Biblica® Open Sorani Kurdish Book of Life
مه‌تا 10
بانگكردنی دوانزه نێرراوه‌كه
ئینجا دوانزه قووتابیه‌كه‌ی* بانگ كرد، ده‌سه‌ڵاتی دانێ تا ڕۆحه پیسه‌كان ده‌ر بكهنو هه‌موو نهخۆشیو ده‌ردێك چاك بكه‌نه‌وه. ناوی دوانزه نێرراوه‌كه‌ش* ئه‌مه‌یه: شه‌معون كه به په‌ترۆس ناوده‌برا له‌گه‌ڵ ئه‌ندراوسی برای، یاقوبی كوڕی زهبدیو یۆحه‌ننای برای. فیلیپۆسو برتۆلماوس، تۆماو مه‌تتای باجگر، یاقوبی كوڕی حه‌لفاو ته‌داوس، شه‌معونی قانهویو یه‌هوزای ئه‌سخه‌ریوتی ئه‌وه‌ی عیسای به‌ده‌سته‌وه‌دا.
عیسا نێرراوه‌كانی ده‌نێرێت
عیسا ئه‌مانه‌ی ناردو ووتی: (ئه‌و ڕێگه‌یه مه‌گرن كه به‌ناو ناجووله‌كاندا ده‌ڕوات، مه‌چنه شاری سامریه‌كان*، به‌ڵكو به‌تایبه‌تی بڕۆنه لای مه‌ڕه وون بووه‌كانی ماڵی ئیسرائیل. كاتێ ده‌چن ئه‌م په‌یامه ڕابگه‌ێنن: (پادشاهێتی ئاسمان نزیك بۆته‌وه.) نه‌خۆش چاك بكه‌نه‌وه، مردوو زیندووبكه‌نه‌وه، گه‌ڕوگولـی پاك بكه‌نه‌وه، ڕۆحه پیسه‌كان ده‌ربكه‌ن. به‌خۆڕایی وه‌رتان گرتووه به‌خۆڕایی بیده‌ن. زێڕو زیو و مس له‌گه‌ڵ خۆتان هه‌ڵ مه‌گرن، توره‌كه له‌گه‌ڵ خۆتان ههڵمهگرن، دوو كراسو دوو پێڵاوو گۆچان مه‌به‌ن، چونكه ئیشكه‌ر شایانی ئه‌وه‌یه خۆراكی خۆی بدرێتێ. ده‌چنه هه‌ر شارو لادێیه‌ك، بگه‌ڕێن به‌شوێن ئه‌وانه‌ی شایانی ئێوه‌بن، له‌وێ بمێننه‌وه هه‌تا كاتی ڕۆیشتنتان دێت. كه چوونه ماڵێك سڵاویان لـێ‌بكه‌ن. ئه‌گه‌ر هاتوو ئه‌و ماڵه به‌ڕاستی شایانی ئه‌وه بوون، با ئاشتیتان بچێته ناویانه‌وه ئه‌گه‌ر شایانی ئه‌وه نه‌بوون، با ئاشتیتان بگه‌ڕێته‌وه بۆ خۆتان. گه‌ر یه‌كێك پێشوازی لێ‌نه‌كردن، یان گوێی لـێ‌نه‌گرتن، ئێوه‌ش كه له‌و ماڵو شاره ده‌چنه‌ده‌ره‌وه، تۆزی پێتان بته‌كێنن. ڕاستیتان پێ‌ده‌ڵێم: له‌ڕۆژی لـێپرسینه‌وه‌دا، دۆخی شاری سهدومو عه‌موره* باشتر ده‌بێ له‌و شاره.
چه‌وسانه‌وه‌ی داهاتوو
( من ئێوه وه‌ك به‌رخِ به‌ناو گورگدا ده‌نێرم، جــا دانابن وه‌ك مــار، نهرمونیان بن وه‌ك كۆتر. ئاگادار بن، خـه‌ڵكی ده‌تان ده‌نه ده‌ست دادگـا، له كه‌نیشته‌كانیاندا به‌قامـچی لێتان ده‌ده‌ن، له‌پێناوی من ده‌برێنه به‌رده‌م دادوه‌رو پادشـاكـان، ئه‌مـه‌ش ده‌بێته شایه‌تیه‌ك بۆ مـن، لای جووله‌كه‌و میلله‌تانیش. كاتێ ده‌تانده‌ن به‌ده‌سته‌وه، گوێ مه‌ده‌نه ئه‌وه‌ی چۆن قسه بكه‌ن یان چی بڵێن، چونكه له‌وكاته‌دا پێتان ده‌ووترێ چی بڵێن. ئێوه خۆتان قسه ناكه‌ن، به‌ڵكو ڕۆحی باوكتانه به‌هۆی ئێوه‌وه قسه ده‌كات. برا، برای خۆی ده‌دا به‌ده‌سته‌وه بۆ مردن، باوك منداڵی خۆی. منداڵان لهباوكو دایك هه‌ڵده‌گه‌ڕێنه‌وه‌و ده‌یانكوژن. خه‌ڵكی ڕقیان لێتان ده‌بێ له‌به‌ر ناوی من، به‌ڵام ئه‌وه‌ی تاكۆتایی خۆی ڕاگرێ، ئه‌وه ڕزگاری ده‌بێت. كه له‌شارێ ده‌تان چه‌وسێننه‌وه، ڕاكه‌ن بۆ شارێكی دیكه. ڕاستیتان پێ‌ده‌ڵێم: شاره‌كانی ئیسرائیل ته‌واو ناكه‌ن پێش هاتنه‌وه‌ی ڕۆڵه‌ی مرۆڤ.
