Biblica® Open Sorani Kurdish Book of Life
ئەفەسۆس 2
زیندووبوونه‌وه له‌گه‌ڵ مه‌سیح
ئێوه له ڕابوردوودا مردوو بوون لای خودا به‌هۆی گوناه‌و هه‌ڵه‌كانتان، ئه‌وه‌ی له‌سه‌ری ده‌ڕۆیشتن، دوای ڕێبازی ئه‌م جیهانه كه‌وتبوون، دوای سه‌رۆكی هێزی هه‌وا كه‌وتبوون، كه ئه‌و ڕۆحه‌یه ئێستا له‌ڕۆڵه‌كانی یاخیبوون كار ده‌كات. ئێمه‌ش لهكۆندا هه‌موو له‌وانه بووین، به‌پێی ئاره‌زووی له‌ش ده‌ژیاین، شوێنی لهشو مێشك كه‌وتبووین، به سروشت ڕۆڵه‌ی تووڕه‌یی بووین وه‌كو هه‌موو خه‌ڵكانیتر. به‌ڵام خودا كه ده‌وڵه‌مه‌نده له‌به‌زه‌یی، له‌به‌ر ئه‌و خۆشه‌ویستیه مه‌زنه‌ی بۆ ئێمه‌ی ده‌ربڕیوه، زیندوویكردینهوه له‌گه‌ڵ مه‌سیح، دوای ئه‌وه‌ی مردووبووین به‌هۆی گوناهه‌كانمان، خودا ڕزگاری كردین به به‌ره‌كه‌تی خۆی. چونكه ئێمه سه‌ر بهعیسای مه‌سیحین، خودا له‌گه‌ڵ ئه‌ودا هه‌ڵیساندین لهئاسمان دایناین. تا له‌سه‌رده‌می داهاتوو ده‌وڵه‌مه‌ندی به‌ره‌كه‌تی بێ‌سنووری خۆی، به‌نیانی له‌گه‌ڵمان له‌عیسای مه‌سیح ده‌ربكه‌وێ. خودا به به‌ره‌كه‌ت به‌هۆی باوه‌ڕتان ڕزگاریكردن، ئه‌مه‌ش لهئهنجامی هه‌وڵدانی خۆتان نه‌بوو، به‌ڵكو دیاری خودا بوو، هه‌روه‌ها به‌هۆی كردار نه‌بوو، تا یه‌كێك بتوانێ شانازی پێوه بكات. ئێمه كرداری خوداین، ئه‌و دروستی كردین له‌عیسای مه‌سیح بۆ كاری چاكه، ئه‌وه‌ی خودا لهپێشا ئاماده‌ی كردووه بۆمان تا له‌سه‌ری بڕۆین.
مه‌سیح ئاشتی ئێمه‌یه
له‌به‌ر ئه‌وه به‌بیرتان بێته‌وه ئێوه‌ی له پێشا به‌له‌ش جووله‌كه نه‌بوون، پێتان ده‌وترا خه‌ته‌نه نه‌كراو له‌لایه‌ن ئه‌وانه‌ی له‌شیان به‌ده‌ست خه‌ته‌نه كراوه، ئه‌و كاته بێ مه‌سیح بوون، دوور بوون له‌كۆمه‌ڵی گه‌لی ئیسرائیل، هه‌روه‌ها بێگانه بوون سه‌باره‌ت به په‌یمانه‌كانی به‌ڵێن، هیچ هیوایه‌كتان نه‌بوو، بێ خودا بوون له‌م جیهانه. به‌ڵام له‌عیسای مه‌سیح هه‌رچه‌نده دوور بوون ئێستا نزیك بوونه‌وه به‌هۆی خوێنی مه‌سیح.
مه‌سیح ئاشتی ئێمه‌یه، جووله‌كه‌و ناجووله‌كه‌ی كرد به‌یه‌ك، دیواری دوژمنایه‌تی ڕووخاند كه لهیهكتر جیای ده‌كردنه‌وه، به‌پووچه‌ڵكردنه‌وه‌ی شه‌ریعه‌تی ڕاسپاردهكانو ئه‌ركه ئاینیه‌كان له‌له‌شی خۆی، تا له‌هه‌ردووكیان له‌خۆیدا مرۆڤێكی تازه دروست بكاتو ئاشتی بنێته‌وه، به‌مه هه‌ر دووكیانی له‌گه‌ڵ خودا ئاشتكردهوه، به خاچه‌كه‌ی كۆتایی به دوژمنایه‌تی نێوانیان هێناو كردنی به‌یه‌ك له‌ش. مه‌سیح هاتو مزگێنی ئاشتی بۆتان هێنا، كه دوورن، هه‌روه‌ها بۆ ئه‌وانه‌ی نزیكن. چونكه ئێمه هه‌ردوو لامان [جووله‌كه‌و ناجووله‌كه] به‌هۆی مه‌سیح له‌یه‌ك ڕۆح ده‌چینه لای باوك.
ئیتر ئێوه له‌مه‌ولا نامۆ و بێگانه نین، به‌ڵكو ئێستا هاووڵاتین له‌گه‌ڵ خوشكو برا پیرۆزه‌كان، سه‌ر بهبنهماڵهی خودان. دروستكراون له‌سه‌ر بناغه‌ی نێرراوانو پێغه‌مبه‌ران، عیسای مه‌سیح خۆی به‌ردی بناغه‌كه‌یه‌تی. ئه‌وه‌ی به هۆیه‌وه هه‌موو خانووه‌كه به‌یه‌كه‌وه ڕاده‌گرێ‌و ته‌واوی ده‌كات، تا ببێ به په‌رستگایه‌كی پیرۆز لهخوداوهند. به‌هۆی ئه‌وه‌وه ئێوه‌ش به‌شێكن له‌و خانووه‌ی خودا تیایدا نیشته‌جێ ده‌بێ له‌ڕۆح.
Biblica® Open Sorani Kurdish Book of Life. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.