Biblica® Open Sorani Kurdish Book of Life
مەرقۆس 13
نیشانه‌كانی كۆتایی زه‌مانه
له‌كاتێكدا عیسا په‌رستگاكه‌ی به‌جێ ده‌هێشت، یه‌كێ له‌قوتابیه‌كانی پێیووت: (مامۆستا، سه‌یری ئه‌م به‌ردو خانووه سه‌ر سوڕهێنه‌رانه بكه!) عیساش پێیووت: (ئه‌م خانووه مه‌زنانه ده‌بینیت؟ به‌ردی به‌سه‌ر به‌ردیه‌وه نامێنێو هه‌مووی ده‌ڕوخێت.) كاتێ عیسا له‌سه‌ر چیای زه‌یتون بوو به‌رامبه‌ر په‌رستگاكه، پهترۆسو یاقوبو یۆحه‌نناو ئه‌نده‌راوس به‌ته‌نها لێیان پرسی: (پێمان بڵێ كه‌ی ئه‌م شتانه ڕووده‌دات، پێش ئه‌وه‌ی ئه‌مانه ببێت چ نیشانه‌یه‌ك دیاری ده‌دات؟) عیسا وهڵامیدانهوهو ووتی: (ئاگاداربن، كه‌س هه‌ڵتان نه‌خڵه‌تێنێ. زۆر هه‌ن به‌ناوی منه‌وه دێنو ده‌ڵێن، ئێمه ئه‌وین. به‌مه‌ش زۆر كه‌س هه‌ڵ ده‌خه‌ڵه‌تێنن. كاتێ باسو هه‌واڵی جه‌نگ ده‌بیستن مه‌ترسن، ئه‌مه ده‌بێ ڕووبدات، به‌ڵام ئه‌مه جارێ كۆتایی نییه. میلله‌تان ده‌چن به‌گژ یه‌كترداو ووڵات به‌گژ ووڵاتیكهدا، بوومه‌له‌رزه له‌زۆر شوێن ڕووده‌دات، هه‌روه‌ها برسێتیو نه‌بوونی، به‌ڵام ئه‌مه جارێ پێچو ژانی یه‌كه‌مه. ئاگاداری خۆتان بن، چونكه دهتانبهنه به‌ر دادگاو كه‌نیشته‌كان، لێتان دهدهنو له‌پێناوی من له‌به‌رده‌م حوكمڕانو پادشاكان ڕاده‌وه‌ستێنرَین، تا شایه‌تی بۆ من بده‌ن له‌به‌رده‌میان. هه‌روه‌ها یه‌كه‌مجار ده‌بێ مزگێنی به‌هه‌موو میلله‌تان ڕابگه‌یه‌نرێ. كاتێكیش ده‌تانبه‌ن بۆئه‌وه‌ی بتاندهن به‌ده‌سته‌وه، ناڕه‌حه‌ت مه‌بن به‌وه‌ی چـی بڵێن، به‌ڵكو له‌وێدا چیتان بۆ ده‌وترێ پێیبدوێن، چونكه ئێوه‌نین ده‌دوێن، به‌ڵكو ڕۆحی پیرۆزه ده‌دوێت. برا، برا ده‌دا به‌ده‌سته‌وه بۆ مردن، باوك كوڕ، منداڵان لهباوكو دایك هه‌ڵده‌گه‌ڕێنه‌وه‌و ده‌یانكوژن. هه‌موو خه‌ڵكی ڕقیان لێتان ده‌بێته‌وه له‌پێناوی ناوی من، به‌ڵام ئه‌وه‌ی تاكۆتایی خۆی ڕاده‌گرێ ئه‌وه ڕزگاری ده‌بێت.