مه‌ترسن
( قوتابی له‌مامۆستاكه‌ی به‌رزتر نییه‌و كۆیله‌ش له‌گه‌وره‌كه‌ی به‌رزتر نییه. به‌سه قوتابی وه‌ك مامۆستاكه‌ی بێت وكۆیله‌ش وه‌ك گه‌وره‌كه‌ی بێت. گه‌ر خاوه‌ن ماڵیان به به‌عله‌زبول* ناوبردبێت ئاخۆ ده‌بێ چی به‌ئه‌ندامانی ماڵه‌كه‌ی بووترێ؟ له‌وان مه‌ترسن، چونكه هیچ شتێكی شاراوه نییه دهرنهكهوێتو هیچ نهێنیه‌ك نییه ئاشكرا نه‌بێت. ئه‌وه‌ی له تاریكیدا پێتانی ده‌ڵێم، له‌ڕووناكیدا بیڵێنه‌وه، ئه‌وه‌ی به‌چرپه گوێتان لـێ‌ده‌بێ، به‌ده‌نگی به‌رز له‌سه‌ربانان ڕایبگه‌ێنن. مه‌ترسن له‌وانه‌ی ده‌تان كوژن به لهشو ناتوانن ده‌روونتان بكوژن، به‌ڵكو ترستان له‌وه‌بێ كه ده‌توانێ لهشو ده‌روون به‌یه‌كه‌وه له‌دۆزه‌خدا له‌ناوبه‌رێ. ئایا دوو چۆله‌كه نافرۆشن به یه‌ك فلس؟ كه‌چی له‌گه‌ڵ ئه‌وه‌شدا، یه‌كێ له‌وانه به‌بێ خواستی باوكتان ناكه‌وێته سه‌ر زه‌وی. ئێوه ته‌نانه‌ت قژی سه‌ریشتان ژمێراوه. كه‌واته مه‌ترسن، ئێوه زۆر له‌چۆله‌كه به‌نرخترن. ئه‌وه‌ی دانم پیاده‌نێ به‌رامبه‌ر به‌خه‌ڵكی، منیش دانی پیا ده‌نێم به‌رامبه‌ر به‌باوكم، ئه‌وه‌ی كه له‌ئاسمانه. به‌ڵام ئه‌وه‌ی نكۆڵیم لێده‌كات به‌رامبه‌ر به‌خه‌ڵكی، منیش نكۆڵی لێده‌كه‌م به‌رامبه‌ر باوكم، ئه‌وه‌ی كه له‌ئاسمانه.
ئاشتینا به‌ڵكو شمشێر
( له‌وباوه‌ڕه‌دا نه‌بن من هاتووم بۆ ئه‌وه‌ی ئاشتی بێنمه سه‌ر زه‌وی، نه‌هاتووم بۆ هێنانی ئاشتی، به‌ڵكو شمشێر! من هاتووم بۆ ئه‌وه‌ی ناكۆكی بخه‌مه نێوان، باوكو كوڕ، كچو دایك، بووكو خه‌سوو. ئا به‌م جۆره مرۆڤ دوژمنی خانه‌واده‌كه‌ی خۆی ده‌بێت.
ئه‌وه‌ی دایكو باوكی له‌من زیاتر خۆشویست، شایانی من نییه. ئه‌وه‌ی كوڕی یان كچی له‌من زیاتر خۆشویست، شایانی من نییه. ئه‌وه‌ی خاچه‌كه‌ی ههڵنهگرێو دوام نه‌كه‌وێت، شایانی من نییه. ئه‌وه‌ی خۆی به‌ژیانیه‌وه به‌ستبێته‌وه، ده‌یدۆڕێنێ، ئه‌وه‌ی ژیانی خۆی له‌پێناوی من بدۆڕێنێ، ده‌یباته‌وه. ( ئه‌وه‌ی پێشوازی له‌ئێوه بكات، ئه‌وا پێشوازی له‌من ده‌كات، ئه‌وه‌ش پێشوازی له‌من بكـات، ئه‌وا پێشوازی له‌وه ده‌كات كه منی ناردووه. ئه‌وه‌ی پێشوازی له‌پێغه‌مبه‌رێك بكات، له‌به‌رئه‌وه‌ی پێغه‌مبه‌ره، ئه‌وا پاداشتی پێغه‌مبه‌رێك وه‌رده‌گرێت. ئه‌وه‌ش پێشوازی له‌مرۆڤێكی چاك بكات، ئه‌وا پاداشتی مرۆڤێكی چاك وه‌رده‌گرێت. هه‌ركه‌سێكیش جامێ ئاوی سارد بدات به‌یه‌كێ له‌م منداڵانه، له‌به‌رئه‌وه‌ی قوتابی منن، ڕاستیتان پێ ده‌ڵێم: پاداشتی ئه‌و هه‌رگیز وون نابێت.)
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.