Biblica® Open Sorani Kurdish Book of Life
عیبرانییەکان 1
مه‌زنی عیسای مه‌سیح
خودا له‌سه‌رده‌می كۆن، چه‌ند جارێك به‌رێگای جۆراوجۆر به‌هۆی پێغه‌مبه‌ران له‌گه‌ڵ باوباپیرانمان دوا. به‌ڵام ئێستا له‌م سه‌رده‌مه‌ی دواییدا به‌هۆی ڕۆڵه‌كه‌ی له‌گه‌ڵمان دوا، ئه‌وه‌ی خودا كردوویه‌تی بهمیراتگری هه‌موو شتێكو به‌هۆی ئه‌وه‌وه هه‌موو جیهان دروستبووه. ئه‌و تیشكی شكۆمه‌ندی خودایه‌و وێنه‌ی جه‌وهه‌ریه‌تی، ده‌ستیگرتووه به‌گه‌ردوون به‌هۆی ووشه تواناداره‌كه‌ی دوای ئه‌وه‌ی خۆی گوناهه‌كانمانی پاككردهوه، له‌لای ده‌سته ڕاستی خودای مه‌زن له‌ئاسمان دانیشت. به‌م شێوه‌یه عیسا مه‌زنتربوو لهفریشتهكان، هه‌روه‌ها ئه‌و ناوه‌ی به‌میرات بۆی مایه‌وه، له‌ناوی هه‌موو فریشته‌كان له‌پێشترو مه‌زنتره.
جا چ جارێك خودا به یه‌كێك له‌فریشته‌كانی ووتوه: [[تۆ ڕۆڵه‌ی منی، ئه‌مڕۆ بووم به باوكی تۆ؟]] یاخود ووتویه‌تی: [[من ده‌بم به‌باوكی، ئه‌ویش ده‌بێ به‌ڕۆڵه‌م؟]] هه‌روه‌ها كاتێ خودا نۆبه‌ره‌كه‌ی ده‌نێرێت بۆ جیهان، ده‌ڵێ: [[هه‌موو فریشته‌كانی خودا ده‌بێ كڕنووشی بۆ ببه‌ن.]] له‌باره‌ی فریشته‌كانیش ده‌ڵێ: [[فریشته‌كانی وه‌ك ڕه‌شه‌بایان لێهات، هه‌روه‌ها خزمه‌تكاره‌كانی وه‌ك گڕی ئاگریان لێهاتووه.]] به‌ڵام له‌باره‌ی ڕۆڵه‌وه ده‌ڵێ: [[ته‌ختی حوكمڕانیت ئه‌ی خودا بۆ هه‌تاهه‌تاییه، گۆچانی حوكمڕانیت ڕاستودروسته. تۆ ڕاستودروستیت خۆشویستو ڕقت له‌گوناهه، بۆیه خودا، خودای خۆت دهستنیشانی كردی جیا لهههموو ئه‌وانی دیكه ڕۆنی شادی به‌سه‌ردا ڕژاندی.]] هه‌روه‌ها ده‌ڵێ: [[ئه‌ی خوداوه‌ند، تۆ له‌سه‌ره‌تاوه بناغه‌ی زه‌ویت داناوه، ئاسمانیش كاری ده‌سته‌كانته. زهویو ئاسمان له‌ناوده‌چن به‌ڵام تۆ ده‌مێنیت، هه‌موویان له‌ناوده‌چن وه‌ك جلێكی كۆنی ڕزیو. تۆ هه‌موویان وه‌ك جلێكی كۆن ده‌پێچیته‌وه، ئینجا ده‌یانگۆڕی وه‌ك كراسێك، به‌ڵام تۆ ده‌مێنیته‌وه، ساڵانت هه‌رگیز كۆتایی بۆ نییه.]] جا كه‌ی خودا جارێك به یه‌كێ له‌فریشته‌كانی ووتوه: [[له‌لای ده‌سته ڕاستم دانیشه هه‌تا دوژمنه‌كانت بخه‌مه ژێر پێته‌وه]]؟ ئایا فریشته‌كان ڕۆحێكی خزمه‌تكار نین، دهنێررێن له‌پێناوی ئه‌وانه‌ی ڕزگارییان به میرات بۆ ماوه‌ته‌وه؟
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.