Biblica® Open Sorani Kurdish Book of Life
مەرقۆس 12
نموونه‌ی باخه‌وانه‌كانی ڕه‌ز
عیسا به‌نموونه قسهیكرد بۆ خه‌ڵكه‌كه، ووتی: (كابرایه‌ك باخێكی مێوی چاندو ده‌وروپشته‌كه‌ی په‌رژین كرد، له‌ناویدا بابه‌تی ترێ گوشینی تێدا داناو شوێنی پاسه‌وانی تێدا دروستكرد. ئینجا ڕه‌زه‌كــه‌ی دایه‌ده‌سـت باخهوانانو خۆی بۆ ووڵاتێكیكه ڕۆیشت. كاتێ وه‌رزی به‌رووبووم هـات، ئیشكـه‌رێكی نارد بۆ لای باخه‌وانه‌كـان تاكـو لـه‌به‌ری ڕه‌زه‌كه به‌شـی خـۆی بۆ بنێرن. به‌ڵام باخـه‌وانه‌كان كابرایان گرتو لێیانداو به‌ده‌ستی به‌تاڵ ناردیانه‌وه. كابرا دیسانه‌وه ئیشكه‌رێكی كه‌ی نارد بۆ لایان، باخه‌وانه‌كان ئه‌میشیان بهلێدانو سووكایه‌تی پێكردنو سه‌رشـكاویه‌وه بۆ نارده‌وه. ئینجـا كـابرا ئیشـكـهرێكـیكـهی نـارد، بـاخـه‌وانه‌كـان ئه‌مجاره ئیشكه‌ره‌كه‌یان كوشت. كابرا دیسـان چـه‌ند كه‌سێكی تری نارد بۆ لایان، باخـه‌وانه‌كـان ئه‌مجـاره‌شـیان هـه‌ستان به‌لێدانی هـهندێكـیانو كـوشتنی ئـه‌وانی كـه‌یان. كـابرا كـوڕێكی تاقانه‌ی خـۆشـه‌ویستی هـه‌بوو، لـه‌دواییدا هـه‌سـتاو كوڕه‌كه‌ی نارد بۆ لایان، ووتی: هه‌ر چۆنێك بێت له‌كوڕه‌كـه‌م سڵدهكـهنهوه. به‌ڵام باخه‌وانه‌كان به‌یه‌كتریان ووت: ئه‌وه‌تا ئه‌وه میراتگره، وه‌رن بابیكوژین ئه‌وسا مـیراتـه‌كـه بۆ خـۆمان ده‌مێنێته‌وه. ئینجا كوڕه‌كه‌یان گرت، كوشتیانو فڕێیاندایـه ده‌ره‌وه‌ی ڕه‌زه‌كــه. باشه ده‌بێ خـاوه‌نی ڕه‌زه‌كه چیبكات؟ ئه‌و دێتو باخـه‌وانه‌كان له‌ناو دهباتو ڕه‌زه‌كه ده‌دا به‌باخه‌وانانی تر. ئـــــایا له‌كتێبی پیرۆزدا ئه‌م ئایـه‌ته‌تان نه‌خوێندۆته‌وه: [[ئــه‌و به‌رده‌ی وه‌ستاكان ڕهتیانكردهوه، بوو به به‌ردی بناغه. ئه‌مه‌ش له‌خوداوه‌نده‌وه‌یه‌و شتێكی سه‌رسوڕهێنه‌ره له‌به‌ر چاومان.]]؟ دوای ئه‌مه ویستیان عیسا بگرن، چونكه ده‌یانزانی نموونه‌كه ئه‌وان ده‌گرێته‌وه، به‌ڵام له‌خه‌ڵكه‌كه ترسان، ئیتر وازیان لێهێناو ڕۆیشتن.
