوادارم خودا نوێژه‌كانتان قبوڵ بكاتو بمگه‌ڕێنێته‌وه لاتان.
ئه‌په‌فراس كه له‌گه‌ڵم به‌ندكراوه له‌پێناوی عیسای مه‌سیح سڵاوت لـێ‌ده‌كات، هه‌روه‌ها مهرقۆسو ئهرستهرخۆسو دیماسو لۆقای ئیشكه‌ران له‌گه‌ڵم سڵاوت لـێدهكهن.
به‌ره‌كه‌تی عیسای مه‌سیحی خوداوه‌ندمان له‌گه‌ڵ ڕۆحتان بێت. ئامین.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.