گه‌وره‌ترین ته‌نگانه
كاتێ پیسیو كاولبوون ده‌بینن له‌و جێگایه‌ی كه نابێ لێی بێ، ئه‌وه‌ی پێغه‌مبه‌ر دانیال باسی كردووه، (باخوێنه‌ر تێبگات)، دوایی با ئه‌وانه‌ی له‌ناوچه‌ی یه‌هودیادان ڕاكه‌ن بۆ شاخه‌كان، ئه‌وه‌ش له‌سه‌ربانه، بابۆ بردنی هیچ شتێك نه‌یه‌ته خواره‌وه‌و نه‌چێته ژووره‌وه، هه‌روه‌ها ئه‌وه‌ی له‌كێلگه بوو، با نه‌گه‌ڕێته‌وه تاكو جله‌كانی له‌گه‌ڵ خۆی ببات. خاك به‌سه‌ر سكپڕو شیرده‌ر له‌وڕۆژانه‌دا! نوێژ بكه‌ن با ئه‌مه له‌زستاندا نه‌بێت. چونكه ته‌نگانه‌یه‌ك ڕووده‌دات كه هێشتا لهدروستكردنی جیهانه‌وه، ئه‌وه‌ی خودا دروستیكردووه، تا ئه‌مڕۆ شتیوا نه‌بووه‌و نابێت. گه‌ر بێتو خوداوه‌ند ئه‌و ڕۆژانه كه‌م نه‌كاته‌وه، هیچ مرۆڤێك ڕزگاری نابێت. به‌ڵام له پێناوی ئه‌وانه‌ی هه‌ڵبژێرراون، ئه‌و ڕۆژانه كـه‌م ده‌كـرێنه‌وه. گه‌ر هاتوو ئه‌و كاته یه‌كێك پێیووتن: ئه‌وه‌تا مه‌سیح لێره‌یه! یا ئه‌وه‌تا له‌وێیه! باوه‌ڕ مه‌كه‌ن. چونكه چه‌ند مه‌سیحێكی فێڵبازو پێغه‌مه‌ری درۆزن ده‌رده‌كه‌ون، نیشانه‌ی گه‌وره‌و شتی سه‌رسوڕهێنه‌ر ده‌كه‌ن، تاكو ته‌نانه‌ت گه‌ر بتوانن هه‌ڵبژێراوانیش هه‌ڵبخه‌ڵه‌تێنن. به‌ڵام ئاگارداربن، ئه‌وا من ئاگاداری ئه‌م هه‌موو شتانهمكردن، پێش ئه‌وه‌ی ڕووبدات.
هاتنه‌وه‌ی عیسا
به‌ڵام له‌و ڕۆژانه‌دا، دوای ئه‌و ته‌نگانه‌یه، ڕۆژ تاریك دهبێتو تیشكی مانگ ده‌گیرێ، ئه‌ستێره‌كان له‌ئاسمانه‌وه دهكهونو هێزی ئاسمان تێكدهچێت. ئه‌وسا ده‌بینن ڕۆڵه‌ی مرۆڤ له‌ناو هـه‌وره‌وه به‌تواناو شـكۆیه‌كی مه‌زنه‌وه دێت. ئینجا فریشته‌كانی دهنێرێتو هه‌ڵبژارده‌ی خۆی له‌هه‌ر چوار لاوه لـهمسهرو ئه‌وسه‌ری زهویو ئاسمانه‌وه كۆده‌كاته‌وه.
ئه‌م شـته له‌دار هه‌نجیره‌وه فێربن: (كاتێ لقه‌كـانی نه‌رم دهبێتو گه‌ڵا ده‌كات، ده‌زانرێ هاوین نزیك بووه‌ته‌وه. هه‌روه‌ها ئێوه‌ش، كاتێ ده‌بینن ئه‌مانه ڕووده‌دات، بزانن ئه‌و نزیكه‌و له‌به‌ر ده‌رگایه. ڕاستیتان پێدهڵێم، ئه‌م نه‌وه‌یه به‌سه‌ر ناچێت هه‌تا ئه‌مانه هه‌موو ڕوونه‌دات. ئاسمانو زه‌وی له‌ناوده‌چن، به‌ڵام ووته‌كانم هه‌رگیز له‌ناوناچێت.
كه‌س ئه‌و كاته نازانێ
ئه‌و ڕۆژه‌و ئه‌و كاته كه‌س نایزانێت، نه‌فریشته‌ی ئاسمان نه‌ڕۆڵه، ته‌نها باوك نه‌بێت. كه‌واته ئاگاداربنو ئێشك بگرن چونكه نازانن كه‌ی ئه‌و كاته دێت. ئه‌مه لـه‌وه ده‌كـات كـابرایه‌ك بـچێ بۆ گـه‌شـت، ماڵه‌كه‌ی بهجێبهێڵێ، بیداته ده‌ست چه‌ند ئیشكهرێكو هه‌ر یه‌كه ئیشێكیان بداتێ، ده‌رگاوانیش ڕاسپێرێ ئێشك بگرێ. ئیتر ئێشك بگرن، چونكه نازانن گه‌وره‌ی ماڵ كه‌ی ده‌گه‌ڕێته‌وه، ئێواره یاخود نیوه‌ی شه‌و، یا له‌گه‌ڵ خوێندنی كه‌ڵه‌شێر، یا به‌یانی. نه‌وه‌ك له‌ناكاو بگه‌ڕێته‌وه‌و بتانبینێت له‌خه‌ودان. جا ئه‌وه‌ی به‌ئێوه‌ی ده‌ڵێم، ده‌یڵێم به هه‌مووان: ئێشك بگرن!)
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.