باج دان به قه‌یسه‌ر
ئینجا هه‌ندێ لهفهریسیهكانو پیاوانی هیرۆدسیان نارده لای عیسا، تاكو به‌ووشه‌یه‌كی خۆی تووشیبكهن. هاتنو پێیان ووت: (مامۆستا ئێمه ده‌زانین تۆ ڕاستگۆیت، گوێش ناده‌یت به‌كه‌س، چونكه پله‌و پایه‌ت به‌خه‌یاڵدا نایه‌ت، ته‌نها فێركـردنی ڕێگه‌ی خودا نه‌بێت به‌شێوه‌یه‌كی ڕاست. باشه ئایا سه‌رانه دان به‌قه‌یسه‌ر دروسته یان نا؟ سه‌رانه بده‌ین یان نه‌یده‌ین؟) به‌ڵام عیسا به‌دووڕوویی ئه‌وانی زانیو پێیووتن: (بۆچی تاقیم ده‌كه‌نه‌وه؟ ئا دینارێكم بده‌نێ باته‌ماشای بكه‌م.) ئه‌وانیـش دینارێكیان پێیدا، ئینجا عیسا لێی پرسین: (باشه ئه‌م وێنه‌و نووسراوه هی كێیه؟) ووتیان: (هی قـه‌یسه‌ره.) پێیووتن: (كه‌واته ئه‌وه‌ی هی قه‌یسه‌ره بیده‌ن به قه‌یسـه‌ر، ئه‌وه‌ش هی خـودایه بیده‌ن به‌خودا.) ئه‌وان به‌م وه‌ڵامه زۆر سه‌ریان سوڕما.
زیندووبوونه‌وه‌ی مردووان
ئینجا هه‌ندێ له‌سه‌دوقیه‌كان كه‌باوه‌ڕ به‌زیندووبوونه‌وه ناكه‌ن، لێیهاتنه پێشه‌وه‌و پرسیاریان لێكردو ووتیان: (مامۆستا، موسا بۆی نووسیوین، گه‌ر یه‌كێ براكه‌ی مردو ژنه‌كه‌ی بێ منداڵ بهجێما، پێویسته له‌سه‌ری براژنه‌كه‌ی بهێنێتو وه‌چه به‌ناوی براكه‌یه‌وه دروست بكات. حه‌وت برا هه‌بوون، یه‌كه‌میان ژنی هێناو مرد بێ ئه‌وه‌ی منداڵی هه‌بێ. دووه‌م براژنه‌كه‌ی خواست، ئه‌ویش مرد بێئهوهی منداڵی له‌پاش به‌جێ بمێنێ، سێهه‌میش هه‌مان شت. ئا به‌م شێوه‌یه هه‌ر حه‌وت براكه مردن، بێئهوهی هیچ منداڵیان له‌پاش به‌جێ بمێنێ. له‌پاشان ژنه‌كه‌ش مرد. باشه له‌ڕۆژی زیندووبونه‌وه‌دا، ژنه‌كه بۆ كامیان ده‌بێت؟ چونكه ژنی هه‌موویان بووه.)
عیسا وه‌ڵامی دانه‌وه ووتی: (ئایا ئێوه گومڕا نین، چونكه نه له‌كتێب ده‌زانن نه له‌هێزی خودا؟ كاتێ خه‌ڵكی زیندووده‌بنه‌وه، نه‌ژن دههێننو نه‌شوو ده‌كه‌ن، به‌ڵكو وه‌ك فریشته‌ی ئاسمان ده‌بن. به‌ڵام ده‌رباره‌ی مردووان كه زیندووده‌بنه‌وه، ئایا له‌ته‌وراتدا نه‌تانخوێندۆته‌وه چۆن خودا له‌ناو ده‌وه‌نه‌كه‌دا له‌گه‌ڵ موسا دواو پێیووت: (من خودای ئیبراهیمو خودای ئیسحاقو خودای یاقوبم؟) ئه‌و خودای مردووان نییه، به‌ڵكو خودای زیندووانه، كه‌واته ئێوه خراپ گومڕابوون!)
گه‌وره‌ترین ڕاسپارده
یه‌كێ له‌مامۆستایانی شه‌ریعه‌ت كه گوێی له‌قسه‌كانیان بوو هه‌روه‌ها بینی عیسا باش وهڵامیدانهوه، لێیپرسی: (چ ڕاسپارده‌یه‌ك یه‌كه‌می هه‌موو ڕاسپارده‌كانه؟) عیسا وهڵامیدایهوه: (یه‌كه‌می هه‌موو ڕاسپارده‌كان ئه‌مه‌یه: [[گوێ بگره ئیسرائیل، خوداوه‌ند خودای ئێمه یه‌ك خوداوه‌نده، جا ده‌بێ خوداوه‌ند خودات خۆش بوێ به‌هه‌موو دڵو هه‌موو گیانو هه‌موو بیرو هه‌موو تواناته‌وه.]] ئه‌مه ڕاسپارده‌ی یه‌كه‌مه. دووه‌میشیان وه‌ك ئه‌م وایه، (ئه‌وه‌ی لێت نزیكه وه‌ك خۆت خۆشت بوێ، ئیتر هیچ ڕاسپارده‌یه‌ك نییه مه‌زنتر له‌م دوو ڕاسپارده‌یه.) ئینجا مامۆستاكه‌ی شه‌ریعه‌ت پێیووت: (مامۆستا ئه‌مه ڕاسته‌و تۆ ڕاستت فه‌رموو. خودا هه‌ریه‌كه‌و هیچ خوداێكیكه نییه ته‌نها ئه‌و نه‌بێ، هه‌روه‌ها خۆشه‌ویستی ئه‌و به‌هه‌موو دڵو به‌هه‌موو تێگهیشتنو به‌هه‌موو تواناوه‌یه، هه‌روه‌ها خۆشه‌ویستی ئه‌وه‌ی لێت نزیكه وه‌ك خۆت باشتره له‌هه‌موو قوربانیهكو قوربانی سوتاندنێك.) كاتێ عیسا بینی كابرا به‌ژیرانه دوا، پێیووت: (تۆ ئه‌وه‌نده دوور نیت له‌پادشاهێتی خوداوه.) دوای ئه‌مه ئیتر كه‌س نه‌یوێرا هیچ پرسیارێكیكهی لێبكات.
مه‌سیح و داود
له‌كاتێكدا عیسا له‌ناو په‌رستگاكه خه‌ڵكی فێرده‌كرد، ووتی: (مامۆستایانی شه‌ریعه‌ت چۆن ده‌ڵێن مه‌سیح* كوڕی داوده؟ كاتێ داود خۆی به‌هۆی ڕۆحی پیرۆزه‌وه دواو ووتی: [[خوداوه‌ند به‌خوداوه‌ندمی فه‌رموو: له‌لای ده‌ستی ڕاستمه‌وه دانیشه تادوژمنانت بخه‌مه ژێر پێته‌وه.]] كه داود خۆی مه‌سیح به‌خوداوه‌ند بانگ بكات، ئیتر چۆن مه‌سیح ده‌بێت به‌كوڕی؟) خه‌ڵكه‌كه زۆر به‌شادومانیه‌وه گوێیان بۆ قسه‌كانی ڕاگرتبوو. عیسا له‌فێركردنه‌كه‌یدا پێی ووتن: (ئاگاداری مامۆستایانی شهریعهتبن، ئه‌وانه‌ی به‌جلی پانو پۆڕو درێژه‌وه دهگهڕێنو حه‌ز ده‌كه‌ن له‌گۆڕه‌پانه گشتیه‌كاندا سڵاویان لێبكرێ، له‌كه‌نیشته‌كان ڕیزی پێشه‌وه ده‌گرن، ڕیزی یه‌كه‌میش له‌كاتی داوه‌ته‌كاندا. هه‌روه‌ها ماڵی بێوه‌ژن ده‌خۆن، وه‌ك خۆده‌رخستن درێژه به‌نوێژه‌كانیان ده‌ده‌ن. ئه‌وانه سه‌ختترین سزا وه‌رده‌گرن.)
به‌خشینی بێوه‌ژن
عیسا به‌رامبه‌ر سه‌ندوقی په‌رستگاكه دانیشتو سه‌یری ئه‌وه‌ی ده‌كرد چۆن خه‌ڵكی پاره‌یان تێدهكرد، زۆر له‌ده‌وڵه‌مه‌نده‌كان پاره‌ی زۆریان خسته ناو سه‌ندوقه‌كه. ئینجا بێوه‌ژنێكی هه‌ژار هاتو دوو پولی خسته ناو سه‌ندوقه‌كه، كه چاره‌ك چاره‌كی دینارێكی نه‌ده‌كرد. عیسا قوتابیه‌كانی بانگكردو پێیووتن: (ڕاستیتان پێدهڵێم، ئه‌و بێوه‌ژنه هه‌ژاره، له‌هه‌موو خه‌ڵكه‌كه زیاتر پاره‌ی خسته ناو سه‌ندوقه‌كه. چونكه هه‌موو ئهوانیتر پارهیاندا له‌وه‌ی له‌پێویستی خۆیان زیاتربوو، به‌ڵام ئه‌وه‌ی ژنه‌كه دای، له‌پێویستی خۆیبوو، ته‌نها هه‌ر ئه‌وه‌ش گوزه‌رانی ئه‌و بوو.)
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.